पोखरा- नेपाल कम्युनिष्ट पार्टीका अध्यक्ष तथा पूर्व प्रधानमन्त्री पुष्पकमल दाहाल 'प्रचण्ड'ले आइतबार बस्ने सचिवालयको बैठकबाट एकता प्रक्रियाका सबै बाँकी काम टुंग्याउने बताएका छन्।
प्रधानमन्त्री केपी शर्मा ओली र आफूबीचमा एकताका बाँकी रहेका कामहरु एकैपटक टुंग्याउने सल्लाह भएको र आइतबार सचिवालयको बैठक बसी त्यसलाघ अन्तिम रुप दिइने कसरतमा रहेको प्रचण्डले बताए।
प्रेस संगठन नेपालले कास्कीले बिहीबार पोखरामा आयोजना गरेको पत्रकार भेटघाट कार्यक्रममा बोल्दै अध्यक्ष प्रचण्डले जनताको जनादेशकै कारण पार्टी एकता भएको भन्दै एकताका बेला भएका सहमति र सम्झौता कार्यान्वयन हुनुपर्नेमा जोड दिए।
पार्टी एकता प्रक्रिया मुलुकलाई सफलतामा अघि बढाउने कुरासँग जोडिएको उनको भनाइ छ। 'अहिले देशको र सरकारको नेतृत्व गर्ने पार्टी हुनुको नाताले नेकपा एकता प्रक्रियालाई अन्तिम रुप दिने र तलसम्मका कमिटीहरुको परिचालन गर्ने कुराले देश, सरकार र समग्र विकास प्रक्रियाका निम्ति रणनीतिक अर्थ राख्छ। यो कुराको बोध हामी सबैलाई छ र हामी त्यसैमा अधिकतम तवरले प्रयासरत छौं,' उनले भने।
सरकारले पहिलो वर्षलाई आधार वर्षको रुपमा मानेर संवैधानिक र कानुनी रुपले गर्नुपर्ने कामहरु पनि यसै वर्ष टुंग्याउनु पर्नेमा प्रचण्डले जोड दिए।
उनले पार्टी एकताका लागि यसअघि भएका सहमति र सम्झौताविपरीत जाने छुट कसैलाई नभएको पनि स्पष्ट पारे। उनले पार्टी एकता र सरकारको कामलाई प्रभावकारी रुपमा अघि बढाएर लैजाने बारेमा पनि आफूहरु गम्भीर भएको धारणा राखे।
उनले भने, 'पार्टी र सरकार सञ्चालनका लागि भएका सहमति निकै अघि नै सार्वजनिक भएको हो, अहिले त्यो विषयलाई चर्चा र विवादमा ल्याउन कोही न कोही खेलिरहेको छ।'
फरक प्रसंगमा अध्यक्ष प्रचण्डले विप्लव समूह राजनीतिक प्रक्रियामा आउनुको विकल्प नरहेको धारणा राखे।
गुठी विधेयकका बारेमा जनताको असन्तुष्टि देखा परेपछि फिर्ता लिइएको भन्दै उनले भने, 'गुठीसम्बन्धी विधेयक अब नयाँ शिराबाट अघि बढ्छ। सबै गुठीहरु एकै प्रकृतिका छैनन्, सबै समस्याको हल हुने गरी विधेयक आउँछ।'
अध्यक्ष प्रचण्डले विधेयकहरुबारे रहेका प्रावधानहरुका बारेमा जनतालाई बुझाउन नसकिएको स्वीकारे। (फाइल तस्बिर)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786437116.jpg)
-1786184812.png)
