भैरहवा- तराईमा गर्मी अचाक्ली बढेको छ। गर्मीका कारण तातो हावा चलेको छ भने मध्य दिउँसो घरबाहिर निस्कने सक्ने अवस्था छैन।
मौसम पूर्वानुमान महाशाखाका अनुसार रुपन्देही क्षेत्रको अधिकतम तापक्रम ४० डिग्री सेल्सियसमाथि पुगेको छ।
मौसम विभाग मौसम पूर्वानुमान महाशाखाकाका अनुसार गत शनिबार भैरहवाको तामपान अधिकतम ४३ दशमलव ३ डिग्री र न्यूनतम तापमान २८ दशमलव ३ डिग्री सेल्सियस मापन गरिएको थियो।
गर्मी बढेपछि रुपन्देहीका अधिकांश शैक्षिक संस्थामा बिदा दिइएको छ। भैरहवामा पछिल्लो चार वर्षयताकै उच्च गर्मी भएको छ। गर्मीका कारण स्थानीयले निकै सास्ती खेप्नुपरेको सिद्धार्थनगर नगरपालिका ८ का स्थानीय व्यापारी उमेश थापा मगरले जानकारी दिए। अत्यधिक गर्मीका कारण व्यापारमा समेत गिरावट आएको उनको भनाइ छ।
गर्मीका कारण मानिस मात्रै होइन, पशुपंक्षी पनि छटपटिन थालेका छन्। धानको ब्याड चिराचिरा परेको छ भने रोपेको धान पनि सुकेको छ।
मानिसहरुले गर्मीबाट जोगिन अनेक उपाय अपनाउन थालेका छन्। गर्मीका कारण चिसो पेयपदार्थको भने बिक्री बढेको छ।
गर्मीसँगै अस्पतालहरुमा बिरामीको संख्या पनि बढेको छ। प्रादेशिक अस्पताल बुटवलका अनुसार दैनिक ६ सयदेखि ७ सयसम्म बिरामी उपचार गराउन अस्पताल आउँछन्। तीमध्ये धेरैजसो गर्मीजन्य रोगबाट प्रभावित छन्।
भीम अस्पताल भैरहवाका मेडिकल सुपरिटेन्डेन्ट बद्री बैदवारका अनुसार गर्मीका कारण अस्पतालमा आउने बिरामीको चाप निकै बढेको छ। सामान्य अवस्थामा १ हजारदेखि १५ सयसम्म बिरामी आउने यस अस्पतालमा अहिले गर्मीकै कारण २ हजार ५ सयदेखि ३ हजारको हाराहारीमा बिरामी आउने गरेको बैदवारले बताए।
उनले दिउँसोको समयमा घाममा नहिँड्न र अतिआवश्यक कामले हिँड्न परेमा छाता प्रयोग गर्ने, प्रशस्त झोल पदार्थ खान आग्रह गरे।
झाडापखाला, छाला, निमोनिया, रुघाखोकी लगायतका बिरामी उपचारका लागि आउने गरेको अस्पतालहरुले जनाएका छन्।
मध्याह्न र अपराह्न सरकारी कार्यालय सहित बजारमा सार्वसाधारणको उपस्थिति पातलिएको छ।
प्रदेश ५ मा रुपन्देही, कपिलवस्तु, पश्चिम नवलपरासी, गुल्मी, पाल्पा, अर्घाखाँची लगायतका जिल्लामा खानेपानीका मुहान सुकिरहेका छन्। यी जिल्लाका वनमा डढेलो लागिरहेका कारण तापक्रम अरु बढिरहेको छ। मुख्य सहरमा पनि खानेपानीको अभाव बढ्दो छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।