रसुवा– रसुवामा भुकम्पबाट बिस्थापित भएकाहरुको पुनःस्थापनाका लागि जग्गा खरिद प्रक्रिया अघि बढेको छ।
भुकम्पका कारण सुख्खा पहिरो झर्नुका साथै जमिन चिरा परी बस्न अयोग्य भएपछि बिस्थापित भएका ३ सय ५३ मध्ये ७२ परिवारलाई पुनःस्थापनाका लागि जग्गा खरिद गरी हस्तान्तरण गरिएको राष्ट्रिय पुनर्निर्माण प्राधिकरणले जनाएको छ। प्राधिकरणका नापी अधिकृत कृष्णबहादुर थापाले सरकारले जग्गा नभएकाहरुलाई जग्गा खरिद गर्न २ लाख रुपैयाँ अनुदान उपलब्ध गराएसँगै बिस्थापितको पुनःस्थापनका लागि जग्गा खरिदको काम अघि बढेको बताए।
उनले भने, ‘हामीले पहिलो चरणमा साबिकको डाडागाउँ गाविस ८ र ९ बाट बिस्थापित भई शान्तिबजारमा बसेका २४ घरधुरी र दोस्रो चरणमा बोगटीटारमा बसिरहेका ४८ परिवारका लागि पुनर्निर्माण प्राधिकरणले उपलब्ध गराएको १ करोड ४४ लाख रुपैयाँमा जग्गा खरिद गरी हस्तान्तरण गरेका छौं।’
नुवाकोटको शान्तिबजारमा चार रोपनी १० आना र बोगटीटारमा १२ रोपनी जग्गा खरिद गरी बिस्थापित परिवारलाई हस्तान्तरण गरिएको हो। जग्गा खरिदको प्रक्रिया पूरा भएसँगै जिल्ला प्रशासन कार्यालय रसुवामा औपचारिक कार्यक्रम गरी दुई चरणमा जग्गाधनीलाई चेक र विस्थापितका लागि श्रीमान्–श्रीमतीको नाममा संयुक्त लालपुर्जा वितरण गरिएको राष्ट्रिय पुनर्निर्माण प्राधिकरणका जिल्ला समन्वय समिति प्रमुख कृष्णकान्त उपाध्यायले बताए।
उनले भने, ‘अहिले हामीले चरणबद्ध रुपमा बिस्थापितको पुनःस्थापनाका लागि जग्गा खरिद गरी हस्तान्तरण गरिरहेका छौं। अब बाँकीलाई पनि जतिसक्दो चाँडो सुरक्षित स्थानमा जग्गा खोजेर पुनःस्थापना गर्नेछौं।
यसअघि अन्य व्यक्तिले पाएको अनुदान रकम जस्तै जग्गा खरिद गरेका विस्थापितहरुले पनि निजी आवास निर्माणका लागि ३ लाख रुपैयाँ पाउने भएका छन्।
विस्थापितलाई जग्गा हस्तान्तरण गरिएसँगै अब ३ महिनाभित्रमा आवास निर्माण सुरु गर्नुपर्ने भएकाले केही दिनमै अनुदान रकमका लागि प्रक्रिया सुरु गर्ने बिस्थापितहरुले बताएका छन्।
जग्गाको धनीपुर्जा पाएपछि बिस्थापित वीरबहादुर तामाङले भने, ‘भुकम्पबाट बिस्थापित भएर भौतारिँदै हिँडिरहेको अवस्थामा सरकारले जग्गा खरिद गरी हामीलाई दिएकोमा धेरै खुसी छौं। अब केही दिनमै घर बनाउन सुरु गर्नेछौं। हामीले बास पाउने भयौं।’
भूकम्पका कारण रसुवामा करिब ७ सय बिस्थापित भएको भनिए पनि प्राधिकरणको तथ्यांकमा ३ सय ५३ जनाको मात्र नामावली छ। ५ वटा गाउँपालिकाका करिब १६ वटा बस्ती जोखिममा परेको बताइएको छ। गाउँमा सुक्खा पहिरो जानुका साथै बस्ती वरिपरि जमिन चिरा परेपछि ४ सयभन्दा बढी घरधुरी विस्थापित बन्न पुगेका थिए। गाउँ नै छाडेर हिँडेका भुकम्प प्रभावित निजी तथा सरकारी जग्गामा जस्ताको टहरा बनाएर बसिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
