राजविराज– ‘जो होचो उसैको मुखमा घोचो!’ गरिब र दलित समुदाय बसोबास गर्ने सप्तरीका विभिन्न स्थानमा यो उखान यतिबेला चरितार्थ भइरहेको छ।
खुला दिसामुक्त अभियानका क्रममा उनीहरु दिनहुँ अपमानको सिकार हुन थालेका छन्। सरकारी तथा गैरसरकारी संस्थाका कर्मचारी र स्थानीय तहका नवनिर्वाचित पदाधिकारीहरु संलग्न रहेको अभियानमा पछिल्लो समय सर्वसाधारणलाई अपमानित गर्ने र सार्वजनिक रुपमा बेइज्जती गर्ने कार्यमा परिणत हुँदै गएको स्थानीयले महसुस गरेका छन्।
अभियान चलाइरहेका सामुदायिक विकास केन्द्र, जिल्ला समन्वय समिति, खानेपानी तथा सरसफाइ डिभिजन कार्यालय, महुली सामुदायिक विकास केन्द्र, सवल नेपाल, वेल, पञ्चावती ग्रामीण विकास केन्द्र, हुकोडेक लगायत संघसंस्थाका प्रतिनिधि र पदाधिकारीहरु यतिबेला गाउँ गाउँमा खटिएका छन्।
बिहान ४ बजेदेखि नै प्रहरीसहित उपस्थित हुने अभियानकर्मीले दिसा–पिसाब गर्न बसेका स्थानीयलाई सिठी बजाउँदै लखेट्छन्। कतिपय स्थानमा त शौच गर्दै गरेको सर्वसाधारणको फोटो खिचेर सामाजिक सञ्जालमा अपलोड गरी अपमानित गर्ने गरेको पनि पाइएको छ।
आर्थिक अभावमा बाँचिरहेका अधिकांश दलित र विपन्न समुदायका मानिसलाई शौच गरेकै कारण ५ सय रुपैयाँ जरिवाना पनि गरिन्छ। अभियानकर्मीको अपमानलाई सर्वसाधारणले भने वाध्यताका रुपमा लिएका छन्।
अभियानकर्मीको यस्तो क्रियाकलापको कतिपयले भने विरोध सुरु गरेका छन्।
‘जबसम्म ठाउँ–ठाउँमा सार्वजनिक शौचालय बनाइँदैन, तबसम्म यस्तो अपमानित गर्ने कार्य गर्नु उचित छैन’, विटु मिश्र भन्छन्, ‘सार्वजनिक शौचालय भए खुला शौच गर्ने ७० प्रतिशत समस्या घटेर जान्छ।’
शौच गरिरहेको फोटो सामाजिक सञ्जालमा नराख्न पनि उनले आग्रह गरेका छन्। उनले आफू खुला दिसामुक्त अभियानको साथमा रहे पनि सार्वजनिक रुपमा कसैको अपमान गर्नु घृणित काम भएको बताए।
अभियानकर्मीहरुले यो कार्यलाई बाध्यताको रुपमा परिभाषित गर्दै आएका छन्। सन् २०१७ भित्रै जिल्लालाई खुल्ला दिसामुक्त घोषणा गर्ने अन्तिम मिति नजिकिँदै गर्दा पनि शौचालय निर्माणमा स्थानीयहरुले बेवास्ता गरेकाले पछिल्लो कदम चाल्नुपरेको उनीहरुको तर्क छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
