काठमाडौ- ‘हेलो सरकार’ले छ वर्षमा ८० दशमलव ७७ प्रतिशत गुनासो सम्बोधन गरेको छ।
हेलो सरकारमा आएका गुनासोमध्ये सर्वसाधारणका ५९ हजार १८६ वटा सम्बोधन गरिएको हेलो सरकार कार्यालयका शाखा अधिकृत रामचन्द्र कोइरालाले जानकारी दिए। हेलो सरकारमा ६ वर्षमा ६७ हजार ६१३ गुनासो आएका थिए। २०६८ कात्तिक १७ गतेदेखि तत्कालीन प्रधानमन्त्री डा बाबुराम भट्टराईले सर्वसधारणका गुनासो सम्बोधन गर्न हेलो सरकार सञ्चालन गरेका थिए।
अहिले हेलो सरकारमा ८ हजार ४२७ गुनासो सम्बोधन हुन बाँकी छन्। तीमध्ये अहिले २ हजार ५८६ उजुरीको सम्बोधन हुन लाग्दैछ। आएका गुनासोलाई हेलो सरकारले उच्च प्राथमिकता, प्राथमिकता र साधारण गरी तीन किसिमले वर्गीकरण गरी सम्बोधन गर्दै आएको छ। उच्च प्राथमिकतामा ६ हजार ९४४, प्राथमिकतामा ३९ हजार ७९५ र साधारणमा एक हजार ६५८ उजुरी आएको उनले बताए।
हेलो सरकारमा धेरैजसो विकासनिर्माण, स्वास्थ्य, शिक्षा, रोजगारी, प्रशासनतर्फका गुनासो आउने गरेका छन्। सर्वसाधारणले ११११ नं डायल गरी आफ्नो गुनासो टिपाउने र कर्मचारीले सम्बन्धित निकायमा जानकारी गराएर गुनासो सम्बोधन हुने गर्छ। हेलो सरकारले फोनसहित फेसबुक, ट्वीटर, इमेल, फ्याक्सबाट गुनासो लिने गर्छ।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
