टोरन्टो- क्यानडाको एक बयोबृद्ध जोडी अहिले निकै दुःखी छ। पछिल्लो ७ दशक सँगै क्रिसमस मनाएको यो जोडीले यसपालि क्रिश्चियन धर्मावलम्बीहरूको ठूलो चाड क्रिसमसको उत्सव छुट्टाछुट्टै मनाउनुपर्ने अवस्था सिर्जना भएको छ।
९१ वर्षीय हर्बर्ट गुडिन र ८९ वर्षीया आन्ड्रे गुडिन बुढेसकालमा केयर सेन्टरमा बसोबास गर्दै आइरहेका थिए। तर, श्रीमान् हर्बर्टको स्वास्थ्य अवस्था केही नाजुक भएपछि उनलाई नर्सिङ होममा सार्नुपर्ने अवस्था आएको छ।
यो बयोबृद्ध जोडी यसअघि पर्थ–एन्डोभरस्थित न्यु ब्रन्सभिकमा बसोबास गर्थे। तर, यही साताको अन्त्यमा उनीहरू छुट्टिनुपर्ने सरकारी अधिकारीहरूले जानकारी दिइसकेका छन्।
सोसल मिडिया फेसबुकमा यी जोडीको बियोगान्त कहानी सार्वजनिक भएपछि क्यानडामा यस कदमको विरोध हुन थालेको छ। बयोबृद्ध जोडीकी छोरी डायने फिलिप्सले आइतबार मात्र फेसबुकमा लेखेकी थिइन्, ‘जतिबेला म आफ्नो बुवासँग कुरा गरिरहेको थिएँ, पछाडिबाट आमा रुन थाल्नु भयो।’
फिलिप्सले भनिन्, ‘मेरी आमाले भावुक बन्दै भन्नु भयो, क्रिसमस हाम्रा लागि समाप्त भयो। यो हाम्रो अहिलेसम्मकै खराब क्रिसमस हो। छुट्टिसम्मका लागि निर्णय टाल्न सकिन्थ्यो होला?’
फिलिप्सका अनुसार उनलाई शुक्रबार नै प्रान्तीय विभागबाट फोन आएको थियो। फोनमा भनियो, ‘उनको बुवाको स्वास्थ्य अवस्था कमजोर बन्दै गइरहेको छ, त्यसैले स्वास्थ्य लाभका लागि केयर सेन्टर लैजानु पर्नेछ।’
उनले आफूले तुरुन्त निर्णय गर्न नसकेपछि विभागले आफैं निर्णय गरेको बताइन्। भनिन्, ‘मैले एक साताको समय मागेको थिएँ। किनभने म चाहन्थें, मेरो बुवा–आमाले यसपालि पनि सँगै बसेर क्रिसमस मनाउनुहोस्। तर, उनीहरु राजी भएनन्।’
केयर सेन्टरका एक प्रतिनिधिले फिलिप्सले फेसबुकमा पोस्ट गरेको प्रतिक्रियाको उत्तरमा भनेका छन्, ‘हामीकहाँ बसोबास गर्ने कुनै पनि व्यक्तिलाई अतिरिक्त स्वास्थ्यलाभको सुविधा आवश्यक पर्यो भने हामीले सरकारी नियमको पालना गर्नै पर्नेहुन्छ। नियमको पालना नगर्नु कानुन विरोधी काम हो। मेरो लाइसेन्स रद्द हुन सक्छ। निर्णय भइसकेको छ र अब मेरो हातमा केही छैन।’ बिबिसीबाट
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
