कञ्चनपुर- जंगली हात्तीको झुण्डले घर भत्काएको चार महिना बिते पनि कञ्चनपुरको महाकाली नगरपालिका–३ बडुवाल टोलका ७५ वर्षीय ज्येष्ठ नागरिक मैसरा बुढा आफन्तको शरणमा बस्दै आएकी छिन्।
आर्थिक अभाव र ढल्दो उमेरका कारण अशक्त भएकैले उनले घर निर्माण गर्न नसक्दा आफन्तको शरणमा बस्दै आएकी हुन्। गत भदौ २३ गते राति हात्तीको बथानले बुढाको घर भत्काएको थियो। त्यसपछि उनी नातिनी नाता पर्ने लक्ष्मी खत्रीको शरणमा छिन्।
हात्तीले उनले घरभित्र भण्डारण गरेर राखेको अन्न, ओढ्ने बिछ्याउने, लगाउने लुगाफाटो र खाना पकाउन प्रयोग हुने भाँडाकुँडा सबै नष्ट गरिदिएपछि उनले बाध्य भएर आफन्तको शरणमा बस्नुपरेको बताइन्।
आर्थिक अभाव र उमेरका कारण ओतलाग्ने नयाँ घर निर्माण गर्ने क्षमता छैन। उनले दुखेसो पोख्दै भनिन, 'अन्न र लुगाफाटोको समेत व्यवस्था नहुँदा आफन्तले दिएको दुई छाकको खाना र लुगाफाटोमै गुजारा चलाउन विवश भएकी छु।'
ओत लाग्ने टहरा बनाउन पैसा नभएका कारण आफन्तको घरमा रात बिताउँदै आएको मैसराले बताइन्। 'हात्तीले घर भत्काएपछि नातिनीको घरमा बास बस्दै आएकी छु,' मैसराले भनिन्, 'कसैले सहयोग गर्लान् भनेको कसैले सहयोग गरेनन्।' उनका श्रीमानको जंगली हात्तीको झुण्डले २०७२ सालमा ज्यान लिएको थियो।
'खेतमा बाली हुर्कन थालेपछि हात्तीकै त्रासमा रात बित्छ, आफन्तको घरमा सुत्दा पनि कति बेला हो, राति हात्ती आएर मार्ला भन्ने डर छ,' मैसराले भनिन्।
मैसरालाई भने कोही दाता आएर सहयोग गर्ला र घर बनाऊला भन्ने आशा भने जीवित रहेको छ। हात्तीले बेघर बनाएका बुढालाई घर बनाउन सबै थोक किन्नुपर्ने भएको छ। शरीरमा लाउने एकसरो लुगाबाहेक सबै हात्तीले नष्ट गरेपछि आगामी दिनमा कसरी गुजारा चलाउने भन्ने निकै ठूलै पिरलो छ उनमा।
'सबै आउँछन् आश्वासन दिएर मात्रै जान्छन्,' उनले भनिन्, 'कसैले मेरो समस्या बुझ्दैन।'रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749801778.jpg)
-1749797959.png)
-1749826086.png)
