काठमाडौं– सर्वोच्च अदालतले सामूहिक बलात्कारमा परेकी बाजुराकी १४ वर्षीया बालिका पूजा बोहोराको मुद्दा ३ वर्षपछि ब्युँताएको छ।
न्यायाधीशद्वय शारदाप्रसाद घिमिरे र प्रकाशसिंह राउतको इजलाशले ३ वर्षपछि बोहोराको बलात्कार मुद्दामा सुनुवाई सुरु गरेको हो।
सर्वोच्चले बुधबार सामूहिक बलात्कारमा संलग्न भनिएका बैतडीका सागर भट्ट र अमर अवस्थीलाई झिकाउने आदेश गरेको हो। २०७१ पुस २ मा सर्वोच्चमा पुनरावेदन भएको जबर्जस्ती करणी मुद्दामा १५ दिनभित्र भट्ट र अवस्थीलाई झिकाउने आदेश गरेको हो।
२०६८ साल चैत ७ मा एसएलसीको परीक्षाका लागि गणितको गेस पेपेर किन्न जाँदा पाटन बजारमा पूजा सामूहिक बलात्कारको शिकार भएकी थिइन्। पाटन बजारस्थित श्रीकृष्ण उच्च माविमा उनी परीक्षा दिन बैतडीको कैलापाल गाउँबाट आएकी थिइन्।
यस्तो थियो घटना
बोहोरा बलात्कारमा परी मानसिक सन्तुलन गुमाई अचेत अवस्थामा अस्पताल भर्ना भएपछि सबैतिर प्रचार भएको थियो। बोहोरालाई बलात्कारपछि एकान्त नालीमा फालिएको थियो। पुस्तक किन्न भनेर हिँडेकी उनी बेलुकासम्म नफर्केपछि आफन्तले खोज्न जाँदा रगताम्य भई घ्यारघ्यार गरी नालीमा लडिरहेको अवस्थामा भेटेका थिए। उनलाई त्यहाँबाट अस्पताल ल्याईएको थियो।
सार्वजनिक रुपमा आलोचना भएपछि प्रहरीले बैतडीका दुई जनालाई पक्राउ गर्दै अनुसन्धान थालेको थियो। तत्कालीन प्रधानमन्त्री बाबुराम भट्टराईको सरकारले मन्त्रिस्तरीय निर्णय गरी १ लाख रुपैयाँ औषधोपचार खर्च पनि दिएको थियो।
प्रहरीले अनुसन्धान गर्दै जिल्ला अदालत बैतडीमा जबर्जस्ती करणीको मुद्दा दर्ता गरेको थियो। उक्त मुद्दामा सुनुवाई गर्दै जिल्ला न्यायाधीश हिमालयराज पाठकले दुवै अभियुक्तलाई १३ वर्ष कैद र जनही ५०-५० हजार रुपैयाँ जरिवाना गर्ने फैसला सुनाएका थिए।
एक वर्षअघि बैतडी जिल्ला अदालतले १३ वर्ष कैद भनी गरेको फैसलालाई पुनरावेदनले उल्टायो। पुनरावेदन अदालत महेन्द्रनगरका न्यायाधीशद्वय नरबहादुर शाही र रमेशप्रसाद राजभण्डारीको इजलाशले उनीहरुलाई सफाइ दिने फैसला सुनायो। पुनरावेदनको उक्त फैसला खारेजीको माग गर्दै सरकारी वकिलको कार्यालयले सर्वोच्च अदालतमा पुनरावेदन गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
