बेनी, म्याग्दी- म्याग्दीका एक व्यक्तिले पर्यावरणीय शुद्धता कायम गरी धर्म प्राप्त गर्ने उद्देश्यले आफ्नो गाउँभित्रको सार्वजनिक जग्गा र वन क्षेत्रमा दैनिक रुपमा बिरुवा रोप्ने गरेका छन्।
बेनी नगरपालिका–२ खवराका चन्द्रबहादुर कार्कीले वनजंगलको विनाशका कारण बिग्रँदै गएको वातावरणीय सन्तुलन कायम राख्न, पानीका मूलको संरक्षण गर्न र सोही कार्यमार्फत धर्मप्राप्त गर्ने उद्देश्यले हालसम्म एक हजार एक सय बिरुवा रोपेका छन्। ५३ वर्षीय कार्कीले ५ हजार बिरुवा रोप्ने लक्ष्य रहेको बताए।
'रोपेका सबै बिरुवा भएको ठाउँमा समय मिलाएर जान्छु। मान्छेले समेत बिरुवामा क्षति पुर्याएको देखेर दुःख लाग्छ,' कार्कीले भने। सदरमुकाम बेनी आसपासका सडकसँगै आफ्नै गाउँसम्म पुग्ने विभिन्न स्थानमा बरपिपलको बिरुवाका साथै विभिन्न प्रजातिका फलफूल पनि उनले लगाएका छन्।
एक हजार ८ वटा बरपिपलका बिरुवा रोपेर ती ठाउँमा चौतारी पनि निर्माण गरिसकेका छन् उनले। चार महिना अघिदेखि सुरु अभियानअन्तर्गत हालसम्म विभिन्न प्रजातिका ११ सय बिरुवा रोपेको उनले बताए। ती बिरुवामा सात्लेपानी, भसभसे, लव्लीहिल, खबरा, ठूलोखबरा लगायत बरपीपल, समी, सल्लो, बडहर, टुनी लगायतका छन्।
बेनीमा कृषिउपज खरिद बिक्री केन्द्र किराना पसल र विभिन्न थरी फलफूलका बिरुवा बिक्री गर्दै आएका खबरा निवासी कार्कीले यस कार्यबाट आनन्द महसुस भएको बताए। 'मानिस धर्म गर्न मन्दिर धाउँछन्, दानपुण्य गर्छन्, तर मलाई त्यसो गर्नुभन्दा वातावरणको संरक्षण पनि हुने र मानिसलाई सुविधा पनि हुने बरपीपल रोप्ने र चौतारी बनाउने काम उपयुक्त लाग्यो र सोही गर्न थालेँ,' उनले भने, 'गाउँमा डोजर लगाएर बाटो खन्दा वन क्षेत्र नासियो, पानीका मुहान सुके, चौतारी, पोखरी पुरिए। म वातावरण संरक्षणमा जुटेको छु।' रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
