चितवन- जिल्लामा गुड्ने निजी विद्यालयका सवारी साधनको रङ सुन्तला–पहेँलो बनाइने भएको छ।
जिल्ला ट्राफिक प्रहरी कार्यालय, निजी तथा आवासीय विद्यालय अर्गनाइजेसन (प्याब्सन) र उच्च माध्यमिक विद्यालय संघ (हिसान) बीच आज भएको सहमतिमा आगामी चैत मसान्तसम्ममा निजी विद्यालयका सबै सवारीसाधनमा एउटै रङ बनाउने उल्लेख छ।
२० वर्षभन्दा पुराना सवारीसाधन सञ्चालन नगर्ने, सवारी चालक र सहचालकले गाढा निलो रङको पोसाक अनिवार्य लगाउनुपर्ने सहमति भएको छ। ट्राफिक प्रहरीले यस्ता सवारी साधनलाई एम्बुलेन्स सरह प्राथमिकतामा राखी ट्राफिक व्यवस्थापन गर्ने सहमति भएको जिल्ला ट्राफिक प्रहरी कार्यालय, चितवनका प्रमुख प्रहरी निरीक्षक सन्तोष पन्तले बताए।
सवारी चालक र सहचालकले सवारी चलाएको समयमा मादक पदार्थ र सूर्तीजन्य पदार्थ सेवन गर्न नपाउने, मोबाइल फोनमा कुरा गर्न नपाउने, कक्षा ११ र १२ का विद्यार्थीलाई विद्यालय पोसाकमा मोटरसाइकल र स्कुटी चलाउन नदिइने र विद्यार्थीलाई सवारी नियम र ट्राफिक ज्ञान दिइने पनि सहमति भएको पन्तले जानकारी दिए।
जिल्लामा ३ सयभन्दा बढी निजी विद्यालयका सवारीसाधन रहेका छन्। सहमतिमा प्याब्सन चितवनका अध्यक्ष देशबन्धु अधिकारी, हिसान चितवनका अध्यक्ष भूपेन्द्र धिताल लगायतले हस्ताक्षर गरेका छन्।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1748237727.jpg)
-1749801778.jpg)
-1749797959.png)
