कञ्चनपुर- वेदकोट नगरपालिकामा छाउपडी गोठ भत्काउने अभियान सुरु गरिएको छ।
वेदकोट वडा कार्यालयको समन्वयमा गैरसरकारी संस्था द्वन्द्वपीडित तथा एकल महिला विकास केन्द्रले थालेको गोठ भत्काउने अभियान अन्तर्गत वेदकोट वडा नं १ र २ मा ४ दर्जनभन्दा बढी गोठ भत्काइएका छन्। वेदकोटलाई छाउपडी गोठमुक्त नगरपालिका बनाउन अभियान सुरु गरिएको केन्द्रकी अध्यक्ष सीता बोहराले बताइन्।
'छाउपडी कुरीतिको रुपमा रहेको छ, कानूनले पनि यसलाई अवैध भनेको छ,' उनले भनिन्, 'महिला अझै पनि छाउपडी गोठमा बसेकाले भत्काएका हौँ।' अभियान सबै वडामा लगिने जनाइएको छ।
गोठ भत्काउने अभियानमा वडाध्यक्षहरुले पनि साथ दिएका छन्। वडा नं १ का अध्यक्ष हरि गिरी र २ का अध्यक्ष नरेशबहादुर सिंहले गोठ भत्काउन स्थानीय बासिन्दासँगै बस्तीमा पुगेर सहयोग गरिरहेका छन्।
वडा नं १ का अध्यक्ष गिरीले छाउपडी गोठमा बस्दा महिला असुरक्षित हुने भएकाले भत्काउनमा सहयोग गरिएको बताए। 'गोठ घरबाट टाढा हुन्छ, त्यसरी बस्दा बलात्कारमा परेका केस आएका छन्, चोरी डकैतीको डर हुन्छ,' उनले भने, 'महिलालाई सुरक्षित बनाउन गोठ नभत्काई हुँदैन।'
घरबाट टाढा गोठमा बस्दा परिवारका अन्य सदस्यसित सम्पर्क समेत हुन नपाएर विगतमा महिलाले धेरै दुःख पाएको अध्यक्ष गिरीले बताए।
वडा नं १ मा १२ र २ मा ३२ छाउपडी गोठ भत्काइएका छन्।
गोठ भत्काउनुअघि संघसंस्थाले महिलासित जनचेतनामूलक कार्यक्रम गरेका थिए। महिलालाई कार्यक्रममा सहभागी गराएपछि गोठ भत्काउन थालिएको केन्द्रकी अध्यक्ष बोहराले बताइन्।
सर्वोच्च अदालतले छाउपडी प्रथालाई अवैध घोषणा गरेपछि सरकारले यसको न्यूनीकरणका लागि कानुन बनाएको छ। कानुनका आधारमा स्थानीय तहमा छाउपडी न्यूनीकरणका लागि समिति गठन गरिएका छन्।
सुदूरपश्चिममा रजस्वला भएका महिला ५ दिनसम्म घरभन्दा बाहिर बनाइएको गोठमा बस्छन्। त्यही गोठलाई छाउपडी गोठ भन्ने गरिएको छ।
कृष्णपुर, वेदकोट र झलारीमा सबैभन्दा बढी छाउपडी गोठ छन्।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
