राजविराज– विश्व आप्रवासन श्रमिक दिवस मनाइरहँदा सोमबार सप्तरीका एक वृद्ध आफ्नो छोरालाई स्वदेश फर्काइदिन आग्रहसहित सदरमुकाम राजविराजमा भौतारिँदै थिए।
छिन्नमस्ता गाउँपालिका–४ का ६५ वर्षीय मो. इस्माइलको मलिन अनुहारमा उनका छोराले विदेशमा पाएको हैरानी स्पष्ट झल्किन्थ्यो। तर, एजेन्ट फेला पार्न नसकेपछि उनले जिल्ला प्रशासन कार्यालय हाताभित्रको सूचना केन्द्रमा उजुरी दर्ता गराएर फर्किए।
इस्माइलका अनुसार, उनका छोरा मो. अन्सारुल र भाइ मो. सुभान गत जेठ ३ गते कतारका लागि उडे। एजेन्टले ‘पैसा अलि बढी लाग्छ, राम्रो काममा लगाइदिन्छु’ भनेपछि प्रतिव्यक्ति १ लाख ३५ हजारका दरले रकम पनि बुझाए। तर, एजेन्टले भनेअनुसार कतारमा न काम थियो, न त पैसा नै।
अन्सारुलले २ महिनासम्म फूलबारीमा काम गरे। त्यसपछि कुनै महिना एउटा काम, कुनै महिना अर्को काम गर्दै बिरालोले बच्चा सारे झैं काम र ठाउँ परिवर्तन भइरह्यो। पछिल्लो एक महिनादेखि काम गर्दै आएको कम्पनीले कामबाट निकालिदिएपछि उनी बिचल्लीमा परेका छन्।
‘कम्पनीले कोठाबाटै निकालिदियो भनेर छोराले फोन गरेको धेरै दिन भयो’, इस्माइलले भने, ‘बस्ने र खाने कुनै टुंगो छैन रे। म बूढोले कसरी छोराको उद्धार गर्नु?’
यता, काममा पठाइदिने एजेन्ट सेराज सेखको अत्तोपत्तो छैन। सदरमुकाम राजविराजमा घर भए पनि कहिल्यै भेट नहुने र फोन समेत उठाउन छाडेपछि बाध्य भएर प्रशासन कार्यालयको सूचना केन्द्रमा उजुरी गर्न आएको इस्माइलले बताए।
छिन्नमस्ता गाउँपालिका ४ कै मतेबुल मन्सुरी पनि सूचना केन्द्रमै भेटिए। १० महिनाअघि एजेन्टले पासपोर्ट र रकम दुवै लिएर भागेपछि उनको बिल्लीबाँठ भएको छ। दुई महिनाअघि उनले पनि सूचना केन्द्रमा उजुरी गरेका छन्। तर, अहिलेसम्म एजेन्ट सम्पर्कमा नआएको उनले गुनासो गरे। अन्सारुल र सुभानलाई कतार पुर्याएर अलपत्र पार्ने एजेन्ट सेराज सेखले नै आफूलाई पनि १० महिनादेखि झुलाइरहेको उनले गुनासो गरे।
यति मात्र होइन, खुस मोहम्मद, कलाम मन्सुरी, अनवारुल मन्सुरी, खुर्सिद मन्सुरीसहित ८ जना युवाले सेखलाई प्रतिव्यक्ति ४५ हजार र पासपोर्ट जिम्मा लगाएका थिए। तीमध्ये २ जना कतार गए पनि अन्यको अवस्था मतेवुलको भन्दा फरक छैन।
‘एजेन्टले आज–भोलिमै कतार उडाइदिन्छु भन्छ, तर त्यो दिन कहिल्यै आएन’, मतेवुलका बुबा इजरायल मियाँले भने, ‘अब त आजित भयौं, पासपोर्ट र पैसा फिर्ता गराइदिन भनेका छौं।’
सूचना केन्द्रका संयोजक रामप्रवेश मण्डलले मतेवुलसहितका युवाहरुले दुई महिनाअघि नै निवेदन दर्ता गराएको र सोमबार दुवै पक्षलाई छलफलमा बोलाए पनि एजेन्ट नआएको बताए।
‘निवेदन दिँदा उनीहरुसँग पैसा र पासपोर्ट दिएको प्रमाण समेत थिएन’, मण्डलले भने, ‘एजेन्टलाई बोलाएर कुरा गरेपछि उसले भरपाई बनाइदिएको छ, अब बेइमानी गर्न खोजे सोही भरपाईका आधारमा कारबाही प्रक्रिया अघि बढाउन सकिन्छ।’
उनले यो आर्थिक वर्षमा मात्रै सूचना केन्द्रमा वैदेशिक रोजगारी सम्बन्धी १ सय १० वटा निवेदन दर्ता भएको र त्यसमध्ये ८१ वटा समस्या समाधान गरी पठाइएको जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768457877.png)
-1764146706.png)
-1768395492.png)
