काठमाडौं– शुक्रबार भक्तपुर सूर्यविनायकस्थित प्रधानमन्त्री रोजगार कार्यक्रमको भव्य शुभारम्भ भयो।
चालु आर्थिक वर्षमा बेरोजगार युवाहरूलाई ३० दिने रोजगारी उपलब्ध गराउने सरकारको लक्ष्य थियो।
सोही योजना कार्यान्वयन गर्नका लागि शुभारम्भ गरिएको उक्त कार्यक्रममा युवा तथा वृद्धवृद्धाहरूको बाक्लै उपस्थिति भयो।
रोजगारीका लागि सूचीकरण भएका युवाहरू निकै हर्षित देखिन्थे।
उनीहरू प्रधानमन्त्री रोजगार कार्यक्रम लेखिएको ज्याकेट र हेलमेट लगाइरहेका थिए।
त्यसैबीच कुर्सीमा आएर बसिन् एकजना वृद्धा आमा। उनी थिइन् सिपाडोल घर भएकी ६८ वर्षीया कर्नमाया विक।
‘काम पाइन्छ रे भन्ने सुनेर म पनि आएको,’ वरिपरि हेर्दै कर्नमायाले सुनाइन् र कुर्सीमा आएर टुसुक्क बसिन्।
उनी कामका लागि आएको भन्ने सुनेर वरपरका युवा एकछिन त छक्क परे। सबैको नजर उनै वृद्धातर्फ घुमिरहेका थिए।
रोजगारी पाएका युवाहरू ज्याकेट र हेलमेटको पहिरनमा थिए।
ती सूचीकरण भएका युवाहरूलाई वितरण गरिएको ज्याकेट र हेलमेट मागेर कर्नमायाले मागेर लगाइन्।
र बसेर कार्यक्रम सुनिरहिन्।
पहिलो चरणको औपचारिक कार्यक्रम सकियो।
लगत्तै दोस्रो चरणको कार्यक्रम सुरु हुने भयो।
दोस्रो चरणको कार्यक्रम थियो, कटुन्जे, सुवर्ण चोकदेखि तिनधारासम्मको सडकको निर्माण प्रारम्भ।
पहिलो चरणको कार्यक्रमबाट सबै निस्किए। उनी पनि बाहिर अरु युवा सँगसँगै निस्किइन्।
सुर्वण चोक नजिकै युवाहरू सडक निर्माणका लागि लागि बेल्चा लिएर कामको तरखरमा देखिन्थे।
कर्नमायाले पनि बेल्चा हातमा लिइन् र सडक खन्न तयार भइन्।
'गर्न सक्ने खालको काम त मैले पनि त पाउँछु होला,' वरपरका मानिससँग उनी प्रश्न गरिरहेकी थिइन्।
‘तपाईं यस्तो गाह्रो खालको काम गर्न सक्नुहुन्छ र?’ सडक निर्माण कामका लागि आएका एक युवाले आमालाई प्रश्न गरे।
आमाले ती युवकलाई आग्रह गर्दै भनिन्, ‘मलाई पनि मैले गर्न सक्ने खालको काम मिलाइदिनुस् न।’
‘घरमा छोरा बुहारी छन्, उनीहरू आफूआफू गर्छन्, आफूआफू खान्छन्, के गर्नु बाबु दुःख छ, काम पाए त म पनि गर्छु,’ आमाले दुःख बिसाउँदै भनिन्।
‘काम गर्न पाए, यसो चामल तरकारी खाने खर्च हुन्छ, ’उनले थपिन्।
सडक निमार्ण गर्ने ठाउँसम्म बेल्चा लिएर पुगिन्।
उनीसँगै वरपरका छिमेकीहरू पनि आएका थिए। 'तपाईंले काम गर्न सक्नुहुन्न बस्नुस्,' उनीहरूले ती वृद्धालाई केहीबेर सम्झाए।
अन्त्यमा उनले आफ्नो हातको बेल्चा अरुलाई नै थमाएर उदास हुँदै हेरिरहिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
