काठमाडौं– बुधबार दिउँसो। त्रिभुवन अन्तर्राष्ट्रिय विमानस्थल।
आगमन कक्षमा ट्रलीमा सामान राखेर गुडाउँदै फर्किने युवाहरुको लर्को लागेको छ। सबैको मुहारमा स्वदेश फर्कंदाको खुसी देख्न सकिन्छ। कोही आफन्त भेटिहाल्ने लालसाले अलि हतारिएझैं देखिन्छन्।
त्यसैबीचमा अलि फरक दृश्य देखियो। एक युवा ट्रली गुडाउँदै बाहिरिए। साथमा सानी बच्चीलाई समेत राखेर।
युएईबाट फर्किएका बिनु महर्जन रहेछन् उनी। ट्रलीमा समानसहित छोरी राखेर लिएर आएको दृश्यतिर सबैको आँखा तानियो।
केहीकेही त भनिरहेका थिए–
–आहा कति क्युट बेबी।
– खस्ला नि ट्रलीबाट।
युएईका १० वर्ष
उच्च शिक्षा अध्ययन सकेर बसिरहेका थिए बिनु। युएईमा राम्रो रोजगारीको अवसरबारे कतैबाट सुने। आफन्तहरु पनि युएईमा थिए। व्यावसायिक रुपमा राम्रै सफलता पाइरहेका। त्यसैले युएई जानलाई उनलाई समस्या भएन।
युएई उड्दा उनको उमेर २२ वर्षको थियो। उता पनि भनेजस्तै सजिलो काम पाए। कहिल्यै दुःख परेन। 'त्यहाँको अलसिद कम्पनीमा एचआर कोअर्डिनेटरका रुपमा काम गर्न थालेँ,' उनी भन्छन्, '१० वर्षसम्म निरन्तर सोही कम्पनीमा कार्यरत छु। राम्रो भएरै त होला यतिका वर्ष बितेको पत्तै भएन।
छोरीको पहिलो नेपाल यात्रा
युएईको उनको कम्पनीबाट छुट्टी मिलिरहन्छ। उनी यही मौका छोपेर नेपाल आउने गर्छन्।
नेपाल फर्किएकै बेला उनले विवाह गरेका हुन्। विवाहपछि श्रीमतीलाई पनि उनले युएई नै लगे। अहिले उनीहरु दुवै एउटै कम्पनीमा काम गर्छन् श्रीमती भने एचआर एडमिनका रुपमा कार्यरत छिन्।
‘दुवै सँगै भएकाले झनै राम्रो भयो,' उनले खुसी साटे, 'काम र कमाइ पनि ठिक छ।'
३ वर्षअगाडि छोरी जन्मिइन्। तर, छोरी सानै भएकाले त्यसयता उनी नेपाल आउन पाएका थिएनन्। कतिबेला नेपाल पुगौं भन्ने भइरहेका बेला यतिबेलै कम्पनीमा १० दिनको बिदा मिल्यो। उनी पिँजडाबाट फुत्किएको चराझैं उडेर नेपाल आइपुगे।
परिवार र आफन्तसँग खुसी साटासाट गर्ने योजना बनाएर छोरी लिएर नेपाल फर्किएको बताउँछन् उनी। ‘श्रीमतीको बिदा मिलेन, त्यसैले छोरी र म मात्रै आयौं,’ बिनुले मुस्कुराउँदै भने।
उनले छोरीलाई पहिलो पटक नेपाल ल्याएका हुन्। छोरीलाई आफन्तहरुसँग चिनजान गराउने र नेपालीपन चखाउने योजनामा छन् बिनु।
क्षमता र योग्यता हुँदा कमाइ राम्रो
रोजगारीका लागि खाडी मुलुक पुगेका युवाहरु भन्नेबित्तिकै हामी अप्ठ्यारै काममा पसिना बगाउन गएका हुन् भन्ने सोच्छौं। तर कतिपय नेपालीहरु खाडी मुलुकमा पनि व्यावसायिक काम गरेर राम्रो पैसा कमाइरहेका छन्। सिप, क्षमता र योग्यता भएका नेपाली युवालाई खाडी मुलुकमा राम्रो अवसर पाउन गाह्रो छैन।
यसैमध्येका एक हुन्, बिनु।
‘खाडी भए पनि काम गर्ने क्षमता आफूसँग छ भने सजिला कामहरु पाइन्छन्, कमाइ पनि राम्रै हुन्छ,’ उनी भन्छन्।
बिनु र उनकी श्रीमती मिलेर मासिक २ लाखभन्दा बढी कमाउँछन्। सेवासुविधा पनि कम्पनीले राम्रै दिएको उनको भनाइ छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।