काठमाडौं- सत्तारुढ दल नेकपा र नेपाली कांग्रेसका सांसदबीच दोहोरी चलेको छ। रोजगारी र द्वन्द्वकालीन मुद्दाका विषयमा दोहोरी चलेको हो।
नेकपा सांसद जनार्दन शर्माले दोषारोपण गरेर पानीमाथिको ओभानो नबन्न प्रतिपक्षी दललाई चेतावनी दिएका छन्।
प्रतिपक्षी दल नेपाली कांग्रेसकी सचेतक पुष्पा भुसाल गौतमले माओवादीको हिंसात्मक द्वन्द्वका कारण नेपाली युवाहरु विदेश जान बाध्य भएको धारणा राखेपछि त्यसको प्रतिकार गर्दै शर्माले अरुलाई दोषारोपण गरेर उम्कने काम नगर्न चेतावनी दिएका हुन्।
उनले संविधान निर्माण लगायत उपलब्धिको श्रेय मात्रै नलिएर सबै कमी कमजोरीको सबैले सामुहिक जिम्मेवारी लिनुपर्ने बताए।
सत्तामा बसेर निरन्तर नेतृत्व लिएकाहरुले राम्रा कामका जस मात्रै नभई गल्तीहरुको पनि जिम्मेवारी लिनुपर्ने बताए।
गल्तीहरु दोषारोपण गरेर पानीमाथिको ओभानो भएर सुख नपाईने भन्दै उनले सबै जस अपजसको सामुहिक जिम्मेवारी लिनुपर्ने बताए।
'परिर्वतनलाई, संघीयतालाई, संविधानसभालाई, अहिलेको अधिकारलाई बडो गर्वका साथ फलानोको पालामा यसो गर्यौ भन्ने? अनि त्यसपछि आएर जनयुद्ध, जंगल पसेर सबै विनाश गरे भनेर भन्ने? म जिम्मा लिन चाहन्छु। जनयुद्ध गरेर यो देशको परिर्वतन गर्नेको एउटा कमाण्डर म पनि हुँ। त्यसकारण म पूर्ण रुपमा जिम्मा लिन चाहन्छु,' नेता शर्माले भने, 'त्यसले दिएको उपलब्धि , परिर्वतका पक्षहरु, राजतन्त्र अन्त्य गरेको कुराहरु बिर्सन मिल्छ? त्यसकारण गल्तीहरुपनि सामूहिक रुपमा लिऔँ। त्यहा भएका कमिकमजोरीहरु लिन म तयार छु। र त्यतिबेलाको माओवादी लिन तयार छ। कमरेड प्रचण्ड लिन तयार हुनुहुन्छ।'
सांसद भुसालले २०४८ साल देखिको मुलुकको आर्थिक अवस्थाको फेयरिस्त प्रस्तुत गर्दे नेपाली कांग्रेसले लिएको नीजिकरणलाई तात्कालीन कम्युनिष्ट पार्टीले पनि सहयोग गरेको तथा २०५० सालमा एक वर्षको अवधिमा ९० हजार रोजगारी श्रृजना भएको दाबी गरेकी थिइन्। सोही क्रममम उनले तात्कालीन माओवादी द्वन्द्वका कारण युवाहरु विदेशीन बाध्य भएको बताएकी थिइन्।
'जब नेकपा एमालेले नीजिकरणको विरोध गर्दै गयो, अरुण तेश्रो योजनालाई अघि बढाऔं भन्दाखेरी त्यसको विरोध गर्दे गयो र आज आएर भारतसंग ५ सय मेगावाट किनेर रोजगारी श्रृजना गर्ने अवसरलाई गुमायो। नीजीकरणको नीतिलाई गुमायो भने अर्कोतिर माओवादीहरु जंगलमा गएर हिंसात्मक द्वन्द्व गरेर नीजी क्षेत्रलाई ध्वस्त पार्दे गए, युवालाई विदेश जानका लागि बाध्य गरे। नीजीकरणको विरोध गरे त्यसको परिणाम स्वरुप नेपाली युवाहरु विदेश जान बाध्य भएका थिए । त्यही भएर नेपाली कांग्रेसको समयमा युवाहरु विदेश गए भन्ने तथ्यांक म निवेदन गर्न चाहन्छु बालुवाटारको प्रधानमन्त्री कार्यालयमा गएर हेरौँ। नेपाली कांग्रेसको समयमा ९० हजारभन्दा बढी युवाहरुले रोजगारी पाएका थिए।'
प्रतिनिधिसभाको बिहिबारको बैठकमा आगामी आर्थिक बर्ष २०७६/७७ को बजेटमाथिको छलफलमा बोल्न रोष्टम पुगेका सांसद शर्माले सांसद भुसालको अभिव्यक्तिको खण्डन गरेपछि मात्रै विषयवस्तुमा प्रवेश गरेका थिए।
प्रगतिशील उत्पादक शक्तिको विकास गरी समाजवाद उन्मुख अर्थतन्त्रमा पुग्ने बहस नै अहिलेको बहसको विषय भएको भन्दै सांसद शर्माले प्रगतिशील उत्पादक शक्तिको विकास गर्दे उत्पादनको साधन र स्रोतमा जनताको सहभागिता विस्तारमा जोड दिनुपर्ने बताए।
उनले बजेटले सम्मृद्ध मुलुक बनाउने सरकारको नारालाई आत्मसाथ गरेको, राष्ट्रिय पूँजी निर्माणलगायत विषयमा प्राथमिकता दिएको बताए।
गतवर्ष हराएको कर्णाली अहिलेको बजेटमा सम्बोधन भएकोमा उनले धन्यवाद दिएका थिए।
उनले बजेटमा संघीयतको मर्म बोध नभएको ,कृषिमा आत्मनिर्भरका आयोजना प्रभावकारी हुन नसकेको , चालु खर्च बढ्दै जाने र पूँजीगत खर्च घट्दै जानु चिन्ताको विषय भएको, तलबवृद्धि प्रतिशतमा नभई एकमुष्ट तोकिनुपर्ने, बजेट खर्चका लागि ठोस विधि बनाउन नसकिएको टिप्पणी गरे।
विगतका सबै उद्योगलाई स्थापित गरी नयाँ उद्योग स्थापना बढाउनुपर्नेमा उनको जोड छ।
'हिजो बेचिएका उद्योगहरुलाई आज फिर्ता ल्याएर, हिजो लिलाम गरेका उद्योगहरुलाई आज फिर्ता लिएर फेरी जनतासहितको सरकारको सहभागीतामा अगाडि बढाउने प्रष्ट नीति तथा कार्यक्रम खै? किन त्यो गर्नुभएन? उनले भने विगतका अर्थमन्त्रीहरुले गरेका गल्तीहरुलाई तपाईहरुले किन सच्याउन चाहनुहुन्न?'
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।