भैरहवा- उमेर ६१ वर्ष, काठमाडौं नयाँ बानेश्वरकी पुष्पलता आचार्यलाई देख्दा उनी बुढ्यौली उमेरमा छिन् भन्ने लाग्दैन। यसमा युवतीहरुलाई नै चुनौती र प्रेरणा दिनेगरी उनले गर्ने हर्कतले बल थप्छ। कारण उनी यो उमेरमा पनि निर्धक्क बुलेट बाइक चलाउँछिन्।
समान्यतया उमेरले ६० कटेकालाई वृद्धको रुपमा लिइन्छ। त्यसमाथि यो उमेरका अधिकांश पुरुष तथा महिलाहरुलाई कडा र भारी काम तथा व्यवहारभन्दा आरामतर्फ रुची रहन्छ। त्यो उनीहरुको शारीरिक अवस्थाको उपज पनि हो। किनकी सो उमेरसम्म हाम्रो शारीरिक अवस्था प्रौढजस्तो बलियो रहँदैन। यी सबै तथ्यलाई भने आचार्यको व्यवहारले चुनौती दिन्छ। त्यसमाथि अन्य महिलाहरुको लागि प्रेरणा पनि।
किनकी आमरुपमा बुलेट बाइक चलाउनु सामान्य मानिँदैन। बढी क्षमताको इन्जिन हुने भएकोले पनि बुलेट बाइक भारी हुन्छ। अखिर यो उमेरमा पनि किन चलाउन मन लाग्यो त आचार्यलाई बुलेट बाइक?
‘यो उमेरमा केही गर्न सकिँदैन भन्ने धेरै महिलाहरुको मनोविज्ञान छ,’ पुष्पलता भन्छिन्, ‘म त ६१ वर्ष पुगें। तर, इच्छा शक्ति, आत्मबल र स्वच्छ मन भएपछि जस्तो सुकै काम पनि गर्न सकिन्छ भन्ने उदाहरण दिनका लागि मैले बुलेट बाइकलाई राजेकी हुँ। यसबाटै महिलाको हकअधिकारका लागि पनि आगाडि बढिरहेको छु।’
उनी महिलाहरुको प्रेरणाका लागि 'बुलेट बाइक राइडर’ बनेको बताउँछिन्। बुलेट बाइकमा चढेर देशका विभिन्न स्थानका महिलाहरुको गलत मनोविज्ञान चिर्दै यस उमेरमा पनि अगाडि बढ्न सक्ने प्रेरणा दिँदै हिँडेकी छिन् उनी। घरको चुलोचौकोमा बस्ने महिलाहरुलाई बाहिर निस्कन आग्रह गर्ने आचार्यको सकारात्मक सोचका साथ काम गरे गन्तव्यमा पुग्न कुनै कठिनाइ नहुने बुझाइ छ।
आचार्य फरक जीवनशैलीबाट यहाँसम्म मोडिएकी हुन्। उनी यसअघि लेखकको रुपमा परिचित थिइन्। उनले विभिन्न विधामा ६३ बढी पुस्तक लेखेकी छन्। कथा, कविता, उपन्यास लेख्नुका साथै संगीत र फिल्म क्षेत्रमा समेत काम गरेको अनुभव छ उनीसँग। पुस्तक लेखनबाट आएको रकमले विभिन्न विद्यालय, अनाथ आश्रमलाई सहयोग गर्ने गरेको आचार्य बताउँछिन्।
उनको लेखकीय जीवनसँग पनि बुलेट बाइकको यात्रा गाँसिएको छ। प्रकाशित पुस्तकहरु लिएर १७ जिल्ला, ४ सय १३ वटा स्कुल तथा क्याम्पसमा अफरोड/अनरोड बाटो हुँदै पुगेर आचार्य बताउँछिन्।
अबको तयारी के छ त? हाम्रो स्वभाविक प्रश्नमा उनी भन्छिन्, ‘बुलेट यात्रा' नामक पुस्तक प्रकाशित गर्ने योजना छ।'
पुस्तक प्रकाशन गर्नुअघि यसका लागि सामाग्री र कथानक बटुल्न उनी निरन्तर यात्रामा छिन्। पुष्पलता केही दिनअघि मात्रै ३ सय ५० सिसी इन्जिन क्षमताको बुलेट बाइक कुदाएर नेपाल र भारत भ्रमणमा निस्किएकी थिइन्। उनलाई अहिले 'बुलेट लेडी'को रुपमा समेत चिनिन थालिएको छ। उनी भन्छिन् ‘पहिला राइटर थिएँ, अहिले राइडर भएकी छु।’
कसरी सिकिन् बाइक चलाउन?
करिब २२ वर्ष अगाडि २०५४ सालमा पहिलो पटक यामाहा कम्पनीको 'आरएक्स' मोटरसाइकल चलाउने गरेको उनी सम्झन्छिन्। 'उ बेला म ४०/४१ वर्षकी थिएँ। त्यतिबेला आरएक्स मोटरसाइकल चलाउँथे, अहिले ६१ वर्षमा कुदिरहँदा समेत त्यतिबेलाको जोस हराएको छैन।,' जोसिलो मुद्रामै पेश गएकी उनी भन्छिन्, ‘मलाई त्यतिबेला भन्दा अहिले बढी जोस र जाँगर आइरहेको छ।’
उनले बुलेट बाइक किनेको करिब ४ महिना जति भयो। तर, बीचमा लामो समय बाइक नचढेका कारण उनमा अभ्यास कम थियो। यद्दपि चलाउँदै जाँदा यो अवस्थासम्म आइपुगेको उनी बताउँछिन्। 'पहिले त अग्लो सिट भएकाले सकिँदैन कि भन्ने थियो,' आचार्य भन्छिन्, ‘तर सिट डाउन गरेर चढ्न सकें। सिट होचो भएपछि त सहज भइहाल्यो नि।’
उनी बुलेट बाइक चलाउँदाका सुरुवाती दिनका अफ्ठेरो सम्झिँदा अझै गम खान्छिन्। अप्ठेरो टार्न अग्लो हिल जुत्ता पनि खोजिन्। कसैले देख्लान् कि भनेर अँध्यारोमा चलाउन थालिन्। 'सुरुमा त ज्यादै गाह्रो भयो। अलि अग्लो भए सहज हुन्छ कि भनेर हिल भएको जुत्ता थाइल्यान्डदेखि न्युरोडसम्मै खोजें,' बुलेट बाइक चलाउन सिक्दाका कठिन समय सम्झिँदै उनी भन्छिन्, 'अरुले देख्लान् भनेर अँध्यारोमा चलाउन थालें। तर, मोड्न नसकिने। सुरुमा सोझो बाटोमा सजिलो हुन्छ भनेर सिकें।'
किन बुलेट यात्रामा छिन् आचार्य?
उनले आफ्नो जोस र जाँगर बल्ल सुरु भएको बताइन्। आगामी दिनलाई थप उर्जाशील बनाउँदै दबेका र दबाइएका महिलाहरुको मुक्ति र अधिकार रक्षाका लागि लाग्ने अठोट छ उनको। देशमा व्याप्त महिला हिंसा, घरेलु हिंसाका विरुद्ध जनजागरण ल्याउन तथा महिलालाई उर्जाशील बनाउनका लागि आफू ६१ वर्षको उमेरमा पनि बुलेट बाइक चढेर देश–विदेश दौडाहामा निस्किएको उल्लेख गरिन्।
उनी केही दिन अगाडि मात्रै छिमेकी मुलुक भारतका विभिन्न स्थान पुगेर नेपाल फर्किइन्। बुलेट बाइकमा भारत भ्रमण गरेकी उनले भारतमा भारतीयहरुले नेपाल र नेपालीहरु प्रति नम्र व्यवहार प्रस्तुत गर्ने गरेको बताइन्। बुलेट बाइकको पछाडि नेपालको राष्ट्रिय झण्डा बोकेर पुग्ने पुष्पलताले भारतमा नेपालको राष्ट्रियता र स्वाभिमानलाई दर्शाउँदै हिँडेको बताइन्।
राइटरसँगै राइडर बनेकी पुष्पलता भन्छिन्, 'यात्रा जारी छ, यो चलिरहन्छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
