काठमाडौं- इस्लाम धर्मावलम्बीहरुले आज हर्ष र उत्साहका साथ 'इद उलफित्र' पर्व मनाइरहेका छन्।
इल उलफित्रका अवसरमा बुधबार बिहानै राजधानीको घण्टाघरस्थित कास्मिरी मस्जिद र रत्नपार्कस्थित जामे मस्जिदमा ठूलो संख्यामा इस्लाम धर्मावलम्बीहरु पुगेर नमाज पाठमा सहभागी भएका छन्। यस्तै मुस्लिम बाहुल्य रहेको क्षेत्र बाँके, पर्सा तथा अन्य तराईका जिल्लामा समेत मुस्लिम समुदायमा शुभकामना आदानप्रदान गर्ने क्रम चलिरहेको छ।
कतिपय क्षेत्रमा अन्य धर्म तथा सम्प्रदायका व्यक्तिहरुले समेत मुस्लिम समुदायका साथीभाइ, छिमेकी तथा गाउँलेलाई शुभकामना दिइरहेका छन्। समाजिक सञ्जालमा समेत यो क्रम चलिरहेको छ।
मंगलबार साँझ चन्द्रमा हेरेपछि इस्लाम धर्मावलम्बीहरुले एक महिना लामो रमदान पर्व पूरा गरी इद उलफित्र मनाएका हुन्। आजको दिन व्रतालुले एक महिना लामो कठिन व्रत समापनको अवसरमा नमाज पढेर एकआपसमा शुभकामना आदानप्रदान गरी दीनदुःखीका लागि दान गर्ने गर्दछन्।
इद उलफित्रको अवसरमा सरकारले बुधबार सार्वजनिक बिदा दिएको छ। मुस्लिम आयोगको सिफारिसपछि यसअघि मन्त्रिपरिषद् बैठकले बिहीबार सार्वजनिक बिदा दिने निर्णय गरेको थियो। तर, आयोगले चन्द्रमाको अवलोकनका आधारमा आजै इद पर्ने भएकोले सार्वजनिक बिदा सार्नुपर्ने सुझाएपछि मंगलबार साँझ गृह मन्त्रालयले विज्ञप्ति निकालेर बुधबार सार्वजनिक बिदा गरिएको जानकारी गराएको हो।
इद उलफित्रका केही तस्बिरहरु:
(सबै तस्बिरःरासस)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
