राजविराज– कीर्ते नागरिकता बनाउने गिरोहका ६ जनालाई सप्तरी प्रहरीले पक्राउ गरेको छ।
जिल्ला प्रशासन कार्यालय सप्तरीका कर्मचारी र राजविराज वडा नम्बर १० का वडा सचिवसहित बुधबार पक्राउ परेकाहरुलाई प्रहरीले आज सार्वजनिक गरेको हो। सर्लाहीको ब्रह्मपुरी गाउँपालिका ७ घर भएका जिल्ला प्रशासन कार्यालय सप्तरीका कार्यालय सहयोगी ३० वर्षीय अजयकुमार यादव, सप्तरीको महादेवा गाउँपालिका वडा नम्बर १ घर भई राजविराज नगरपालिका वडा नम्बर १० का वडा सचिव ४९ वर्षीय मोहम्मद वकिल मियाँ पक्राउ परेका हुन्।
उनीहरुसँगै सुनसरीको हरिपुर गाउँपालिका ८ बस्ने ५५ वर्षीय कलिम मियाँ, झापा विर्तामोड नगरपालिका ४ का २० वर्षीय मो सइरो, भारतको उत्तरदेनाजपुरका ३१ वर्षीय मो. लतिफुर रहमान र भारतकै किसनगञ्ज तिवरियाका २६ वर्षीय मो नवेदलाई पक्राउ गरिएको हो।
पक्राउ परेकामध्ये कलिम मियाँले ग्राहक खोजेर ल्याउने र दुवै जना कर्मचारी मिलेर कीर्ते नागरिकता तयार गरी बिक्री गर्ने गरेको सप्तरीका एसपी मुकेशकुमार सिंहले जानकारी दिए। पक्राउ परेका अन्य व्यक्ति नागरिकता लिन आएका ग्राहक हुन्।
एसपी सिंहका अनुसार, जिल्ला प्रशासन कार्यालयका कार्यलय सहयोगी यादवले नागरिकताको प्रमाण पत्र र होलोग्राम उपलब्ध गराउने तथा वडा सचिव वकिल मियाँले नागरिकता तयार गरी बिक्री वितरण गर्दै आएका थिए। उनीहरुले प्रतिव्यक्ति २० हजारदेखि ५० हजार रुपैयाँसम्म लिएर नागरिकता बनाउने गरेका थिए।
बुधबार साँझ पनि उनीहरुले नागरिकता बिक्री गर्दै गरेको सूचना पाएपछि राजविराजस्थित राजरंगशालाबाट पक्राउ गरिएको हो।
प्रहरीले उनीहरुको साथबाट राजविराज नगरपालिका वडा नम्बर १० को नागरिकता रेकर्डको फाइल, जिल्ला प्रशासन कार्यालय सप्तरी र प्रशासकीय अधिकृतको छाप, नगद १ लाख तथा मोबाइल सेट लगायत सामग्री बरामद गरेको छ।
पक्राउ परेका सबैलाई सरकारी छाप दस्तखत कीर्ते मुद्दा दर्ता गरी थप अनुसन्धान गरिरहेको एसपी सिंहले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1768395492.png)
