काठमाडौं- आइसिसी एकदिवसीय विश्वकप प्रतियोगितामा बंगलादेशले विजयी सुरुवात गरेको छ। आइतबार लन्डनमा भएको खेलमा बंगलादेशले दक्षिण अफ्रिकालाई २१ रनले पराजित गरेको हो। उद्घाटन खेलमा आयोजक इंग्ल्यान्डसँग पराजित भएको दक्षिण अफ्रिकाको यो लगातार दोस्रो हार हो।
बंगलादेशले दिएको ३३१ रनको लक्ष्य पछ्याएको दक्षिण अफ्रिकाले ५० ओभरमा ८ विकेटको क्षतिमा ३०९ रन मात्र जोड्न सक्यो। उसका लागि कप्तान फाप डु प्लेसिसले ६२ रन जोडे भने जेपी डुमीनीले ४५ रनको योगदान दिए। भान डेर डुसनले ४१ रन र डेभिड मिल्नरले ३८ रन मात्र जोड्न सके। बलिङमा बंगलादेशका मुस्ताफिजुर रहमानले ३ विकेट लिए भने मोहमद सइफुदिनले २ विकेट हात पारे।
त्यसअघि लन्डनमा टस जितेको दक्षिण अफ्रिकाले पहिले फिल्डिङ रोजेपछि ब्याटिङ गरेको बंगलादेशले ५० ओभरमा ६ विकेट गुमाएर ३३० रन जोड्यो।
यो बंगलादेशले दक्षिण अफ्रिकाविरुद्ध र विश्वकपमा अहिलेसम्मकै उच्च स्कोर हो।
बंगलादेशका मुस्फिकर रहिमले ७८ रन जोडे। मध्यक्रमका ब्याट्सम्यान उनले ८० बलमा ८ चौका हिर्काए। सकिब अल हसनले ८४ बलमा ८ चौका र १ छक्का मद्दतमा ७५ रन जोडे। उनी खेलको म्यान अफ दि म्याच भए। त्यसअघि तमिम एकवाल १६ रन र उनका ओपनिङ पार्टनर सौम्य सरकार ४२ रनमा आउट भए। मोमहद मिथुनले २१ रनको योगदान दिए।
यस्तै मोहमुदुल्लाहले नटआउट ४६ रन जोडे। उनले ३३ बलमा ३ चौका र १ छक्का हिर्काए। मोसाडक हुसेन २६ रनमा आउट हुँदा मेहदी हसन मिराजले नटआउट ५ रन बटुले।
बलिङमा दक्षिण अफ्रिकाका क्रिस मोरिस, इमरान ताहिर र एन्डिल फेल्ह्लुख्वायोले २–२ विकेट लिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787645626.png)
-1787643624.jpg)
-1786602170.png)
-1786513116.png)
