फिदिम (पाँचथर)– नेपाली कांग्रेस पाँचथरका क्षेत्रीय सभापति बम लावती कोरियन भाषा प्रशिक्षण केन्द्रका सञ्चालक पनि हुन्। पार्टीको कामबाट फुर्सद पाएका बेला उनी फिदिम नगरपालिका-१ स्थित सोही केन्द्रमा बिताउँछन्। त्यसो त उनको व्यावसायिक कृषि फार्म पनि छ।
दोस्रो तलामा तालिम केन्द्र छ। त्यसको ठिकमुनि चिया पसल। लावतीको आबद्धता कांग्रेसमा भएकाले त्यही बाटो भएर आवतजावत गर्ने अधिकांश स्थानीय नेता-कार्यकर्ता उक्त चिया पसलमा छिर्छन्। र, राजनीतिका विषयमा गफिन्छन्। नेताहरु भेट्दा ‘जय नेपाल’ आदानप्रदान गर्नु सामान्य भइहाल्यो। चियागफको अधिकांश विषय कांग्रेसमै केन्द्रित हुन्छ।
स्थानीय नेता-कार्यकर्ता आउने-जाने क्रममा त्यही चिया पसलमा भेटिए पत्रकार महासंघ पाँचथरका सभापति लवदेव ढुंगाना। नेपाली कांग्रेस निकट पत्रकार संगठन प्रेस युनियनमा आबद्ध ढुंगाना पार्टीको कार्यशैलीप्रति असन्तुष्ट थिए। साथै, उनी आबद्ध प्रेस युनियनले समयमा महाधिवेशन गर्न नसकेकोमा उनको चरम असन्तुष्टि थियो।
कांग्रेस अहिले एकमहिने जागरण अभियानका क्रममा छ। यद्यपि अभियानले कांग्रेस कार्यकर्तामा थप ऊर्जा दिन नसकेको फिदिममा भेटिएका स्थानीय कार्यकर्ताबाटै बुझ्न सकिन्छ। पार्टीलाई थप सशक्तिकरण गर्न तथा सरकारको गलत क्रियाकलापका विरुद्ध देशभर जागरण अभियान सञ्चालन गरेको कांग्रेसको अभियान ओइलाउँदै गएको छनक यहाँका नेता-कार्यकर्ताले दिए।
पाँचथर नेपाली कांग्रेसका नेता-कार्यकर्ता उत्पादन गर्ने उर्वर क्षेत्र पनि हो। भूविक्रम नेम्वाङ, देवान दोर्जे थिङ, गणेश रिजाल, तेजप्रकाश रिजाल लगायतका पुराना नेतालाई कांग्रेसीजनले अहिले पनि सम्झिइरहन्छन्। असहज परिस्थितिमा पुराना नेता कार्यकर्ताले धानेको कांग्रेस अहिले पनि पाँचथरमा बलियै छ। जग बलियो भएको कांग्रेसलाई सोही रुपमा उभ्याउन भने वर्तमान नेतृत्वले सकेको छैन।
केन्द्रको आन्तरिक गुट तल्लो तहसम्मै पुगेको छ। क्षेत्रीय सभापति लावतीले त्यसलाई स्विकार्दै भने, ‘केन्द्रको आन्तरिक विवादको असर पाँचथरमा पनि छ। तर, केन्द्रमा भन्दा कम छ।’
क्षेत्रीय सभापति बम लावती
नेपाली कांग्रेसका वरिष्ठ नेता रामचन्द्र पौडेलले महासमिति बैठकलगत्तै जागरण अभियान सुरु गर्न प्रस्ताव गरेका थिए। तर, अभियान बैसाखमा मात्रै सुरु गरियो। स्थानीय कार्यकर्ता अभियान ढिलो गरिएमा असन्तुष्ट छन्।
प्रादेशिक संरचना अनुरुप संगठन नभएको कांग्रेसका लागि अभियान प्रभावकारी हुनबाट संगठनले रोकेको छ। विधान कार्यान्वयनको अभाव पाँचथरमा पनि देखियो। बिनासंगठन जागरण अभियानमा लागेका स्थानीय नेताहरुले जिल्लाभरिमा हालसम्म पाँच वडामा संगठन बनाएका छन्।
चिया गफका क्रममा थपिए, जिल्ला कार्यसमिति सदस्य मणिचन्द्र चेम्जोङ। पार्टीको क्षयीकरण हुनुमा उनी कांग्रेसको आन्तरिक कारणलाई दोष दिन्छन्। ‘कांग्रेस कमजोर भएको कांग्रेस भित्रैबाट हो। कांग्रेसले कांग्रेसलाई हराउने खेल छ,’ उनले असन्तुष्टि ओकले।
पार्टी सर्कुलर समयमा नहुनु, प्रशिक्षण शून्य, व्यक्तिवादी चरित्र, गुट, नेतृत्वको कार्यशैली, नेताको आशीर्वाद लगायतका कारणले पार्टी कमजोर भएको उनीहरुको ठम्याइ छ। पार्टी नेतृत्वप्रति आक्रोशित क्षेत्रीय सभापति लावती हाकाहाकी भन्छन्, ‘नेतालाई हनुमान चाहिएको छ। नेताको शैली र आचरण परिवर्तन हुन जरुरी छ।’
स्थानीय कार्यकर्तामा महासमितिको बैठकको निर्णयलाई केन्द्रीय समितिले उल्टाएको प्रति तीव्र आक्रोश छ। स्वतः महाधिवेशन प्रतिनिधि बन्न पाउने विधानको प्रावधानको विपक्षमा छन्, जिल्ला सचिव ब्रिजहाङ आङदेम्बे । उनी प्रश्न गर्छन्, ‘महासमिति बैठकको निर्णय उल्ट्याउन सक्ने अधिकार केन्द्रीय समितिलाई कहाँ छ?’
जिल्ला सचिव ब्रिजहाङ आङदेम्बे
पुसमा महासमिति बैठकले गरेको निर्णयलाई केन्द्रीय समितिले उल्ट्याइदिएको थियो। केन्द्रीय सदस्य स्वतः महाधिवेशन प्रतिनिधि हुने र आरक्षण दोहोर्याएर हुन पाउने विधानको पुरानो व्यवस्थालाई कायम गरिएको थियो। १४औं महाधिवेशन यसै वर्षको फागुनमा गर्नुपर्ने कांग्रेसका लागि समय छ। तर, नियमित समयमा महाधिवेशन हुन सक्ने अवस्था देखिएको छैन। समयमा महाधिवेशन हुनैपर्ने माग नेतृत्वसँग जिल्ला कार्यसमिति सदस्य मधु जबेगुको छ।
चिया पसलमा थपिने र बाहिरिने नेताहरुको क्रम जारी छ।
आफ्नै कामले हिँडिरहेका भरत तुम्वाले लावती र चेम्जोङलाई चिया पसलमा देखिपछि मोटरसाइकल रोके। र, चिया पसलमा छिरेपछि उनले पनि पार्टीको आन्तरिक जीवनका विषयमा दुखेसो पोखे।
गत स्थानीय निर्वाचनमा फिदिम वडा नम्बर ५ मा वडाध्यक्षको प्रत्यासी बनेका तुम्वाको नमिठो अनुभव छ। तरुण दल पाँचथरको सचिवसमेत रहेका तुम्वाले पार्टीभित्रैबाट पराजय भोगेको अनुभव सुनाए। जिल्लाको उच्च तहमा रहेका नेताले नै आफूलाई हराएको उनले तितो विगत सम्झिए। उनले भने, ‘मलाई हराउनकै लागि पार्टीभित्रैबाट मतदातालाई प्रभाव पारियो।’
जिल्ला कार्यसमिति सदस्य मधु जबेगु
त्यसो त नेपाली कांग्रेसले गठन गरेको अनुशासन समितिमा पाँचथरकै भीष्मराज आङदेम्बे अध्यक्ष छन्।
तपाईंलाई हराउनका लागि भूमिका खेल्नेका विरुद्धमा उजुरी दिनुभयो? नेपाल लाइभले तुम्वालाई प्रश्न राख्यो। पार्टीभित्र ईख पाल्न नहुने धारणा राख्ने उनले भने, ‘मेरो कारण उहाँको राजनीतिक भविष्य समाप्त बनाउन चाहिन। आफूलाई हराउन भूमिका खेलेका भनिएका स्थानीय नेताले निर्वाचनका बेला दिएको अभिव्यक्ति केन्द्रीय नेताकहाँ अडियोमार्फत पुगेको उनले स्मरण गरे। तरुण दल पूर्व अध्यक्षद्वय बालकृष्ण खाँण र उदय शमसेर जबराकहाँ तुम्वालाई हराउने स्थानीय नेताको आवाज पुगेको थियो। खाँण, जबरा र अर्का नेता अर्जुननरसिंह केसीले उनलाई सान्त्वना दिए। उनलाई हराउने कार्यमा लागेका ती जिल्ला नेताले गुन सम्झेलान् भन्ने तुम्वाको विश्वास छ।
पार्टीभित्र एक-अर्कामा बोल्दैमा अर्को समूहमा गएको आरोप लाग्ने गरेको उनको बुझाइ छ। एक्स्काभेटर धनीसमेत रहेका तुम्वाले कामका क्रममा फरकफरक व्यक्तिसँग वार्ता गर्नु व्यावसायिक बाध्यता रहेको सुनाए। व्यावसायिक कुराकानीलाई नै समूहमा गएको भनी आरोप लाग्ने गरेको अनुभव उनीसँग छ।
गत स्थानीय निर्वाचनमा फिदिम नगरपालिकासहित थप तीन गाँउपालिकामा कांग्रेसले विजय प्राप्त गरेको थियो। सदरमुकाम अवस्थित फिदिम नगरपालिकाका १४ वडामा मेयर/उपमेयर सहित नौ वडामा कांग्रेसले जित हासिल गर्यो। फालेलुङ, तुम्बेवा र फाल्गुनन्द गाउँपालिका उसले जितेको थियो। एक नगरपालिकासहित पाँचथरमा आठ स्थानीय निकाय छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
