इलाम- इलाम क्षेत्र नं २ बाट पूर्वसभामुख सुवास नेम्वाङ ९ हजार ६५४ मतान्तरले विजयी भएका छन्। निकटतम प्रतिद्वन्द्वी नेपाली कांग्रेसका केशव थापालाई हराउँदै प्रतिनिधिसभा सदस्यमा उनी चौँथो पटक विजयी भए। नेम्वाङले ३६ हजार ५१४ मत प्राप्त गरे भने थापाले २६ हजार ८६० मत ल्याए।
संविधानसभाका दुई वटै निर्वाचनपछि गठित संविधासभाको अध्यक्ष भई संविधान जारी गर्न नेम्वाङले मुख्य भूमिका निर्वाह गरेका थिए।
दोस्रो जनआन्दोलनपछि पुनःस्थापित संसद्को सभामुख बनेका नेम्वाङले लामो समय त्यही संसद्को सभामुख भई काम गर्ने अवसर पनि पाए। इलामबाट २०५६ सालको संसदीय निर्वाचनमा विजय भएपछि उनले कानुन, न्याय तथा संसदीय व्यवस्थामन्त्री, सामान्य प्रशासनमन्त्री र संसद्को सार्वजनिक लेखा समितिको अध्यक्षको समेत भूमिका निर्वाह गरेका थिए।
हाल नेकपा एमाले संसदीय दलका उपनेता रहेका नेम्वाङ कसैलाई नहोच्याउने, नम्र र मिजाजिलो स्वभावको रुपमा परिचित छन्। उनले संविधान बनाउनका लागि सबैको सहकार्य अपरिहार्य रहनेमा जोड दिँदै आएका छन्।
एमाले केन्द्रीय सदस्य र कानुन विभाग प्रमुख रहेका नेम्वाङले २०५६ सालको आम निर्वाचनमा नेपाली कांग्रेसका कुलबहादुर गुरुङ, २०६४ को संविधानसभाको निर्वाचनमा कांग्रेसकै केशव थापा र २०७० मा भएको दोस्रो संविधानसभा निर्वाचनमा कांग्रेसका महासमिति सदस्य भेषराज आचार्यलाई पराजित गरेका थिए। कानुन व्यवसायीका रूपमा परिचित र प्राध्यापन पेसामा समेत संलग्न नेम्वाङले नेपाल बार एशोसिएसनको महासचिवको जिम्मेवारीसमेत निर्वाह गरे। नेपाल ल क्याम्पसमा २०३५ सालदेखि २०५१ सम्म उनले प्राध्यापन पनि गरेका थिए।
२०२९ मा अनेरास्ववियुका तर्फबाट इलामको महेन्द्ररत्न बहुमुखी क्याम्पसको स्ववियु सभापति भएसँगै उनी राजनीतिमा निरन्तर क्रियाशील रहँदै आए। विद्यार्थी जीवनदेखि नै राजनीतिमा लागेका नेम्वाङ २०३३ सालमा राजकाज मुद्दामा जेल परे।
आफ्नै पहलमा संविधान जारी भएको बताउँदै नेम्वाङले अब देश र जनताको विकास र समृद्धिका लागि ठोस योजना ल्याउनेमा जोड दिएका छन्। 'सबैको साथ र सहयोगमा निर्वाचनमा विजयी भइयो, अब जनताको हित र विकासको काम गर्नेछु,' विजय घोषणापछि संक्षिप्त प्रतिक्रिया दिँदै उनले भने।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
