चुनाव नजिकिँदै गर्दा प्रदेश-२ मा यसरी खटियो सेना

ब्लग

नेपाल लाइभ शुक्रबार, भदौ २३, २०७४ १७:०४

काठमाडौं- प्रदेश नम्बर २ मा हुन लागेको स्थानीय तह निर्वाचनमा मतदाताहरुलाई निर्वाचन केन्द्रसम्म सहज पुर्‍याउनका लागि नेपाली सेना सडक मर्मतसम्भारमा खटिएको छ।

सैनिक टोलीहरुले प्रदेश २ का विभिन्न जिल्लामा क्षतिग्रस्त सडक निर्माण र मर्मत गरेको हो। सप्तरीको राजविराजस्थित डुम्री–राजदेवी तथा विरौल–डुम्री–शिवथान–देउरी सडक खण्डका विभिन्न स्थानका क्षतिग्रस्त सडक मर्मत गरी सवारी सञ्चालनमा ल्याइएको छ। सोही जिल्लाको भारदह–पोर्ताह–मयनकडरी–बग्धुवा सडक खण्डमा बाढीद्वारा कटान भएको सडक पनि सेनाको टोलीले मर्मत गरेको छ।

सोही सडक खण्डको हनुमाननगर कंकालिनी इलाकामा बाढीले २८ मिटर कटान गरी ६ फिट गहिरो खाल्डो बनाएको थियो। सो क्षतिग्रस्त सडकमा माटो तथा गिट्टी भरी मर्मत गरिएको सेनाले जनाएको छ।

सिरहको सिराह नगरपालिका ९ गुलेरिया, विष्णुपुर, राजपुर, गोलबजार बेतुना गुर्धाम र भगवानपुर इलाकाको क्षतिग्रस्त सडक समेत मर्मत गरी आवतजावतको व्यववस्था मिलाइएको हो।

बाराको कलैया उपमहानगरपालिका १६, १७, २३ र ब्रम्हपुरी इलाका, पर्साको मसिहानी, लक्ष्मीपुर, पसैनी, जगन्नाथपुर, श्रीपुर तथा रंगपुर इलाका, रौतहटको राजपुर नपामा पनि टोलीले मर्मत गरेको हो।

धनुषा, महोत्तरी, सर्लाही जिल्लाका विभिन्न सडक खण्डमा समेत ग्राभेल गरी सवारीसाधन आवतजावत सञ्चालन गरिएको सेनाले जनाएको छ। यसै क्रममा पूर्वी पृतनापति उपरथी गौरव तण्डुलले सिरह तथा सप्तरीमा भइरहेको मर्मत सम्भार कार्यको शुक्रबार निरीक्षण गरेका छन्।

प्रदेश नम्बर २ का १ सय ३६ स्थानीय तहमा असोज २ गते तेस्रो चरणमा निर्वाचन हुँदैछ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

कञ्चनपुरमा डिउटीमा रहेका प्रहरीले आफैंलाई गोली हाने, अवस्था गम्भीर

अहिल्यै सरकार परिवर्तन हुने कुनै कारण छैन : कांग्रेस नेता कोइराला

सङ्खुवासभाबाट एक अर्ब बढीको अलैँची निर्यात