दाङ- एक खुट्टाले मेची-महाकाली साइकल यात्रा गरिसकेका पारासाइकलिस्ट हुन् यमराज रसाइली।
४ वर्षको छँदा आफ्नो एउटा खुट्टा गुमाएका रसाइलीलाई अहिले आफू शारिरीक रुपमा अशक्त भएजस्तो लाग्दैन। १९ वर्षको उमेरबाट साइकल चढ्न थालेका रसाइलीलाई अहिले साइकल नै सबैभन्दा नजिकको साथी बनेको छ। ‘बैसाखी टेकेर हिड्ने मान्छे थिएँ, साइकल पाएँ। केही गर्नसक्छु भन्ने आँटले यहाँसम्म आएको छु’, जाेश मिश्रित आवाजमा उनले भने, 'खुट्टा हुनु र नहुनु बीचको फरक भुलिसकेको छु।’
शारिरीक रुपमा अशक्त भएकै कारण खुम्चिएर घरमै बस्नु पर्दैन, केही गर्न सकिन्छ भन्ने उदाहरण आफूले दिन खोजेको उनी बताउँछन्। विभिन्न जिल्लाको सफल साइकल यात्रापछि आफूजस्तै अन्यलाई पनि साइकिलिङ अभ्यास गराउने अभियानमा जुटेको उनले सुनाए।
‘चाँडै देशभरबाट २५/३० जनालाई लगभग एक महिना एक ठाँउमा राखेर आफूजस्तै अन्य व्यक्तिहरुलाई जागरुक बनाउने योजना बनाएको छु', आफैलाई आनन्द दिने खालकाे काम हाे जस्ताे लागेता पनि सकारात्मक प्रभाव पर्नेमा भने उनी विश्वस्त छन्। भने, 'काम त थालेकाे छु, पक्का केही त प्रभाव पर्छ। एक जनामा मात्र सकारात्मक साेच पलाए पनि त्याे मेरा लागि सफलताकाे खुड्किलाे हाे, अगाडि बढ्ने हाैसला हाे। बरु आउनुस् हामी सँगै यात्रा गराैं।’
शनिबार दाङका विभिन्न पर्यटकीय स्थलको प्रचारप्रसारका साथै 'स्वास्थ्यका लागि साइकल' भन्ने नारासहित आयाेजना गरिएकाे 'टुर डे दाङ भ्याली'मा रसाइली पनि सहभागी थिए। उनले यस्ता कार्यक्रमले स्वस्थ र मानसिक रुपमा बलियाे बन्न सघाउ पुग्ने बताए। वातावरणीय प्रभावका विषय तथा आफ्नाे स्थान चिनाउन पनि यस्ता कार्यक्रममा सबै पक्षले जाेड दिनुपर्ने रसाइलीलाई लाग्दाेरहेछ।
८७ किलोमिटर लामो यात्रामा रसाइलीसँगै विश्व साइकल यात्री पुष्कर शाह, मेची-महाकाली साइकल यात्री रेशम केसी, साइकलबाटै ७७ जिल्ला भ्रमण गरिसकेका एभरेष्ट बाबुसहित देशभरका करिब ५० जना सहभागी थिए। नेपालकाे झन्डा र झन्डा अंकित टिसर्टमा सहभागीकाे उत्साह र हाैसला देख्दा लाग्थ्याे, साइकल यात्राले दाङ मात्रै हाेइन सबैकाे मन र देश पनि जाेडेकाे थियाे।
साइकलको प्रयोगले वातावरणीय प्रभाव कम हुने, मानव जीवन स्वस्थ हुने हुँदा यसको प्रयोलाई बढावा दिन यस किसिमको कार्यक्रम आयोजना गरिएको आयोजकको भनाइ छ। साथै यो कार्यक्रमले प्रदेश ५ सरकारले सुरु गरेको 'लुम्बिनी भ्रमण वर्ष'लाई थप टेवा पुग्ने यात्रामा सहभागी साइकलिस्ट सतिस निरौलाकाे विश्वास छ।
दाङको पर्यटकीय र सांस्कृतिक सम्पदाकाे महत्व बुझाउनु साथै प्रचार-प्रसारमा टेवा पुगाेस् भन्ने उद्देश्यले 'टुर डे दाङ भ्याली'को आयोजना गरिएको जिल्ला साइकलिङ संघ दाङका अध्यक्ष रेशम केसीले बताए।
यात्रा कै क्रममा विश्व साइकल यात्री पुष्कर शाहले साइकल स्वस्थ रहनका साथै वातावरण प्रदुषणका दृष्टिले पनि निकै लाभदायक भएको बताए। तर, पछिल्लो समय 'स्मार्ट सिटी' बनाउने नाममा झारा टार्ने गरी सडक बनाइएकोमा उनले दुखेसो पोखे।
‘स्मार्ट सिटी भन्दैमा ठूला-ठूला घर अनि चौडा सडक मात्र हो र?, खोई पैदल मार्ग अनि सुरक्षित साइकल मार्ग?’, शाहकाे आक्राेश मिश्रित स्वर सुनियाे। उनले हरेक पालिका र सहरमा अब यसतर्फ ध्यान दिन सम्बन्धित पक्षलाई आग्रह पनि गरे।
'टुर डे दाङ भ्याली' (साइकल यात्रा)का सहभागीहरुले दाङको घोराहीबाट सिद्धरत्न नाथ चौधेरा, विश्वको अग्लो त्रिशुल रहेको धारापानी लगायतका पर्यटकीय एवं धार्मिक स्थलको परिक्रमा गर्दै करिब ८७ किलोमिटर यात्रा तय गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
