– गणेश पाण्डेय
लिस्वन- पाेर्चुगलकाे विली नोआ डे मिलफन्टेसमा कृषि क्षेत्रमा काम गर्ने २ नेपाली आप्रवासीहरूलाई अपहरण र आक्रमण गरेको अभियोगमा ४ जिएनआर सैनिकहरूलाई पक्राउ गरिएकाे छ।
सन् २०१८ अक्टोबरमा भएकाे साे घटनालाई लिएर पाेर्चुगल सरकारको न्यायिक प्रहरीले उनीहरुलाई पक्राउ गरेको हाे। एन्टिन्जो, ओदिमेरा र विला नोवा डे मिलफन्टेसमा त्यतिबेला सुरक्षामा खटिएका ४ जिएनआर सैनिकहरूलाई अपहरण, आक्रमण तथा दुर्व्यवहारको अभियोगमा बुधबार बिहान पक्राउ गरिएकाे हो।
कृषि क्षेत्रमा काम गरिरहेका दुई नेपाली आप्रवासी र कृषि मालिकको बीचमा भएको विवादमा जिएनआर सैनिकहरुले बिना कसुर शक्ति प्रदर्शन गरेको आरोप छ। नेपाली कामदार र कृषि माकिकको बीचमा विवाद हुँदा चिनजानको आधारमा कृषि मालिकको पक्षमा वकालत गर्दै नेपाली कामदारमाथि दुर्व्यवहार र शक्ति प्रदर्शन गरेकोले कारबाहीको लागि जिएनआर सैनिकहरुलाई पक्राउ गरिएको पोर्चुगलको न्यायिक प्रहरीले जनाएको छ।
आप्रवासी नेपालीहरुको बासस्थान पत्ता लगाएर रातिको समयमा अपहरण शैलीमा जिएनआर सैनिकहरुले दुर्व्यवहार गरेको र भौतिक आक्रमण गरेको उनीहरुमाथि आरोप लागेको छ। सुरुमा एक जना सैनिक मात्रै नेपाली कामदारको बासस्थानमा गएता पनि पछि उनले फोन गरेर अन्य ३ सैनिकहरुलाई बोलाएर नेपालीमाथि दुर्व्यवहार गरेका थिए। नेपाली कामदारको बचाउमा आएका अर्का नेपालीलाई समेत दुर्व्यवहार गरिएकाे बताइएकाेे छ।
न्यायिक प्रहरीले पिडित नेपालीहरु को-को थिए र कम्पनीका मालिक को हुन् भन्ने बारेमा केही खुलाएकाे छैन।
जिएनआरको ज्यादतिका सम्बन्धमा पीडितहरुले पोर्तुगलको न्यायिक प्रहरीमा उजुरी गरेपछि लामो समयको अनुसन्धान र प्रमाणको आधारमा बुधबार मात्रै उनीहरुलाई पक्राउ गरिएको हो।
पक्राउ गरिएका चारै जना जीएनआर सैनिकहरुलाई कारबाहीका लागि बिहीबार ओदिमेरा अदालतमा उपस्थित गराइँदैछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
