झापा– जब वर्षायाम लाग्छ, झापाको रतुवा खोला वरिपरिका बासिन्दाको निद्रा हराउँछ। यो विगत एक दुई वर्षअघि देखिको समस्या होइन। यहाँका बासिन्दाले लामो समयदेखि नै रतुवा खोलाको उपद्रो भोग्दै आएका हुन्।
वर्षौंपिच्छे सयौंलाई विस्थापित गर्ने यस खोलामा यहाँका बासिन्दा तटबन्ध बाँधिएको हेर्न चाहन्छन्। तर, यो विषय केवल राजनीतिक नारा र नेताका भाषणमा सीमित हुँदा उनीहरु निराश छन्। रतुवा मात्र होइन, कन्काइमाई, कमल, बिरिङ, अदुवा, मेची आदि खोलाले झापाका बासिन्दालाई बर्खैपिछे सताउने गरेको छ।
सामान्य नेताको कुरै छाडौँ। प्रतिष्ठित नेताले पनि जनताको दुःखमा साथ नदिँदा उनीहरुलाई ठूलै चोट परेको कुरा चुनावअघिको आक्रोशले स्पष्ट दर्शाउँछ।
'२०४८ सालकै चुनावताका रतुवा खोलाको ‘पाता फर्काउँछु' भन्ने नेकपा एमालेका नेता केपी शर्मा ओली पार्टी अध्यक्षदेखि प्रधानमन्त्रीसमेत भए तर आजसम्म यस खोलामा तटबन्ध बाँधिएको छैन। यो कस्तो विडम्बना हो, गरिब जनतामाथि,' कमल गाउँपालिका सडक छेउमा पसल गर्ने ४६ वर्षीय अनिल रसाइली आक्रोश पोख्छन्।
उनका अनुसार एमाले मात्र होइन सबै राजनीतिक दल र नेताको व्यवहारबाट जनता वाक्क छन्। उनी थप्छन्, 'चरम बेरोजगारीका कारण कतिपय युवा लागूपदार्थको दुव्यर्सनमा फसेका छन्। नेताहरु जिल्लामा उद्योगधन्दा निर्माण गर्ने, रोजगारी सिर्जना गर्ने कुरामा ध्यानै दिँदैनन्, केवल फोस्रा आश्वासन मात्र दिन्छन्।'
स्थानीय सरस्वती गिरी भन्छिन्, 'नेताले साना कुरै गर्दैनन्। देश विकासका गुड्डी हाँक्छन् तर चुनावपछि आफ्नो गाउँको विकास बिर्सन्छन्।'
झापाको पूर्व-पश्चिम राजमार्गको उत्तरतिरका गाउँमा थुप्रै समस्या रहेको गिरीले बताइन्। भन्छिन्, 'खै कसले हेरिदिन्छ, सुनिदिन्छ र साना मान्छेका कुरा?'
शिलान्यासलाई विकास भन्ने हो भने झापा धेरै विकसित
कमल गाउँपालिकाका चिया पसल सञ्चालक राजकुमार हलवाईका अनुसार शिलान्यासलाई विकास भन्ने हो भने झापा जति विकास अन्य कतै भएको छैन।
वाम र लोकतान्त्रिक गठबन्धनका साना-ठूला नेताले भोट तान्न अनेक उपाय गरेको देख्दा र सुन्दा उनी चकित छन्। हलुवाइ भन्छन्, 'चुनावको समयमा आफ्नो गाउँ र जिल्लालाई पानीपँधेरो बनाएका नेताले अरु बेला जनतालाई अँध्यारोमा राखेको अनुभूति हुन्छ।'
हात्ती धपाइदिने नेतालाई मात्र भोट
झापा चन्द्रगढी की वृद्धा वेदकुमारी घिमिरेले हात्ती धपाइदिने नेतालाई मात्र भोट दिने निर्णय गरेको सुनाइन्। 'बिहानै, बेलुकै आँगनमा हात्तीको लस्कर हिँड्छ। बिहान ६ बजेअघि घर माथिबाट झर्नै सकिन्न। कहिलेकाहीँ हारगुहार गर्दा प्रहरीले साइरन बजाएर हात्ती लखेटिदिन्छन्। तर, नेतालाई जनताका यस्ता समस्याबारे फिटिक्कै मतलब छैन,' घिमिरेले दुखेसो पोखिन्।
जथाभावी जग्गा प्लटिङले बस्ती डुबानमा
त्यसैगरी, विर्तामोडका रामजी दाहालले पनि आफ्नो क्षेत्रका विविध समस्या जानकारी गराउँदै भने, 'ठूला नेता नै अहिले रातदिन हिँड्ने सडकको बेहाल छ। उनीहरु केवल चुनावका बेला मात्र हिँड्छन्। तर स्थानीयले वर्षभरि सास्ती खेप्नुपर्छ।'
जिल्ला होचो भूभागमा अवस्थित भएर मात्र होइन भूमाफियाले जथाभावी जग्गा प्लटिङ गर्दा बस्ती डुबानमा परेको उनको बुझाइ छ। उनले भने, 'बिरिङ, अदुवा, कन्काइमाइ, निन्दा खोलाको बाढीले वर्षैपिछे हजारौँ विस्थापित हुन्छन्, सुकुम्वासी हुन्छन्।'
झापामा एमाले अध्यक्ष एवं पूर्व प्रधानमन्त्री ओली मात्र नभई कांग्रेस नेता कृष्णप्रसाद सिटौला, कांग्रेसकै युवा नेता विश्वप्रकाश शर्मा, पूर्व सञ्चारमन्त्री एवं माओवादी केन्द्रका नेता राम कार्की, राप्रपाका राजेन्द्र लिङ्देन जस्ता नाम चलेका नेता चुनावी मैदानमा छन्। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
