काठमाडौं- निजी हवाई सेवा प्रदायक कम्पनी हिमालय एयरलाइन्सले त्रिभुवन अन्तर्राष्ट्रिय विमानस्थल कार्यालयलाई बुझाउनुपर्ने बक्यौता झन्डै २५ करोड रुपैयाँ पुगेको छ। विमानस्थल सेवा शुल्क बापतको बक्यौता रकम यति धेरै भइसक्दा पनि हिमालयले विमानस्थल कार्यालयलाई बारम्बार लिखित प्रतिबद्धता गर्दै झारा टार्ने काम गर्दै आएको छ। हिमालयले पुसयता मात्रै ४ पटक प्रतिबद्धता जनाइसकेको छ।
विमानस्थल कार्यालयका अनुसार हिमालयको मार्चसम्मको बक्यौता २३ करोड नाघिसकेको थियो। अप्रिल महिनाको बिलसमेत जोड्दा तिर्नुपर्ने रकम २५ करोडजति पुग्ने विमानस्थल कार्यालयका प्रमुख राजकुमार क्षेत्री बताउँछन्। उनका अनुसार वर्षदिनको समयमा हिमालयले साढे ६ करोड मात्रै तिरेको छ।
हिमालयले शुक्रबार १ करोड रुपैयाँ तिर्ने र मासिक ७५ लाखका दरले किस्तामा रकम तिर्दै जाने लिखित प्रतिबद्धता गरेको क्षेत्री बताउँछन्। ‘अब हामीले अन्तिम एक पटक मौका दिएका छौं। भोलि शुक्रबार एक करोड रकम दाखिला नगरे प्रत्येक उडानमा एक घन्टाका दरले जहाज ग्राउन्डेड हुन्छ,' क्षेत्रीले भने। तर, क्षेत्रीको यो भनाइ मंसिरदेखिको हो। तर, प्रधानमन्त्रीका रुपमा केपी ओली आएपछि हिमालयले विमानस्थल सेवा शुल्क बापतको रकम तिर्नै छोड्यो (हिमालय एयरलाइन्ससँग प्रधानमन्त्रीको कनेक्सन)।
हिमालयले सन् २०१८ को जुलाईदेखि विमानस्थल सेवा शुल्क बापतको रकम दाखिला नगरेको विमानस्थल कार्यालयले बताएको छ।
यसअघि विमानस्थल कार्यालयको ताकेतासँगै हिमालयले पुस २९ गते १० लाख रुपैयाँ रकम तिर्दै बाँकी रहेको बक्यौता रकम १० दिनभित्र तिर्ने लिखित प्रतिबद्धता गरेको थियो। तर, सो लिखित प्रतिबद्धता पनि उल्लंघन गरेको थियो।
पुससम्ममा एयरलाइन्सले विमानस्थल कार्यालयलाई तिर्नुपर्ने शुल्क लामो सयमदेखि नतिर्दा १४ करोड १ लाख ७५ हजार रुपैयाँभन्दा बढी भएको थियो। अहिले यो रकम बढेर साँवा, ब्याज र जरिवानसहित २५ करोडको हाराहारीमा पुगेको हो।
पुसमा गरेको लिखित प्रतिबद्धता अनुसार हिमालयले १० दिनमा बक्यौता रकम नतिरेपछि फेरि विमानस्थल कार्यालयले माघ ४ गते थप एक महिनाको समय उपलब्ध गराएको थियो। उक्त समयमा रकम दाखिला नगरेपछि पुनः फागुनको पहिलो सातासम्म बक्यौता चुक्ता नगरे जहाज ग्राउन्डेड गरिदिने भन्दै कार्यालयले चेतावनीपत्र काटेको थियो। तर, शेर्पाले शक्तिको दुरुपयोग गर्दै त्यसअघि बक्यौता रकम तिर्न आलटाल गर्दै आएका थिए।
विमानस्थल कार्यालयको चेतावानीपत्रपछि हिमालयले १४ दिनभित्र बक्यौता रकम तिर्ने भन्दै लिखित प्रतिबद्धता गरेको थियो। तर, कार्यालयले १४ दिनको सट्टा एक महिनाकै समय दिएको थियो। त्यसबीचमा फागुन १५ गते हिमालय एयरलाइन्सका मालिक आङछिरिङ शेर्पाको ताप्लेजुङका भएको हेलिकोप्टर दुर्घटनामा परी ज्यान गयो। शोकमा रहेको एयरलाइन्स कम्पनीलाई पनि विमानस्थल कार्यालयले चैत महिनाभित्र कुनै ताकेता गरेन। तर, चैत महिना बितिसक्दा पनि हिमालयले रकम नतिरेपछि पुन: बक्यौता रकम चुक्ता गर्न भन्दै कार्यालयले हिमालयलाई पत्र काटेको थियो।
पत्रपछि हिमालयका चिनियाँ मालिक समेत छलफलमा उपस्थित भएको क्षेत्री बताउँछन्। उनीसँगको छलफलमा भोलि शुक्रबार १ करोड रुपैयाँ तिर्ने र मासिक ७५ लाख रुपैयाँका दरले पुरानो विमानस्थल सेवा शुल्क बापतको रकम तिर्दै जाने लिखित प्रतिबद्धता भएको उनको भनाइ छ। साथै मासिक रुपमा आउने बिल भने समयमै तिर्ने सहमति भएको उनको भनाइ छ। हिमालयको अहिले मासिक साढे १ करोडको हाराहारीमा बिल आउने गरेको छ।
विमानस्थल कार्यालयका प्रमुख क्षेत्रीलाई हिमालय एयरलाइन्सले बक्यौता चुक्ता नगरेको अवस्थामा जहाज ग्राउन्डेड गराउनैपर्ने बाध्यता पनि छ। तत्कालीन शतप्रतिशत स्वदेशी लगानीमा रहेको सौर्य एयरलाइन्सले विमानस्थल कार्यालयलाई ४ करोड बक्यौता तिर्न नसक्दा क्षेत्रीले पुस २० गतेदेखि सौर्यको जहाज ग्राउन्डेड गराइदिएका थिए। त्यति मात्रै होइन उनले लामो समयदेखि बक्यौता चुक्ता नगर्ने मलेसियन निजी हवाई सेवा प्रदायक कम्पनी एयर एसियाको उडान बन्द गराउनुपर्ने अवस्थामा पुर्याइदिएका थिए। एयर एसियासँग कार्यालयले ४० करोड रुपैयाँमध्ये साँवा बापतको २७ करोड रुपैयाँ असुली गरेको थियो।
नेपाल–चीन संयुक्त लगानीमा २०१४ अगस्टमा स्थापित हिमालय एयरलाइन्सले अन्तर्राष्ट्रिय हवाई सेवा प्रदान गर्दै आएको छ। उसले कात्तिक १ गतेदेखि काठमाडौं–चोङकिङ (चीन) मा चार्टर उडानमार्फत सिधा उडान गरिरहेको छ।
यसबाहेक मलेसियाको क्वालालम्पुर, साउदी अरबको दमाम, युएईको दुबई र कतारको दोहामा नियमित उडान गर्दै आएको छ।
हिमालयसँग अहिले ३ वटा एयरबस छ। एउटा एयरबस भने भाडामा दिने तयारीसमेत गरिरहेको छ।
पढ्नुस् सम्बन्धित समाचार
२० करोड बक्यौता टार्ने चलखेलमा हिमालय एयरलाइन्सका आङछिरिङ शेर्पा
हिमालय एयरलाइन्सलाई विमानस्थल कार्यालयले काट्यो पत्र, रकम चुक्ता नभए ग्राउन्डेड
विमानस्थल बक्यौता : ५० लाख तिर्दै हिमालयले माग्यो १० दिनको समय
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
