काठमाडौं- उपत्यकाका नदी र चक्रपथ सफाइमा प्रतिनिधिसभा र प्रदेशसभा निर्वाचनको प्रभावले कम उपस्थिति हुन थालेको छ।
सफाइमा आउने अभियन्ता मतदानका लागि बाहिरिएका छन्। सुरक्षाकर्मी पनि चुनावमा केन्द्रित भएकाले धेरै ठाउँमा तीनवटै सुरक्षा निकाय सहभागी भएनन्। कम सहभागिता भए पनि आज उपत्यकाका नदी र चक्रपथ सफाइबाट ३६ मेट्रिक टन फोहर व्यवस्थापन गरियो।
बागमती सफाइ महाअभियानको २३७ औँ हप्तामा आज पशुपतिनाथ राममन्दिर अघिको नदी किनारमा सफाइ गरी ५ मेट्रिक टन फोहर व्यवस्थापन गरियो।
सफाइमा अधिकार सम्पन्न बागमती सभ्यता एकीकृत विकास समिति, काठमाडौँ महानगरपालिका, तिलगंगा महिला समूह लगायत संस्थाका ४ सयभन्दा बढीको सहभागिता रहेको बागमती सफाइ महाअभियानका अभियानकर्मी एवं अधिकार सम्पन्न बागमती एकीकृत विकास समितिकी सञ्चालक समिति सदस्य माला खरेलको भनाइ छ।
गुह्येश्वरीमाथिको बागमती सफाइको १९७ औँ हप्तामा आज हनुमान घाट र गोठाटार पुल वरपर सफाइ गरी दुई मेट्रिक टन फोहर व्यवस्थापन गरियो। सफाइमा राम्रो जोरपाटी, हाम्रो जोरपाटी र पुडासैनी मैत्री समाज लगायत संस्थाका गरी एक सय जनाभन्दा बढी अभियानकर्मीको सहभागिता थियो।
रुद्रमती सफाइको १९३ औँ हप्तामा आज रातोपुल–सेतोपुल–मैतीदेवी हुँदै वेलकेयर अस्पतालसम्म सफाइ गरिएको रुद्रमती सरोकार समाजका उपाध्यक्ष रोहित गिरीले बताए। सफाइबाट एक मेट्रिक टन फोहर व्यवस्थापन भयो।
महानगरपालिका वडा नं ३० का अध्यक्ष दलबहादुर कार्की लगायत २५० भन्दा बढी अभियानकर्मीको सफाइ अभियानमा सक्रियता थियो।
विष्णुमती सफाइको १६५ औँ हप्तामा टोखा तारकेश्वर नगरपालिकाको मनमैजुस्थित नयाँ पुलमा सफाइ गरी १० मेट्रिक टन फोहर व्यवस्थापन गरियो। सफाइमा ३५० जनाभन्दा बढी अभियन्ताको सहभागिता रहेको अभियानकर्मी विवेक उप्रेतीले जानकारी दिए।
मनोहरा नदी सफाइको ३५ औँ हप्तामा आज बिपी आँखा अस्पताल क्षेत्र वरपर सफाइ गरी दुई मेट्रिक टन फोहर व्यवस्थापन गरियो।
चक्रपथ सफाइको ३३ औँ हप्तामा बालाजु चोक–माछापोखरी हुँदै गंगाहलसम्म सफाइ गरी पाँच मेट्रिक टन फोहर व्यवस्थापन गरियो। ग्रिनहिल सिटी अस्पतालको संयोजनमा भएको सफाइमा १५० भन्दा बढी अभियन्ताको सहभागिता थियो।
प्रतिनिधिसभा र प्रदेशसभा निर्वाचनको सुरक्षामा केन्द्रित हुनुपरेकाले नेपाली सेना, नेपाल प्रहरी र सशस्त्र प्रहरीको उपस्थिति नरहेको अभियन्ता लोकबहादुर टण्डनले जानकारी दिए।
कलंकीचोकमा वर्षौँदेखि कुहिएर बसेको फोहर आज काठमाडौँ महानगरपालिका वातावरण विभागको सहयोगमा गाडील्याई व्यवस्थापन गरिएको छ। सफाइ गरिएको फोहरमध्ये ६ मेट्रिक टन महानगरपालिका र ४ मेट्रिक टन नेप्सेम्याक प्रालिले व्यवस्थापन गरेका थिए।
२०७० जेठ ५ गते शनिबारदेखि बागमती सफाइ महाअभियान सुरु भएपछि देशभर सफाइ गर्ने जागरण आएको छ। अहिलेसम्म ४२ स्थानमा सफाइ भइरहेको महाअभियानले जनाएको छ।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781922122.jpg)
-1764146706.png)
