काठमाडौं- केही समय पहिले काठमाडौं महानगरपालिका-६ बौद्धका होमनाथ खतिवडाको मोटरसाइकल चोरी भयो।
तत्कालै उनले ट्राफिक प्रहरी कार्यालयमा उजुरी गरे।
खोजी तथा अनुसन्धान गर्दै जाँदा मोटरसाइकल फेला पर्यो। ट्राफिक प्रहरीले आवश्यक प्रक्रिया पुर्याई मोटरसाइकल खतिवडालाई बुझायो। दैनिक काम समेत अवरुद्ध भइरहेको अवस्थामा प्रहरीबाट मोटरसाइकल पाएपछि उनले खुशी व्यक्त गरे।
000
धादिङ सेर्तुङ-३ निवासी बेमान तामाङको मोटरसाइकल त्यसैगरी चोरी भयो। मोटरसाइकल चोरी भएपछि दैनिक रुपमा काम गर्न निकै समस्या पर्यो उनलाई। प्रहरीमा उजुरी दिए।
ट्राफिक प्रहरीले खोजी तथा अनुसन्धान गर्दै जाँदा चोरी गरी लुकाएर राखेको स्थानबाट मोटरसाइकल फेला पर्यो। हराएर पाउने आशा मारेको मोटरसाइकल पाएपछि उनी अझ बढी खुशी भए।
चोरी भएको मोटरसाइकल यसरी फेला पर्छ भन्ने नलागेको बताउने उनले भने, ‘प्रहरीले गरेको काम देखेपछि प्रहरीप्रति विश्वास बढेर गयो।’
000
खतिवडा र तामाङजस्तै धेरैको मोटरसाइकल चोरी हुने गरेको छ। चोरीका घटना रोकथाम गर्न महानगरीय ट्राफिक प्रहरी महाशाखा रामशाहपथले कार्ययोजना नै बनाएर काम गर्न थालेको छ।
यस सम्बन्धमा महाशाखाका प्रमुख प्रहरी वरिष्ठ उपरीक्षक वसन्तकुमार पन्त भन्छन्, ‘चोरी भएका मोटरसाइकल खोजतलासको काममा पीडित सहायता इकाईका प्रहरी कर्मचारीहरू सादा पोसाकमा खटिन्छन्। शंकास्पद मोटरसाइकल जाँच गर्ने, वर्कसपमा चेक गर्ने, इन्जिन तथा चेसिस नम्बर जाँच गरी रुजु गर्ने र चोरीको हो वा होइन पत्ता लगाउने गरिन्छ। पीडितको निवेदनको आधारमा कम्प्युटर फाइलमा इन्जिन नम्बर तथा चेसिस नम्बरको खोजी समेत गरिन्छ। यसबाट हराएको र नहराएको एकिन हुन्छ।’
विशेषगरी, लक भाँचिएको, वायरिङका तारहरु यत्रतत्र छरिएको अवस्थामा भेटिएको मोटरसाइकल बारेमा थप अनुसन्धान हुन्छ। मोटरसाइकल बढी मात्रामा चोरी हुने स्थानमा निगरानी गर्ने, शंकास्पद व्यक्तिलाई नियन्त्रणमा लिने र कानूनी कारबाही गरिन्छ। समयसमयमा सचेतनामूलक पर्चा वितरण पनि गर्ने गरिन्छ।
धेरैजसो अवस्थामा साँझ र रातको समयमा घर कम्पाउन्डको ताला फुटाएर मोटरसाइकल चोरी हुने गरेको भेटिने गरेको प्रहरीको अनुभव छ।
चोरीका मोटरसाइकल प्रायशः दुर्गम बस्तीमा घाँस दाउरा बोक्न, दुध ओसारपसार गर्ने काममा प्रयोग हुने गरेका छन्। राजधानीका मोटरसाइकल दुर्गम जिल्लामा लगेर नक्कली ब्लुबुक बनाएर चलाउने, नयाँ मोटरसाइकलको पाटपूर्जा खोली पुराना सक्कली मोटरसाइकलमा राख्ने र काम नलाग्ने पार्टपूर्जा बेवारिसे अवस्थामा फाल्ने गरेकाले पनि मोटरसाइकल फेला पार्न समस्या देखिएको प्रहरीको भनाइ छ।
चोरी हुनबाट बच्न ह्विललक, डिसलक, ब्रेकलक, फ्युललक लगाउन अल्छी नमान्ने र सम्भव भएसम्म जिपिएस ट्रयाकरलगायतका उपकरण जडान गरी मोटरसाइकल चोरीबाट सुरक्षित रहन सकिने प्रहरी वरिष्ठ उपरीक्षक पन्त बताउँछन्।
चालू आर्थिक वर्षमा ३ हजारभन्दा बढी मोटरसाइकल चोरी
चालु आर्थिक वर्षको पहिलो आठ महिनाको अवधिमा काठमाडौं उपत्यकालगायत विभिन्न जिल्लाबाट १ हजार ३ सय ९८ वटा मोटरसाइकल चोरी भएको प्रहरीको तथ्याङ्क छ।
तीमध्ये ३ सय ७६ वटा मोटरसाइकल फेला परेका छन्। फेला परेकामध्ये २ सय ६३ मोटरसाइकल सम्बन्धित व्यक्तिलाई तथा ९९ वटा मोटरसाइकल भन्सार कार्यालयमा बुझाएको छ। बाँकी ३० वटा मोटरसाइकल सम्बन्धित व्यक्तिलाई बुझाउन बाँकी छन्।
चोरीमा संलग्न ६९ जनालाई प्रहरीले पक्राउ गरी आवश्यक कानूनी कारबाही गरेको छ।
यसैगरी आर्थिक वर्ष २०७४/०७५ मा १ हजार ६ सय ३४ वटा मोटरसाइकल चोरी भएका थिए। तीमध्ये ४ सय ८१ वटा मोटरसाइकल प्रहरीले फेला पार्न सफल भएको थियो।
३ सय ४१ वटा मोटरसाइकल सम्बन्धित व्यक्तिलाई बुझाएको थियो भने ८३ वटा मोटरसाइकल भन्सार कार्यालयमा बुझाएको थियो। बाँकी ८९ वटा मोटरसाइकल सम्बन्धित व्यक्तिलाई बुझाउन बाँकी छन्। ट्राफिक प्रहरीले ४२ जनालाई पक्राउ गरी आवश्यक कानूनी कारबाही गरेको थियो।
काठमाडौंको बौद्ध, जोरपाटी, पेप्सीकोला, बानेश्वर, कोटेश्वर, चावहिल, गौशाला, महाराजगञ्जस्थित शिक्षण अस्पताल वरपर, बुढानीलकण्ठ, ठमेल, सुन्धारा, बालाजु, कलंकी, पुल्चोक, ग्वार्को, जावलाखेल र लगनखेलबाट बढी मात्रामा मोटरसाइकल चोरी हुने गरेका छन्।
उपत्यकाबाहिरका बिर्तामोड, दमक, विराटनगर, धरान, इनरुवा, सप्तरी, रौतहट, कास्की, रुपन्देही, सुर्खेत र कैलाली लगायतका विभिन्न ठाउँबाट बढी मात्रामा मोटरसाइकल चोरी हुने गरेको ट्राफिक प्रहरीले जनाएको छ।
यस्तो छ चोरीमाथिको कारबाही व्यवस्था
मुलुकी फौजदारी (संहिता) ऐन २०७४ को परिच्छेद २०, धारा २४१ को कसुरमा मोटरसाइकल चोरी गर्ने वा गराउने व्यक्तिलाई सोही परिच्छेदको धारा २४२ अन्तर्गत २ वर्षदेखि ७ वर्षसम्म कैद र २० हजार रुपैयाँदेखि ७० हजार रुपैयाँसम्म जरिवाना हुने प्रावधान छ।
चोरी भएका मोटरसाइकल ट्राफिक प्रहरीले सक्रिय भएर खोजी तथा अनुसन्धान गरी सम्बन्धित धनीलाई बुझाउँदै आएको छ। चोरीमा संलग्न व्यक्तिलाई कानूनी कारबाही गर्दै आएको छ। साथै मोटरसाइकल चोरीलाई रोकथाम गर्न विभिन्न ठाँउमा खटिएर डिउटी गर्ने ट्राफिक प्रहरीले जथाभावी पार्किङ नगर्न आग्रह गर्दै आएको छ।
मोटरसाइकल चोरी हुनुभन्दा पहिले स्वयं धनी सचेत भएमा चोरीमा कमी आउने ट्राफिक प्रहरीको अपेक्षा छ। मोटरसाइकल चोरी गर्दै गरेको अवस्थामा समेत ट्राफिक प्रहरीले फेला पारी पक्राउ गरेको छ।
चोरी भएमा जति छिटो ट्राफिक प्रहरीलाई खबर गर्यो त्यति नै छिटो मोटरसाइकलको खोजी तथा अनुसन्धान हुने प्रहरीको भनाइ छ।
(यो सामग्री प्रहरी प्रधान कार्यालयबाट प्राप्त बुलेटिनका आधारमा तयार पारिएको हो।)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771045886.png)
-1764146706.png)
-1770562345.jpg)
