दुनै, डोल्पा- प्रदेशसभा र प्रतिनिधिसभाको निर्वाचनको मुखमा जिल्लाको सुरक्षा व्यवस्था कडाइ गरिएको छ।
निर्वाचन नजिकिँदै गर्दा जिल्लाको सुरक्षा व्यवस्थालाई विशेष ध्यान दिँदै विभिन्न समूहले गर्ने निर्वाचन विरोधी गतिविधिप्रति पूर्वसतर्कता अपनाउन जिल्लाको सुरक्षा व्यवस्था कडाइ गरिएको प्रमुख जिल्ला अधिकारी केशवराज आचार्यले जानकारी दिए।
प्रजिअ शर्माका अनुसार जिल्लाका तीन वटा मुख्य नाकामा विशेष चेकजाँच सुरु गरिएको छ। जिल्लाको त्रिवेणी, चौंरीकोट, होर्त खोलामा विशेष चेकजाँच सुरु गरिएको हो। आसन्न प्रदेशसभा र प्रतिनिधिसभाको निर्वाचनलाई शान्तिपूर्ण, निष्पक्ष र मतदाताले स्वतन्त्रपूर्वक मतदान गर्ने वातावरणको सिर्जना गर्न लागिपरेको प्रजिअ शर्माले जानकारी दिए।
तीनवटै निकायका सुरक्षाकर्मी पर्याप्त मात्रामा भएकाले परिचालन पनि विशेष तरिकाले गरिएको उनको भनाइ छ। १८ हजार ९८९ मतदाता रहेको डोल्पामा ६६ वटा मतदान केन्द्र रहेका छन्। त्यसमा ३३ मतदान केन्द्र अति संवेदनशील, १२ वटा संवेदनशील र १५ वटा सामान्य रहेको समेत जिल्ला प्रशासन कार्यालयले जानकारी दिएको छ।
उक्त मतदान केन्द्र सुरक्षा तथा भौगोलिक कठिनाइका हिसाबमा अति संवेदनशील र संवेदनशीलको सूचीमा राखिएको कार्यालयको भनाइ छ। विप्लव माओवादीको प्रभाव क्षेत्र मानिएको तल्लो डोल्पा र काइके गाउँपालिकामा विशेष सुरक्षा व्यवस्था परिचालन गरिएको समेत बताइएको छ।
देशका विभिन्न जिल्लामा निर्वाचन आचारसंहिता उल्लङ्घनका घटना सार्वजनिक भइरहँदा डोल्पामा भने एउटा पनि उजुरी नपरेको मुख्य निर्वाचन अधिकृत रमेशप्रसाद ज्ञवालीले जानकारी दिए। डोल्पामा आसन्न निर्वाचनका लागि ६६ मतदान केन्द्रका लागि ४३० जना कर्मचारी खटाइएको उनले बताए।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
