काठमाडाैं- काठमाडौंको खुलामञ्च अतिक्रमणको विरोधमा आन्दोलन सुरु गरिएको छ।
काठमाडौं महानगरपालिकाको मिलेमतोमा खुलामञ्च अतिक्रमण गरिएपछि त्यसको विरोधमा स्थानीयबासी र सम्पदाप्रेमीहरुले आन्दोलन सुरु गरेका हुन्। बिहीबार बिहान खुलामञ्चमै उपस्थित भएर विरोध प्रदर्शनमा उत्रिएका उनीहरुले त्यहाँ बनाएका सटरहरु पनि बन्द गराएका थिए। खुला मञ्च खुला गर्न काठमाडौं महानगरपालिकासँग माग गर्दै उनीहरुले आफूहरुको माग तत्काल सम्बोधन नभए महानगरपालिकाविरुद्ध कडा आन्दोलन गर्न बाध्य हुने चेतावनी पनि दिएका छन्।
खुलामञ्च अतिक्रमण हुँदा पनि काठमाडौं महानगरपालिकाले वास्ता नगरेपछि त्यसको विरोधमा स्थानीय आफैं आन्दोलनमा आउनु परेको असनका योगेशकुमार खड्गीले बताए। उनले जनताबाट निर्वाचित निकाय काठमाडौं महानगरपालिकाले समेत कमिसनमा खुलामञ्च अतिक्रमणमा सघाउ पुर्याएपछि स्थानीय जनता त्यसको विरोधमा स्वतस्फुर्त सहभागी भएको पनि स्पष्ट पारे।
साे क्रममा 'मासेर जनताकाे जमिन उम्कन्छाै कति दिन?', 'जनताले चुनेर जनप्रतिनिधि बनायाे, खुलामन्चमा अहिले भ्रष्टाचार गन्हायाे' लगायतका पम्प्लेट प्रदर्शन गरिएकाे थियाे।
कांग्रेस नेता एवम् काठमाडौं क्षेत्र नम्बर ७ का सांसद भिमसेनदास प्रधानसहितको उपस्थितिमा भएको विरोध प्रदर्शनमा खुला क्षेत्र अतिक्रमण गरेर काठमाडौं महानगरपालिकाले खुलामञ्चमा बसपार्क र सटर सञ्चालन गर्न अनुमति दिएकोे भन्दै आक्रोश व्यक्त गरेका थिए। उनीहरुले खुला मञ्च अतिक्रमण गर्न दिएको भन्दै काठमाडौं महानगरपालिकाका मेयर विद्यासुन्दर शाक्यको चर्को आलोचना गर्दै नाराबाजी गरेका थिए।
काठमाडौं महानगरपालिका र ठेकेदार कम्पनी जलेश्वर स्वच्छन्द बिकोईले खुलामञ्च अतिक्रमण गरी सटर बनाई व्यापारीहरुलाई भाडामा दिएपछि स्थानीय र सम्पदाप्रेमीहरुले ‘खुलामञ्च खुला राखौं’ अभियान सुरु गरेका हुन्।
ठूलो क्षेत्रफलमा रहेको काठमाडौंको सबैभन्दा ठूलो खुला क्षेत्र खुलामञ्चमा हाल बसपार्क चलाइएको छ। पूरानो बसपार्कमा व्यापारिक टावर बनाउन दिएर काठमाडौं महानगरपालिकाले खुलामञ्चलाई ठेकेदारको जिम्मामा छाडेपछि स्थानीय आक्रोशित हुँदै आएका छन्। ४० वटा नयाँ सटर निर्माण गरी नियम, मापदण्ड र सहमति विपरीतका गतिविधि त्यहाँ भएपछि त्यसको विरोध गरिएको हो। स्थानीयले सो सटर डोजर लगाएर नहटाएसम्म आन्दोलन जारी राख्ने चेतावनी पनि दिएका छन्।
स्थानीयले खुलामञ्च अतिक्रमण तत्काल रोक्न र त्यहाँ निर्माण गरिएका अस्थायी सटर तत्काल हटाउन माग गर्दै काठमाडौं महानगरपालिकाका मेयर शाक्यलाई ज्ञापनपत्र बुझाउने तयारी पनि गरेका छन्।
.jpg)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
