काठमाडौं- पुरानो बसपार्क क्षेत्रमा अहिले ढल फुटेर दुर्गन्धित हुँदा आवतजावत गर्न बटुवालाई कठिनाइ भएको छ।
काठमाडौं महानगरपालिकाले समयमै ध्यान नदिँदा बटुवा नाक थुनेर हिँडडुल गर्न बाध्य छन्। ढल फुटेर दुर्गन्धित हुन थालेको तीन महिनाभन्दा बढी समय भएको छ।
पुरानो बसपार्कमा भ्यु टावर बन्ने भएपछि खुलामञ्चको केही भागलाई अस्थायी बसपार्कका रुपमा सञ्चालन गरिएको थियो। स्थानान्तरणसँगै उपत्यका भित्र र बाहिरसमेत आवतजावत गर्ने प्रमुख स्थलका रुपमा रहेको सो स्थान अव्यवस्थित बन्न पुगेको छ।
तीन महिनादेखि महानगरपालिकाको वडा नं २८ मा पर्ने खुलामञ्च पुरानो बसपार्क क्षेत्रबाट ढल फुटेर सडकमा बग्दा महानगर लगायत सम्बद्ध कुनै सरोकार निकायको चासो जान सकेको छैन।
सडक र पैदलमार्ग माथिबाट ढलको कालो लेदो बग्दा सो माथि टेक्दै हिँड्नुपरेको भक्तपुर सूर्यविनायककी राममाया कोजुले गुनासो गरिन्। बसपार्कको खुलामञ्च, सैनिक मञ्चतिरको भागबाट ढल बगिरहेको देखिन्छ।
वीर अस्पतालको आवासीय भवनअघिको पैदलमार्गमा पनि ढल फुटेर हिँडडुल गर्न नसकिने भएको उपचारका लागि मकवानपुरबाट आउनुभएका रञ्जित तामाङले बताए।
महानगरपालिकाले चार दिनअघि नै फुटेको ढल पुनःनिर्माणका लागि लगत अनुमान गरे पनि काम सुरु नभएको स्थानीयवासी बताउँछन्। महानगरपालिकाकी उपप्रमुख हरिप्रभा खड्गी श्रेष्ठले १० दिनभित्र ढल व्यवस्थित गरिने बताइन्।
'पाँच दिनअघि रत्नपार्क क्षेत्रलाई धुलोमुक्त गर्न के गर्नुपर्छ भनी स्थलगत रुपमा अध्ययन गर्न जाने क्रममा मैले बसपार्कअघि ढल बगेको देखेँ, भोलिपल्ट नै महानगर निर्माण विभागलाई लगत अनुमान तयार गरी ढल बन्द गर्न निर्देशन दिइएको छ,' उनले भनिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
