काठमाडौं- जिल्ला अध्यक्ष र सचिवको नामावली सार्वजनिक गर्ने भनिएसँगै सत्तारुढ दल नेपाल कम्युनिस्ट पार्टी (नेकपा) ले आयोजना गरेको कम्युनिस्ट पार्टीको ७०औं स्थापना दिवस बहुप्रतिक्षित थियो।
सचिवालय बैठकले आइतबार साँझ टुङ्गाएको नामावली सार्वजनिक कार्यक्रममा प्रकाशमा ल्याउने पूर्व निर्धारित तयारी थियो। सोही अनुरुप प्रज्ञा प्रतिष्ठान कमलादीमा एमालेका नेता तथा कार्यकर्ताको भिड बढेको थियो।
पदाधिकारीका लागि मात्रै मञ्चमा कुर्ची उपलब्ध गराउने गरी नेकपाले आसनस्थल बनाएको थियो। पदाधिकारी मध्य पूर्व प्रधानमन्त्री झलनाथ खनाल, प्रवक्ता नारायणकाजी श्रेष्ठ, नेताहरु वामदेव गौतम, रामबहादुर थापा, इश्वर पोखरेल केही छिटो कार्यक्रम हल प्रवेश गरेका थिए।
अध्यक्षद्वय केपी शर्मा ओली र प्रचण्डसँगै वरिष्ठ नेता माधवकुमार नेपाल र महासचिव विष्णु पौडेल मञ्चमा पुगेसँगै कार्यक्रम सुरु भएको थियो। जिम्मेवारीमा आएका नयाँ जिल्ला अध्यक्ष र सचिवको नामावलीसहित उपस्थित महासचिवले कार्यक्रम सञ्चालन गरेका थिए।
आसन ग्रहण सकिएसँगै महासचिवसँग नामावली हेरेका वरिष्ठ नेता माधव नेपाल केही समय नबित्दै बाहिरिए। उनले अध्यक्षद्वयको भाषण सुनेनन्।
पहिलो वक्ताका रुपमा रहेका प्रचण्डले कम्युनिस्ट पार्टीको विगतदेखि वर्तमान र एकीकरणका विषयमा बढी समय खर्चिए। पार्टी एकिकरणले मूर्तता नपाउनुमा उनले जिल्ला नेतृत्वको गाँठो मुख्य समस्या भएको उल्लेख गरेका थिए। जिल्ला नेतृत्व नटुगिंदा गाँठो झन कस्सिदै गएको उनको बुझाइ थियो। ‘राम्रो होस् भनि ढिलो गरेको झन गाँठो कस्सिँदै गयो । हामी पछि फर्केर सर्वसहमतिमा निर्णय गर्यौं।’
प्रतिपक्षी दल नेपाली प्रचण्डले कुनै नकरात्मक अभिव्यक्ति दिएनन्। तर, अर्का अध्यक्ष ओलीले कांग्रेसप्रति कटाक्ष बढी गरे। प्रतिपक्षी दलको कटु आलोचक ओलीले कस्ता अभिव्यक्ति दिए।
उनकै बोली जस्ताको तस्तै
-नेपाली कांग्रेसले २००८ मा एकल सरकार बनेपछि राणाका कुरा सुनेर कम्युनिस्ट विरुद्ध खनिने काम गर्यो । कम्युनिस्ट पार्टीलाई प्रतिवन्ध लगाउने काममा सहयोग गर्यो। प्रगतिशील शक्तिसँग सहकार्य नगर्ने बानी कांग्रेसले अहिलेसम्म सच्चाएको छैन।
-यदि कांग्रेस जनवादी शक्ति हो भने लोकतान्त्रिक शक्तिसँग सहकार्य गर्नुपर्छ। प्रतिक्रियावादी शक्तिसँग होइन।
-अचम्म लाग्छ, कांग्रेस कहाँ पुग्यो। कांग्रेसका धेरै नेताहरु राजतन्त्र फर्काउन सपना देखेर हिडेका नेताहरु देख्दा विचित्र लाग्छ। कुनै पनि लोकतन्त्रवादीले जन्मसिद्ध श्रेष्ठताको आधारमा मेरो शासक जन्मेका कारणले भइदेउ भन्न सक्दैन। जन्मकै आधारमा श्रेष्ठता दिनेहरुले लोकतान्त्रिक हुँ भन्न छोडे हुन्छ।
-पृथकतावादीलाई मूलधारको राजनीति गर्छु भनी कबुलमा ल्याएका छौं। केही शक्तिहरु त्यसबाट छटपटाएका छन्।
-हरेक दिन नेपाल एक कदम अघि बढेको छ। जेष्ठ नागरिकको बिमा अभियान सुरु गर्यौं। भर्ना अभियान जारी छ। बैशाख १ बाट सबै नागरिकको बैंक खाता सुरु गर्यौं। कृषि क्षेत्रलाई आधुनिकीकरण गर्ने कार्य सुरु गरेका छौं। लगानी सम्मेलन गर्यौ। लगानीको अब समस्या छैन।
-काम भएको केही काम नदेख्ने? कन्धारीले आँखामा पट्टी बाँधे जस्तै। आग्रहको पट्टी बाँधेपछि केही पनि भएको देखिँदैन। तर, तथ्य र आँकडाले देखाँउछ यसैवर्ष ४ करोडका झलुङे पुल बनेका छन्। ४० वटा तुइन विस्थापित भएका छन्। ८ सय किलोमिटर बाटो कालोपत्रे भएको छ।
-अर्थतन्त्र अत्यन्तै नाजुक भएकाले गत वर्ष वृद्धभत्ता बढाउन सकिएन। अर्थतन्त्र अत्यन्तै नाजुक अवस्थामा पुर्याइएको थियो। अर्थतन्त्रलाई ठीक बाटोमा ल्याइएको छ। यसपटक ७ प्रतिशत आर्थिक वृद्धिदर कायम गर्ने लक्ष्य राखिएको छ।
-ठेकेदार भाग्दैमा मेलम्ची हामी ल्याउँदैनौं? मेलम्ची ल्याउँछौ।
-एक वर्ष खुब बाँसुरी बज्यो। वृद्धभत्ता बढेन भनेर। अबको बजेट आएपछि के भन्लान्? त्यो बाँसुरी पनि सिद्धिन्छ।
-भ्रष्टचारीप्रति कुनै सहिष्णुता हुँदैन। भ्रष्टाचार नियन्त्रण हुन्छ।
-३८ टन कि क्विन्टल सुन? त्यत्रो विघ्न सुन ल्याउने काम भइरहेको रहेछ। यो सरकार बन्ने बित्तिकै करपझ्याप बन्द गरिदियो। अनि कराए, खोइ सुन? त्यसबेलाकाले थाहा पाउनुपर्यो नि कहाँ छ भनेर। यति बेला आएर खै सुन? कारोबारीहरु आत्तिएका छन्। कारोबारीका पृष्ठपोषक आत्तिएका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।