काठमाडौँ- नेपाल कम्युनिष्ट पार्टी (नेकपा)का अध्यक्ष एवं प्रधानमन्त्री केपी शर्मा ओलीले पार्टी एकतामा अर्का अध्यक्ष पुष्पकमल दाहाल ‘प्रचण्ड’ले ठुलो आँट गरेको भन्दै धन्यावाद ज्ञापन गरेका छन्।
नेपाल कम्युनिस्ट पार्टी स्थापनाको ७०औं वार्षिक उत्सवका अवसरमा सोमाबार राजधानीको प्रज्ञा भवनमा आयोजित कार्यक्रममा सम्बोधन गर्दै ओलीले प्रचण्डले यसमा साहस देखाएको बताए।
सार्वजनिक कार्यक्रममा प्रचण्डलाई बिरलै ‘कमरेड प्रचण्ड’ भनेर सम्बोधन गर्ने ओलीले भने, ‘विशेषगरी पार्टी एकताका लागि कमरेड प्रचण्डलाई ध्यावाद भन्न चाहान्छु। उहाँले ठूलो आँट र लचिलोपनका साथ काम नगर्नुभएको भए यो एकता सफल हुँदैन्थ्यो।’
ओलीले एकताको प्रक्रिया लगभग सकिएको भन्दै केही दिनमै बाँकी विषय पनि टुंग्याउने बताए। ‘जिल्ला तहको विवाद टुंगिएको छ,’ ओलीले भने, ‘बाँकी कुरा केही दिनमै टुंग्याउँछौ।’
उनले समयानुकुल ढंगले मार्क्सवादको प्रयोग कसरी गर्नुपर्छ भन्ने कुरा आफ्नो पार्टीले देखाएको बताए।
नेपालको कम्युनिष्ट आन्दोलनले आफ्नो संगठित आन्दोलनको ७० वर्ष पुरा गरेको भन्दै उनले यो सिंगै देशका लागि खुसीको कुरा भएको बताए।
‘यही पार्टी हो, जसले राष्ट्रियताको रक्षा गरेको छ र यसले लोकतन्त्रको आन्दोलनलाई सहि ठाउँमा पुर्याएको छ,’ उनले भने, ‘ स्पस्ट दृष्टिकोणसहित देश कहाँ जाने भन्ने कुरा यो पार्टीले दिएको छ।’
ओलीले आजको आजको दिवस स्थायित्व, लोकतन्त्र र राष्ट्रियताको प्रतिविम्ब भएको समेत बताए। ‘यत्तिकै यो आन्दोलन यहाँ आइपुगेको होइन,’ ओलीले भने, ‘यो दिन ल्याउन हामीले धेरै चर्को मूल्य चुकाएका छौं। जनता बिजय हुने ठाँउसम्म ल्याउन योगदान पुर्याउनेहरुप्रति सम्मान प्रकट गर्न चाहान्छु।’
कार्यक्रममा ओलीले प्रमुख प्रतिपक्ष नेपाली कांग्रेसप्रति पनि कटाक्ष गरे। ओलीले कांग्रेसले प्रतिक्रियावादीसँग घाँटी जोड्ने गरेको पनि आरोप लगाए। ‘प्रगतिशील, देशभक्त शक्तिसँग टाढिने र प्रतिक्रियावादीसँग जोडिने गलत नीति कांग्रेसले लियो,’ उनले भने, ‘हेर्दाहेर्दै कांग्रेस कहाँ पुग्यो। कांग्रेसका नेताले राजतन्त्र फर्काउनुपर्छ भन्ने कुरामा लाग्दा अचम्म लाग्छ।’
सरकारको प्रशंसा
ओलीले कार्यक्रममा सरकारले गरेका कामहरुको बेलिविस्तार समेत लगाए। उनले आफ्ना आन्तरिक मामिलामा निर्णय गर्न नेपाल स्वाधिन र स्वतन्त्र रहेको बताए।
पृथकतावादको आन्दोलन चलाएकालाई पनि सहमतिमा ल्याएको भन्दै ओलीले पृथकतावादको राजनीति नै समाप्त भएको बताए। पृथकतावादलाई देखाएर तासको राजनीति गर्न नपाएपछि केही तत्व छटपटाएको समेत उनले आरोप लगाए।
ओलीले सरकारले हरेक दिन उपलब्धिपूर्ण काम गरेको तर आग्रहको पट्टी आँखामा बाध्नेले त्यो नदेखेको अरोप समेत लगाए। ‘हरेक दिन नेपाल एकदम अगाडी बढेको छ,’ ओलीले भने, ‘चेतना, आग्रहको पट्टी बाँधेपछि केही देखिदैन्। तर, तथ्यांकले विकास भएको देखाउँछ।’
एक वर्षमा ८ सय किलोमिटर सडक कालो पत्रे भएको र ३२ वटा तुइन विस्थापन भएको विवरण प्रस्तुत गर्दै ओलीले भने, ‘एक वर्ष खुब बाँसुरी बज्यो वृद्धभत्ता बढेन भनेर। अब त्यो बाँसुरी पनि सिद्धिन्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
