आइतबार साँझ रिहापछि महर्जनलाई सर्वाेच्च परिसरबाट पुनः पक्राउ गरिँदै
काठमाडौं- जनपत्रकार संगठन, नेपालले आफ्ना काठमाडाैं संयोजक जितेन्द्र महर्जनलाई फेरि गिरफ्तार गरिएकोप्रति आपत्ति जनाएको छ।
नेपाल भाषाको पत्रिका ‘न्हूगु ज्वजलपा वाःपौं’का प्रधानसम्पादक समेत रहेका महर्जनको लागि जनपत्रकार संगठनको आग्रहमा नेपाल पत्रकार महासंघले बन्दी प्रत्यक्षीकरणको रिट हालेपछि सर्वोच्च अदालतले आइतबार गिरफ्तारी गैरकानुनी भन्दै रिहा गर्न आदेश दिएको थियो।
तर, अदालतको आदेशको अवहेलना गर्दै प्रहरीले संयोजक महर्जनलाई सर्वोच्च अदालत परिसरबाटै फक्राउ गरेको थियो। सर्वोच्च अदालतले निर्दोष ठहर गर्दै रिहा गर्ने आदेश दिएपनि प्रहरीले पुनः पक्राउ गरेर प्रेस तथा अभिव्यक्ति स्वतन्त्रताको खिल्ली उडाएको जनपत्रकार संगठनको निष्कर्ष छ।
नेत्रविक्रम चन्द 'विप्लव' निकट मानिने जनपत्रकार संगठनका अध्यक्ष प्रकाश डुम्रे र महासचिव हिम विष्टद्धारा हस्ताक्षरित विज्ञप्तिमा पछिल्लो समय विचार र आस्थाकै कारण सरकारले जनपत्रकार संगठनका सदस्यहरुमाथि धरपकड बढाएको भन्दै यसलाई सरकारको निरङ्कुश शैली भएको टिप्पणी गरिएको छ।
'पत्रकार महर्जनको मुद्धा र गिरफ्तारी प्रेस स्वतन्त्रताका लागि ठाडो हस्तक्षेपमात्र नभई सिंगो पत्रकारिता जगतमाथी बन्देज लगाउनसक्ने खतरापूर्ण संकेत हो', विज्ञप्तिमा भनिएको छ, ‘जनपत्रकार संगठनका सदस्यहरुमाथि गरेको धरपकडको घटनाक्रमले नेपालमा लोकतन्त्र स्थापनार्थ नेपाली मिडियाले खेलेको भूमिकालाई बेवास्ता मात्रै गरिएको छैन, जनपत्रकारिताको आवाजलाई दबाउने प्रयास समेत गरिएको छ।'
यस अगाडि जनपत्रकार संगठन कालिकोटका अध्यक्ष कर्ण विश्वकर्मा, बझाङका पत्रकार गणेश विकलगायत पत्रकारलाई गिरफ्तारीपछि महासंघ लगायत संगठनको दबाबमा छाडिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
