बेलझुन्डी (दाङ)- आठौं राष्ट्रिय खेलकुद प्रतियोगितअन्तर्गत दाङको बेलझुन्डी रंगशालामा भइरहेको एथ्लेटिक्सको तेस्रो दिन प्रदेश ५ की एक खेलाडीले खाली खुट्टा कुदैरै कास्य पदक जितेकी छन्।
प्रदेश ५ की कलमा जैसीले चार गुणा चार सय रिले दौडमा कास्य पदक जितेकी हुन्। प्रदेश ५ महिला टिम रिलेमा कमलासँगै पूर्णीमा खड्का, अरुणा रिजाल र पूजा चौधरीले कुदेका थिए। अन्तिममा कुदेकी कमला भने खाली खुट्टामै दौडिएकी थिइन्। उनले स्पाइक जुत्ता नभएको र सामान्य जुत्ताले दौडँदा अप्ठेरो भएकाले खाली खुट्टामै कुदेको बताइन्।
बाँके नारायणपुरकी कमलाले यसअघि १५ सय र ५ हजार मिटरमा पनि भाग लिएकी थिइन्। तर दुवैमा सामान्य जुत्तामा दौडदा सोचेको जस्तो नतिजा नआएकाले उनले चार गुणा चार सय दौडमा भने खाली खुट्टामै भाग लिएको बताइन्।
उनले भनिन्,'सामान्य जुत्ता थियो। दौडनका लागि चाहिने स्पाइक जुत्ता थिएन। त्यसैले खाली खुट्टामा दौडिएको हुँ। यसअघि १५ सय मिटर र ५ हजार मिटरमा पनि जुत्ता लगाएर कुँदे। तर जुत्ता लगाएर कुद्दा राम्रो भएन। घरमा रनिङ गर्ने जुत्ता थियो। त्यो पनि ल्याउन बिर्सिएछ,' उनको भनाइ छ।
१५ सय र ५ हजार मिटरमा पनि उनले जुत्ता लगाउन चाहेकी थिइनन्। तर प्रशिक्षकहरुको दबाबका कारण जुत्ता लगाएर कुदेकी थिइन्। 'मैले घरमा खाली खुट्टामै प्रशिक्षण गरेकी थिएँ। खाली खुट्टा दौडन पाएको भए पदक ल्याउँछु भन्ने आशा थियो,' उनले भनिन्।
बेलझुन्डी रंगशालामा सिन्थेटिक ट्र्याकमा कुद्नुपर्छ भन्ने विषयमा उनी जानकार थिइनन्। बेलझुन्डी आइपुगेर ट्र्याक देखेपछि उनी निराश भएकी थिइन्। 'सिन्थेटिक ट्र्याकमा दौडनुपर्छ भन्ने थाहा थिएन। माटोमा दौडँदा कुनै अप्ठ्यारो हुँदैन थियो। तर सिन्थेटिक ट्र्याकमा खाली खुट्टा कुद्दा साह्रै बिजायो,' कमलाले पीडा पोखिन्।
खाली खुट्टामा दौडिएर भएपनि पदक जित्न पाउँदा उनी खुसी छिन्। सुरुवातमा पछि परेपनि कमलासहितको प्रदेश ५ ले अन्य प्रदेशका खेलाडीलाई पछि पारेर कास्य पदक हात पार्न सफल भएको थियो।
यो स्पर्धामा आर्मीको टिम पहिलो हुँदा एपिएफले दोस्रो स्थान हात पार्यो। आर्मीले ४ मिनेट ०२ सेकेन्डमा दौड पूरा गर्दा एपिएफले ४ मिनेट १३ सकेन्डमा निर्धारित दूरी पार गरेर रजत हात पार्यो। प्रदेश ५ ले ४ मिनेट २० सेकेन्डमा निर्धारित दूरी पार गर्यो।
कास्य पदक हात पारेका कमलासहित चार जनाले यसअघि कहिल्यै सँगै प्रशिक्षण गरेका थिएनन्।
कमला बाँके नारायणपुरकी हुन् भने अरुणा रिजाल दाङकी हुन्। यस्तै पूर्णीमा खत्री बाँके र पूजा खत्री बर्दियाकी हुन्। तर पनि विभागीय टिमलाई टक्कर दिन सकिने विश्वास चारै जनासँग थियो।
प्रशिक्षक चन्द्रबाहादुर गुरुङले पनि कमलामा प्रतिभा देखेकाले रिले दौडको अन्तिममा राखेका थिए। पूर्णिमाले भनिन्, 'कमलाको फिनिसिङ राम्रो थियो। त्यसैले गुरुले उनलाई अन्तिममा दौडन भन्नु भएको थियो।'
१८ वर्षीय कमलाले औपचारिक रुपमा दौडन थालेको ४ वर्ष भइसक्यो। यसअघि उनले २०७४ मा इटहरीमा भएको राखेप च्याम्पियनसिपमा भाग लिएकी थिइन्। त्यहाँ पनि उनले खाली खुट्टा नै दौडिएकी थिइन्। त्यसपछि उनले जुनियर एथ्लेटिक्समा पनि भाग लिइन्। मुख्य विधा १५ सय मिटरलाई बनाएकी कमलाले जुनियर च्याम्पियनसिपमा पनि खाली खुट्टामै दौडिइन्।
बाँकेको सदरमुकाम नेपालगन्जबाट २ घन्टा नारायणपुरकी बासिन्दा उनले अब स्पाइक जुत्ता लगाएर प्रशिक्षण गर्दै एथ्लेटिक्समा भविष्य खोज्ने योजना बनाएकी छिन्। गाउँकै उच्च माविमा कक्षा ११ मा अध्ययन उनले भनिन्,'बाच्चै देखि दौडन खुब मन पर्थ्यो। अब एथ्लेटिक्समै मिहिनेत गरेर पदक जित्ने इच्छा छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
