बेलझुन्डी (दाङ)- दाङको तुल्सीपुरस्थित बेलझुन्डी रंगशालामा आठौं राष्ट्रिय खेलकुद प्रतियोगिताका लागि सिन्थेटिक ट्र्याक बिछ्याइनु आफैंमा राम्रो काम हो। किनकि राजधानी बाहिर पहिलो पटक सिन्थेटिक ट्रयाक निर्माण गरिएको हो।
यसअघि काठमाडौं बाहिर भएका राष्ट्रिय खेलकुद प्रतियोगितामा खेलाडीले सिन्थेटिक ट्र्याकमा दौडने अवसर पाएका थिएनन्। धनगढीमा भएको छैटौं राष्ट्रिय खेलकुद प्रतियोगिता र दुई वर्षअघि भएको विराटनगरमा सातौं राष्ट्रिय खेलकुद प्रतियोगितामा माटोको ट्र्याकमा खेलाडीहरु दौडिएका थिए।
राजधानी बाहिर पहिलो पटक सिन्थेटिक ट्र्याक निर्माण भएपनि मापदण्डअनुसार नबनाई हतारहतार प्रतियोगिता सञ्लालन गरिएको छ।
अफिसियल प्रतियोगिता सञ्चालन हुने हरेक ट्र्याकलाई अन्तर्राष्ट्रिय एथ्लेटिक्स महासंघले मान्यता दिनुपर्छ। ट्र्याक मापदण्डअनुसार बनेको वा नबनेको विषयमा अन्तर्राष्ट्रिय एथ्लेटिक्स महासंघका प्रतिनिधि बेलझुन्डी आउने बताइएको छ।
तर दाङको बेलझुन्डी रंगशालाको ट्र्याक मापदण्डअनुसार नबनेकाले ट्र्याकले अन्तर्राष्ट्रिय एथ्लेटिक्स महासंघको मान्यता नपाउने भन्दै एथलेटिक्सका प्रशिक्षकले चिन्ता व्यक्त गरेका छन्।
हाइजम्पका लागि ट्र्याक सानो
बेलझुन्डी रंगशालामा बनेको यो ट्र्याकमा शनिबारका लागि निर्धारण गरिएको हाइजम्पको प्रतिस्पर्धा हुने सकेन। किनकी खेलाडी कुदेर नाध्नका लागि २० मिटर ट्र्याक हुनुपर्ने प्रावधान छ। तर हाइजम्पका लागि १५ मिटर मात्र दूरी भएपछि रंगशाला बाहिरको चौरमा प्रतिस्पर्धा भएको छ।
एथ्लेटिक्सका प्रशिक्षक चन्द्रबहादुर गुरुङले हाइजम्पका लागि ट्र्याकको मापदण्ड नपुगेकाले चौरमा खेलाइएको नेपाल लाइभलाई बताए। उनले भने, 'खेलाडी कुद्नका लागि २० मिटर दूरी चाहिन्छ। तर यहाँको ट्र्याकमा १५ मिटर मात्र दूरी छ। १५ मिटर मात्र कुदेर नाध्दा सोचेको जस्तो नतिजा आउँदैन। त्यसैले खेलाडीसँग सल्लाह गरेर चौरमा प्रतियोगिता गराइएको हो।'
यता एथ्लेटिक्सका प्रशिक्षकहरुले ट्र्याकमा मान्यताविपरीत चुना हालिएको बताएका छन्। राष्ट्रिय खेलकुद परिषदले ट्र्याकमा कुनै पनि हालतमा प्रतियोगिता गराउने हठ लिएकाले मापदण्डविपरीतको काम भएकोमा प्रशिक्षकहरुले असन्तुष्टि जनाएका छन्।
खेल तालिकामा असन्तुष्टि
कतिपय खेलाडीले खेल तालिकामा पनि असन्तुष्टि जनाएका छन्।
लामो दूरीको दौड १० बजेपछि राखेकोमा एथलेटिक्स प्रशिक्षक हरिबहादुर रोकायाले असन्तुष्टि पोखे। 'लामो दूरीको दौड बिहानको समयमा हुनु पर्थ्यो। तर छोटो दूरीको दौड पहिला गरेर लामो दूरीको दौड मध्य घाममा राख्ने काम भएको छ। यसले खेलाडीको प्रदर्शनमा असर त गर्छ नै, रेकर्ड बनाउन पनि सक्दैनन्,' रोकायाले भने।
यसअघि गत बिहीबार १० हजार मिटर दौड बिहान सवा ८ बजे सुरु हुने भनिए पनि १० बजे मात्र सुरु भएको थियो। जस कारण खेलाडीहरुलाई गर्मीले प्रभाव पारेको थियो।
खेलाडीले पाएनन् ट्र्याकसुट, सबै खेलाडीलाई एउटै साइजको जुत्ता
सुदूरपश्चिम प्रदेशका एथ्लेटिक्स खेलाडीले प्रतियोगिताका लागि तोकिएको ट्र्याकसुट अझै नपाएको एक अधिकारीले बताए। 'ट्र्याकसुट कहाँ र कसले दिन्छ भन्ने अझै थाहा छैन। प्रतियोगिता सकिएपछि पनि पाइन्छ कि पाइदैन थाहा छैन,' ती अधिकारीले भने। तोकिएको ट्र्याकसुट उपलब्ध नभएपछि खेलाडीले पुरानो ट्र्याक लगाएर प्रतिस्पर्धामा आएका थिए।
यता कर्णाली प्रदेशका एथ्लेटिक्स खेलाडीका लागि एकै साइजका जुत्ता दिइएको छ। 'सबैलाई १० नम्बरको जुत्ता पठाइँदा अचम्म लागेको छ। यसअघिका प्रतियोगितामा ट्र्याक र जुत्ताको साइजको माग हुन्थ्यो। यसपटक त त्यस्तो पनि भएन,' कर्णाली प्रदेशका प्रशिक्षक हरिबहादुर रोकायाले भने।
म्याराथन रुट जोगिखपूर्ण
सोमबारका लागि तय म्याराथन रुट उपयुक्त नभएको खेलाडीहरुले बताएका छन्।
बेलझुन्डी रंगशालदेखि तुल्सीपुर घुमेर फेरि बेलझुन्डी रंगशालमा आइपुगेर म्याराथन सकिने रुट बनाइने बनाइएको छ। तर यो रुटमा ठाँउ ठाँउमा कच्ची बाटो भएको तथा केही ठाँउमा उकालो भएकाले दौडन उपयुक्त नहुने बताइएको छ।
निर्धारित रुट कच्ची बाटो र उकालो आरोलो भएकाले खेलाडीको प्रदर्शनमा असर गर्ने प्रशिक्षक रोकाया बताउछन्। रोकायाले यो रुट म्याराथनका लागि नभएर अल्ट्रा म्याराथनका लागि उपयुक्त हुने भन्दै व्यंग गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
