काठमाडौं– एक व्यक्तिलाई बन्धक बनाएर पैसा असुल्ने प्रहरीविरुद्ध अपहरण मुद्दा अघि बढेको छ। महानगरीय प्रहरी वृत्त बालाजुका तीन प्रहरीविरुद्ध अपहरण मुद्दा अघि बढाइएको हो।
असई चन्द्रसिंह भाट, हवल्दार मनोज यादव र जवान पुष्कर साहविरुद्ध महानगरीय प्रहरी परिसर काठमाडौंले अपहरण मुद्दा अघि बढाएको हो। उनीहरुका सहयोगी विनोद थापा बगाली विरुद्ध पनि मुद्दा चलाइएको छ।
भारतीय गोर्खा सैनिकमा भर्ती हुन चाहनेहरुलाई कागजपत्र बनाउने काम गर्ने गंगा देवानलाई बन्धक बनाई गत असोज ८ गते उनीहरुले ५ लाख रुपैयाँ असुलेका थिए। असोज १० गते अख्यितार दुरुपयोग अनुसन्धान आयोगले उनीहरुलाई पक्राउ गरेको थियो। विशेष अदालतबाट धरौटीमा छुटेपछि उनीहरुलाई अपहरण मुद्दामा कारबाही अघि बढाइएको छ।
४ जनामध्ये असई भाट परिसरकै हिरासतमा छन्। अन्य ३ जना धरौटी तिर्न नसकेर जेलमै छन्। सोही काण्डमा मुछिएका डिएसपी नवीनकृष्ण भण्डारी २ लाख रुपैयाँ धरौटी राखेर छुटेका छन्। उनीविरुद्ध भने अपहरण मुद्दा चलाइएको छैन। बालुवा डिपोमा बन्धक बनाई पैसा मागेकाले अपहरण मुद्दा चलाउन लागिएको एक प्रहरी अधिकारीले जानकारी दिए।
यसरी भएको थियो अपहरण
गंगा देवान भारतीय गोर्खा सेनामा भर्ती हुन चाहने युवाका लागि कागजपत्र सहजीकरणको काम गर्थे। त्यसबाट उनले राम्रै पैसा कमाइरहेका थिए। सो कुरा स्थानीय विनोद थापा बलामीले थाहा पाए। अवकाश प्राप्त प्रहरीका छोरा थापाको प्रहरीहरुसँग चिनजान थियो। उनी केही गलत काम गर्नेहरुको सूचना थाहा पाउँथे र प्रहरीलाई छापा हान्न लगाई पैसा असुलेर कमिसन खान्थे।
उनै थापाले देवानको कम्पनीमा छापा हान्न लगाउने योजना बनाए। बालाजु वृत्तका असई चन्द्रसिंह भाट तयार भए।
सोही अनुुसार देवानको कार्यालयमा उनीहरुले छापा मारे। भारतीय गोर्खा सैनिकमा भाग लिने प्रक्रियामा रहेका केही युवाका कागजपत्र भेटियो। अवैध काम गरेको भन्दै उनीहरुले हत्कडी लगाएर २० लाख रुपैयाँ मागे। उनले आफूले नराम्रो काम नगरेको भन्दै पैसा दिन इन्कार गरे। उनलाई बिन्दवासिनी बालुवा डिपोमा लगेर बन्धक बनाई बार्गेनिङ सुरु भयो। त्यो डिपो उनै थापाको हो। त्यसबेला असई भाटसहित हवल्दार मनोज यादव र जवान पुष्कर साहसमेत सँगै थिए। उनीहरुले श्रीमतीलाई फोन लगाएर पैसा लिएर आउन भने।
जसरी अपराधीहरुले अपहरण गरेर पैसा असुल्छन्, बालाजु प्रहरीले त्यसैगरी देवानलाई पक्राउ गरी पैसा असुल्ने प्रयास गरेको थियो। पछि देवानकी श्रीमती त्यहाँ पुगिन्। श्रीमतीलाई समेत प्रहरीको गाडीमा राखेर उनीहरुले बालाजु चौकी पुर्याए। एक रात दुवै जनालाई थुने। पैसा लिएर आउने सर्तमा भोलिपल्ट श्रीमतीलाई छाडिदिए।
भोलिपल्ट श्रीमती पैसा लिएर गइन्। तर, त्यो पैसा उनको नभई अख्तियार दुरुपयोग अनुसन्धान आयोगको थियो। कार्यालयमै असई भाटले पैसा लिए। लगत्तै अख्तियारले उनलाई नियन्त्रणमा लियो। हवल्दार यादव र जवान साह भागिसकेका थिए। उनीहरु अर्को दिन पक्राउ परे। घटनामा वृत्तका इन्चार्ज डिएसपी भण्डारीको समेत अप्रत्यक्ष मिलेमतो देखिएपछि अख्तियारले उनलाई पनि पक्राउ गरी मुद्दा चलाएको थियो। प्रहरीका अनुसार उनीहरुले देवानको एटिएमकार्डबाट जबर्जस्ती ८० हजार रुपैयाँसमेत निकालेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773837959.png)
