बुटवल- पुस २८ गते बुटवलको मिलनचोकमा एक युवती ढलेको अवस्थामा फेला परिन्। नाम, ठेगाना, उमेर केही बताउन नसक्ने उनी गर्भवती थिइन्। प्रहरीको सहयोगमा उनलाई बुटवलस्थित मानवसेवा आश्रम पुर्याइयो।
उद्धार गरेर ल्याउँदा उनको ७ महिनाको गर्भ थियो। आश्रमले लालनपालन र हेरचाहको जिम्मा लिएर आश्रममा राख्यो। फागुन २६ मा उनले बच्चा जन्माइन्। लुम्बिनी प्रादेशिक अस्पतालमा जन्मिएको बच्चाको तौल र स्वास्थ्य ठिक थिएन। आश्रमले बच्चाको न्वारान गर्यो र नाम राख्यो– सक्षम मानव।
स्वास्थ्यलाभ गरिरहेका बच्चाको न्वारानपछि आश्रमका सबैले खुसी मनाए। उनी जस्ता बालबालिका देशभरमा २४ जना छन्। जसका आमा अलपत्र अवस्थामा सडकमा भेटिएका थिए। बाबुको पत्तो छैन। उनीहरुको अभिभावक बनेको छ, मानव सेवा आश्रम।
बुटवलस्थित आश्रममा ३६ जना मनोरोगी, ४ जना अशक्त र १ जना नवजात शिशु गरी ४१ जनाले आश्रय पाएका छन्। नवजात शिशुदेखि ८२ वर्षसम्मका मानिस छन्।
असहायको आश्रयस्थल
सडकपेटीमा अलपत्र परेका व्यक्ति, असहाय, अपांग, मनोरोगीको आश्रयस्थल बनेको छ, मानवसेवा आश्रम। कष्टकर जीवनयापन गरेका सबै उमेर समूहका व्यक्तिको उद्धार गरेर आश्रममा राखिन्छ।
आश्रमकी महासचिव तथा रुपन्देही संयोजक रुपा केसी भन्छिन्, 'अनाथ, अपांग, अशक्त र असहायलाई उद्धार गरेर आश्रममा ल्याउने र उहाँहरुको औषधि उपचार गर्ने, परिवार भेटिएमा पारिवारिक पुनर्मिलन गराउने काम गर्छौं, परिवार नभेटिएमा आश्रम नै उहाँहरुको जीवनभर सेवा गर्छ।’
सडकमा मानसिक सन्तुलन गुमाएका, वृद्ध वा अपांग भएर वा कुनै रोगको उपचार गर्न नसकेर सडकमै अलपत्र भएका, चौतारीमै रात काट्न बाध्य भएकालाई आश्रय दिनका आश्रम खुलेको हो। २०६९ सालमा हेटौंडामा स्थापना भएको आश्रम ६ वर्षको अवधिमा १० जिल्लामा फैलिएको छ।
देशभरका करिब ५ सय जनालाई आश्रमले आश्रय दिइएको छ। त्यसमध्ये ५६ जना जति त सडक बालबालिका छन्। अलपत्र अवस्थामा भेटिएका गर्भवतीहरुले आश्रममा आएर २४ जना बच्चालाई जन्म दिएका छन्। आश्रममा सेवा गर्न ५० जना युवा सक्रिय छन्।
सहयोगबाटै सबथोक
२०८२ सालभित्र नेपाललाई सडक मानवमुक्त बनाउने अभियान थालेको यो संस्थाले विदेशी सहयोग लिँदैन। सरकारी, संस्थागत र व्यक्तिगत सहयोगबाटै चलेको छ।
बुटवलमा रहेको आश्रमका ४० जनालाई स्याहारसुसार, खानपान, औषधि उपचार लगायतका लागि मासिक ८ देखि १० लाख रुपैयाँसम्म खर्च हुन्छ।
‘विभिन्न सहयोगदाताहरुले सहयोग गर्नुहुन्छ,' आश्रमकी रुपन्देही सहसंयोजक सरु अधिकारी भन्छिन्, 'सहयोगीहरुकै कारण सडकमा अलपत्र जीवन बिताइरहेका मानिसलाई उद्धार गरेर सेवा गर्न सकेका छौं।’
४० जना अट्ने भवनको भाडा बुटवल उपमहानगरपालिकाले बेहोरिरहेको छ। बुटवल उपमहानगरपालिकाले बुटवललाई सडक मानवमुक्त सहर बनाउने घोषणा गरेको र मानव सेवा आश्रमले पनि सोही लक्ष्य लिएकाले मासिक ८० हजार रुपैयाँ भाडा उपमहानगरले बेहोर्ने गरेको बुटवल उपमहानगरपालिकाकी उपप्रमुख गोमादेवी आचार्यले बताइन्।
‘हाम्रो र उहाँहरुको कुरा एउटै रहेछ, सडकमा अलपत्र परेका मानिसहरुलाई आश्रय दिने,' उनले भनिन्, 'यो सच्चा समाजसेवा हो, त्यसैले सबैले यस्ता कार्यलाई साथ दिनुपर्छ।’
'वर्षमा एक दिन मानव सेवा आश्रममा'
आश्रमको भित्तामा लेखिएको छ- हामीलाई गर्व छ, मानवसेवी अभियन्ता बन्न पाएकोमा, सहाराविहीनहरुको सहारा बन्न पाएकोमा, आवाजविहीनहरुको आवाज बन्न पाएकोमा।
यस्तो सहारा बन्न आश्रममा नि:स्वार्थ भावले सहयोग गर्न सकिन्छ। आश्रमले सहयोगको हात अघि बढाउन आह्वान गर्दै भन्छ–वर्षमा एक दिन मानव सेवा आश्रममा। यसको अर्थ हो, धेरै नसके पनि वर्षको एक दिन, आफ्नै जन्मदिनमा मानवसेवा आश्रमलाई सहयोग गरौं।
आश्रमले एक छाक खाना खुवाउनका लागि ६ हजार १ सय रुपैयाँ लाग्ने बताउँछ। कसैले एकछाक खानावापत्को सहयोग गर्न चाहेमा आश्रमलाई ६ हजार १ सय रुपैयाँ तिरे पुग्छ।
आश्रम सहसंयोजक अधिकारीका अनुसार आफ्नो जन्मदिन, विवाह, ब्रतबन्ध, चौरासी, वैवाहिक कार्यक्रम, वार्षिकी, पितृकार्य जस्ता काममा पनि एक दिन वा एक छाक खुवाएर सहयोग गर्न सकिन्छ। उनी भन्छिन्, ‘यसले आफू पनि बाँचौं र अरुलाई पनि बाँच्न देऊ भन्ने उपदेशलाई बल पुर्याउँछ।’
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
