काठमाडौं- प्राकृतिक प्रकोप तथा विपद्को अवस्थामा खर्चनका लागि वार्षिक बजेटमा छुट्याइएको रकम सरकारले मनलाग्दी ढंगले खर्च गर्दै आएको देखिएको छ।
गत चैत १७ मा बारा र पर्सामा आएको हावाहुरीका कारण करोडौं रुपैयाँ बराबरको क्षति पुगेको भए पनि राहत तथा पुनर्स्थापनाका लागि सरकारले पहल गर्न नसकेको गुनासो आएको थियो। तर, सरकारले भने यस्ता प्राकृतिक विपद्का बेला प्रयोग गर्नका लागि छुट्याएको रकम मन्त्रिपरिषद् सदस्यहरुको स्वार्थमा खर्च गर्ने गरिएको देखिएको छ।
चैत महिनामा मात्रै सरकारले दैवी प्रकोप राहत तथा पुनर्स्थापनाका लागि भनेर छुट्याइएको २१ करोड रुपैयाँ प्रधानमन्त्री केपी शर्मा ओलीको गृहजिल्ला झापामा खर्च गरिएको छ। यस्तै परराष्ट्रमन्त्री प्रदीप ज्ञवाली र श्रम, रोजगार तथा सामाजिक सुरक्षामन्त्री गोकर्ण विष्टको गृहजिल्ला गुल्मीमा खर्च गरेको देखिन्छ।
प्रधानमन्त्रीको गृहजिल्ला झापामा ससाना सडक खण्ड निर्माणका लागि भन्दै चैत महिनामा २० करोड रुपैयाँ रकमान्तर भएको छ।
झापाको लक्ष्मीपुर–घैलाडुब्बा सडकका लागि ५ करोड, झापाचोक–भद्रपुर–बिर्तामोड सडकखण्डका लागि १० करोड र अल्टावारी–गौरीगन्ज–पाडाजुँगी सडकखण्डका लागि ५ करोड रुपैयाँ गरी कुल २० करोड रुपैयाँ रकमान्तर गरेर पठाइएको छ।
त्यसैगरी, चैतमा नै सोही शीर्षकमा बजेटमा समावेश गरिएको १ करोड रुपैयाँ प्रधानमन्त्री तथा मन्त्रिपरिषद्को कार्यालयलाई रकमान्तर गरेर निकासा दिइएको छ।
मन्त्रिपरिषद्ले गत माघ २५ गते गरेको निर्णयअनुसार गुल्मीको बलेटक्सार चक्रपथ निर्माणका लागि भन्दै अर्थ मन्त्रालयले १ करोड रुपैयाँ मन्त्रिपरिषद् कार्यालयलाई रकमान्तर गरेको हो।
गुल्मी मन्त्री प्रदीप ज्ञवाली र गोकर्ण विष्टको गृहजिल्ला हो।
त्यसैगरी गत फागुनमा दैवी प्रकोप तथा राहात पुनर्स्थापनाका लागि छुट्याइएको २३ लाख रुपैयाँ बराबरको रकम पानीजहाज कार्यालयलाई रकमान्तर गर्न अर्थ मन्त्रालयले अनुमति दिएको देखिन्छ। विपद् व्यवस्थापनका लागि छुट्याइएको उक्त रकम भौतिक योजना तथा पूर्वाधार मन्त्रालयलाई निकासा गरिएको भेटिएको हो।
प्राकृतिक विपत्ति कतिखेर आइलाग्छ भनेर थाहा हुँदैन। तर, त्यस्तो अवस्था आइहाल्दा आवश्यक पूर्वतयारी भएन भने व्यवस्थापनमा झन् समस्या आइलाग्छ। तर, सरकार आफैले भने प्राकृतिक विपत्तिबाट हुने जनधनको क्षतिपछि मलमपट्टी लगाउन छुट्याएको बजेट रकमान्तर गरेर अर्कैतिर खर्च गरिरहेको पाइएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1784259039.png)
-1764146706.png)
