प्रतीकात्मक तस्बिर
काठमाडौं– जिल्ला अदालत काठमाडौंले छोरीलाई बलात्कार गर्ने एक बाबुलाई १६ वर्ष कैदको फैसला सुनाएको छ। काठमाडौंको नागार्जुन नगरपालिका बस्दै आएका रामबहादुर परियारलाई अदालतले जबरजस्ती करणीमा ६ वर्ष र हाडनाता करणीमा १० वर्ष गरी १६ वर्ष सजाय गर्ने फैसला सुनाएको हो।
जिल्ला न्यायाधीश श्रीकृष्ण भट्टराईको इजलासले जेठी श्रीमतीबाट जन्मेकी छोरीलाई बलात्कार गर्ने उनलाई पहिचान खुलाएर सजाय गर्ने फैसला सुनाएको हो। पीडित परिवारलाई ३ लाख क्षतिपूर्ति दिनसमेत अदालतले भनेको छ। क्षतिपूर्ति तत्काल भर्न सक्ने पीडितको अवस्था नभएको भन्दै अदालतले महिला बालबालिका तथा ज्येष्ठ नागरिक मन्त्रालयको नाममा आदेश जारी गरेको छ।
पीडितसँग पछि असुल गर्न सक्नेगरी सरकारले नै तत्काल क्षतिपूर्ति भराउनुपर्ने जिल्ला अदालतको फैसलामा उल्लेख छ।
पहिलो पटक जिल्ला अदालत काठमाडौंले बलात्कारको मुद्दामा सरकारबाट क्षतिपूर्ति भराउने फैसला गरेको हो।
यस्तै अदालतले पहिलो पटक नै बलात्कार मुद्दामा आरोपितको नाम गोप्य राख्न आवश्यक नहुने फैसला सुनाएको छ। नैतिक पतन देखिने फौजदारी कसुरमा सजाय पाएको व्यक्तिलाई संकेतका भरमा सजाय गर्दा लाभ उठाउने सक्ने देखिएकाले पहिचान खुलाउनुपर्ने अदालतको तर्क छ। पहिचान लुकाउँदा दोषी ठहर भएको व्यक्ति कुनै दिन संवैधानिक पदमा समेत पुग्न सक्ने अवस्था विद्यमान हुने देखिन्छ।
श्रीमतीलाई सपनामा देखेको भन्दै छोरीमाथि पटकपटक बलात्कार
श्रीमतीलाई सपनामा देखेपछि आफूले यौन सम्पर्क गरेको तर छोरीमाथि बेहोसीमा बलात्कार हुन पुगेको परियारले बयानमा स्वीकार गरेका छन्। उनले आफूले छोरी बलात्कार गर्ने कुनै नियत नभएको भन्दै आफूबाट गल्ती भएको बयानमा स्वीकारेका हुन्।
आफूले क्रिस्चियन धर्म मान्ने गरेको र मिर्गौलाको समस्या भएपछि उपचारका लागि काठमाडौं आएको परियारले बयान दिएका छन् । यस्तै, उनले छोरीले सधैं मोबाइल मात्र खेलाउने गरेको र आफूले गाली गरेको उनले बयान दिएका छन्। पटकपटक हराउने गरेको र पछिल्लो पटक हराएको केही दिनमा आफूविरुद्ध नै उजुरी दिएको बयान पनि परियाले दिएका छन्। उनले प्रहरी र अदालतमा दुई थरी बयान दिएका छन्।
यसरी सुरु हुन्छ बलात्कार शृंखला
छोरी बलात्कारको घटना कान्छी श्रीमतीको बिहेसँगै सुरु हुन्छ। रुकुम स्थायी घर भएका परियारकी जेठी श्रीमतीबाट एक छोरीको जन्म हुन्छ। जेठी छोरीको जन्मसँगै श्रीमतीको निधन हुन्छ। त्यसपछि परियारले गाउँमै कान्छी बिहे गर्छन्।
कान्छी श्रीमतीबाट दुई छोराको जन्म हुन्छ। घरमा परिवार धेरै भएपछि र क्रिस्चियन धर्म मान्न थालेपछि परियार काठमाडौं आइपुग्छन्। नागार्जुनमा उनी लुगा सिलाउने सामान्य टेलर सञ्चालन गर्न थाल्छन्। कान्छीतर्फबाट जन्मेका दुई छोरालाई उनी काठमाडौं अध्ययनका लागि भन्दै ल्याउँछन्। छोरासँगै सहयोगका लागि जेठी तर्फकी छोरीलाई पनि श्रीमतीसँगकै सल्लाहमा झिकाउँछन्।
अन्तत: काठमाडौंको एउटा कोठाबाट परियारको 'नरपिचास बाबु'को रुप देखिन थाल्छ।
घटनाको सुरुवात नागार्जुनको डेराबाट २०७४ कात्तिक १५ देखि भएको देखिन्छ। भाइहरुसँग सुतेकी दिदी (परियारकी छोरी) मस्त निद्रामा भएको बेला असहज महसुस गर्छिन्। एक्कासि कसैले थिचेझैं, मुख थुनेझैं र आफ्ना संवेदनशील अंगमा जबरजस्ती गरेझैं अनुभव उनलाई हुन्छ।
जब निद्राबाट उनी ब्युँझन्छिन्, आफ्नै बाबु आफूमाथि चढेर मच्चिरहेको अवस्थामा देख्छिन्। योनी र स्तनमा निकै पीडा भएपछि उनी तत्काल प्रतिवादका लागि चिच्चाउन खोज्छिन् तर बाबुले मुख थुनेर त्यसालई असफल बनाइदिन्छन्।
उक्त घटना कसैलाई भनेमा नराम्रो हुने र काठमाडौंबाट निकाल्ने बाबुले धम्की दिएपछि उनी मौन बस्न बाध्य हुन्छिन्।
कात्तिक १८ गते पुन बाबुले आफ्नो असली रुप देखाउँछन्। १५ वर्षकी छोरीको छातीमा हात राखेर भाइहरु नभएको अवस्थामा उनले पुन: बलात्कार गर्छन्। त्यस दिनपछि बाबुसँग रोएर सहनुबाहेक उनको अर्को विकल्प भएन। यो शृंखला केही महिना चलिरह्यो। आफ्नै बाबुले पटकपटक बलात्कार गरिरहे।
२०७४ पुस १५ गते राति छोराहरु सुतेको मौका पारी बाबु पुन: बलत्कार गर्न आएपछि छोरीले प्रतिवाद गर्ने विचार गरिन्। बाबुलाई आफूबाट हटाएर शौचालयमा गएर लुकिन्। बाबु खोज्दै आए तर भेट्न सकेनन्। मनमा त्रास लिँदै आधा रातसम्म उनी शौचालयमै बसिरहिन्। बाबु निदाएपछि ओछ्यान फर्किइन् र रुदै रात काटिन्।
बिहान उठेलगत्तै बाबुले 'हिजो राति कहाँ भागेको? भरे रात त पर्ला' भनेर धम्की दिए। आफ्नै बाबुको बलत्कार गर्ने यो धम्की सुनेपछि उनले उक्त स्थानमा बस्न नसक्ने निष्कर्ष निकालिन्। लगत्तै घरबाट बाहिर निस्किइन्।
एक अपरिचित महिलालाई उनले आफू बाबुबाट पटकपटक बलात्कारको सिकार भएको बताइन्। ती महिलाले उनलाई प्रहरी कार्यालय स्वयम्भू पुर्याइन्। प्रहरीले पीडितलाई साथी संस्थाको जिम्मा लगाउँदै २०७४ पुस २० गते बाबु रामबहादुर परियारविरुद्ध जाहेरी दर्ता गर्यो। त्यसपछि पक्राउ परेका बाबुलाई प्रहरीले बयान गरायो।
अनुसन्धानका क्रममा प्रहरीले पीडितको स्वास्थ्य परीक्षण गराउँदा पटकपटक बलात्कार भएको पाइएको थियो। स्वास्थ्य परीक्षणमा ७ हप्ताको गर्भ देखिएको थियो। प्रहरी र पीडितको मञ्जुरीमा गर्भपतन गरिएको थियो।
२०७४ माघ १५ मा प्रहरीले जिल्ला अदालत काठमाडौंमा छोरी बलात्कार गरेको आरोपमा मुद्दा दर्ता गर्यो। उक्त मुद्दामा फैसला सुनाउँदै चैत २८ गते जिल्ला अदालतले परियारलाई दुई अभियोगमा दोषी ठहर गर्दै १६ वर्ष कैद र ३ लाख क्षतिपूर्ति भराउने फैसला सुनाएको छ।
अदालतको फैसलाको पूर्णपाठ भने तयार भएको छैन। यसअघि भक्तपुर जिल्ला अदालतले पनि पीडकको नाम गोप्य राख्न जरुरी नहुने फैसला सुनाएको थियो। सोही नजिरको आधारमा जिल्ला अदालत काठमाडौंले पनि यो मुद्दामा स्वयम्भू ‘क’ नाम राखिएका परियारको नाममा कैद भुक्तान गराउनु भनी फैसला सुनाएको हो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।