अनुसन्धान

विमानस्थलमा दीपक मल्होत्राको रजाइँ-५ : बक्यौता भुक्तानीका लागि १८ पत्र पठाउँदा २ करोड मात्रै दाखिला

काठमाडौं– त्रिभुवन अन्तर्राष्ट्रिय विमानस्थल कार्यालयको ५२ रोपनी जग्गामा रजाइँ गर्दै आएका व्यवसायी दीपक मल्होत्रालाई कार्यालयले हालसम्म २७ पत्र पठायो। जसमध्ये १८ पत्रमा रकम भुक्तानीको विषय उल्लेख छ। तर,उनले कुनै पत्रको जवाफ नदिएको खुल्न आएको छ। साथै, मल्होत्राले विमानस्थल कार्यालयको पत्रलाई बेवास्ता गर्दै जग्गा बापतको भाडा रकमसमेत तिरेका छैनन्।

विमानस्थल कार्यालयले मल्होत्रासँग २०६९ कात्तिक २ गते सम्झौता गरेको थियो। तर, सम्झौताको म्याद २०७२ माघ १ मा सकियो। त्यसपछि मात्रै रकम भुक्तानीदेखि अन्य आर्थिक कारोबारको विषय उल्लेख गर्दै कार्यालयले २७ पटक पत्र पठाइसकेको हो।

‘कार्यालयले मल्होत्रालाई २७ पटकसम्म जग्गा बापतको भाडा भुक्तानी लगायत विभिन्न विषयमा पत्राचार गरेका छौं,’ विमानस्थल कार्यालयका एक कर्मचारीले भने, ‘कार्यालयले पठाएको पत्रभन्दा राज्यशक्ति प्रयोग गरेर कसरी आफ्नो खल्ती भर्न सकिन्छ भने विषयमा उनको ध्यान केन्द्रित छ।’

मल्होत्रालाई ५२ रोपनी जग्गामा रजाइँ गर्ने वातावरण भने तत्कालीन विमानस्थलका महाप्रबन्धक इन्जिनियर रतीश चन्द्रलाल सुमनले तयार गरिदिएका थिए।

तत्कालीन महाप्रबन्धक सुमनले नेपाल नागरिक उड्डयन प्राधिकरणको स्वामित्वमा रहेको ५२ रोपनी जग्गामा सवारी पार्किङ, बाहिर निस्कने मार्ग, आगन्तुक प्रतीक्षालय, चमेना गृह, पर्यटक मनोरन्जनका लागि पार्क, बगैंचा लगायत विमानस्थल व्यवसायसँग सम्बन्धित कामका लागि भवन लगायत आवश्यक पूर्वाधार निर्माणका लागि मल्होत्रालाई जिम्मा लगाएका थिए।

तत्कालीन मन्त्रिपरिषद्को निर्णय र नेपाल नागरिक उड्डयन प्राधिकरण बोर्डको निर्णयविपरीत मल्होत्राले प्राधिकरणको जग्गामा उक्त संरचना निर्माणका लागि सम्झौता गरेका थिए। रसुवा केडी ज्वाइन्ट भेन्चर प्रालिसँग ५२ रोपनी जग्गामा ‘बुट मोडल’मा आवश्यक पूर्वाधार निर्माण गर्ने र मल्होत्राले सञ्चालन गर्नेगरी ३० वर्षका लागि सम्झौता भएको थियो।

सम्झौतालाई नै आधार मानेर मल्होत्राले नियमावली संशोधन पहिलेको वार्षिक ७८ लाख रुपैयाँ बापतको रकम पनि तिरेका छैनन्। योसँगै सुमनले तेस्रो पक्षसँग व्यवसाय सञ्चालनका लागि लिएको भाडाको पहिलो १० वर्ष ५ प्रतिशत, दोस्रो १० वर्ष १५ प्रतिशत र बाँकी अवधिमा २५ प्रतिशत लिने गरी सम्झौता गरेको खुल्न आएको छ।

तर, मल्होत्राले अहिले निर्माण सम्पन्न भएको संरचना भाडामा लगाए पनि त्यस बापतको रकम र नियमावली संशोधनपछि हुने जग्गाको वार्षिक १ करोड ५६ लाख रुपैयाँको दरले भाडा रकम तिरेका छैनन्। रकम भुक्तानीकै लागि विमानस्थल कार्यालयले बारम्बार पत्र काटे पनि मल्होत्राले कुनै प्रतिक्रिया नदिएको विमानस्थल कार्यालयका एक कर्मचारी बताउँछन्।

आज विमानस्थलका रजाइँ गर्ने मल्होत्रालाई पूर्वमहाप्रबन्धकदेखि हालका महाप्रबन्धकको समेत सहयोग रहेको स्रोत बताउँछ। तर, विमानस्थल कार्यालयका हालका महाप्रबन्धक राजकुमार क्षेत्री भने उनीहरु सम्पर्कमै रहेको बताउँछन्।

मल्होत्रालाई बाँकी रहेको बक्यौता रकम छिट्टोभन्दा छिट्टो तिर्न बारम्बार ताकेता गरेको स्रोत दाबी गर्छ।

मल्होत्राले हालसम्म २ करोड रुपैयाँ तिरिसकेको र ६ करोड रुपैयाँ बराबरका रकम तिर्न बाँकी रहेको क्षेत्री स्वीकार गर्छन्। ‘मल्होत्राले सबै रकम तिर्नुपर्छ,’ क्षेत्रीले भने, ‘रकम असुल्लीका कुनै कम्प्रमाइज हुँदैन। सम्झौता अनुसार सबै रकम असुली हुन्छ।’ तर, महाप्रबन्धक क्षेत्री यसो भन्दै गर्दा मल्होत्राले भने सम्झौत गर्दा तत्कालीन महाप्रबन्धक सुमनले गरेको गल्तीको पत्र देखाउँदै रकम तिर्न आनकानी गरिरहेका छन्।

रकम भुक्तानीका लागि मल्होत्रालाई पठाइएको पत्र-विवरण
नेपाल नागरिक उड्डयन प्राधिकरणको स्वामित्वमा रहेको ५२ रोपनी जग्गामा गरिएको सम्झौताको म्याद सकिएको ११ दिनपछि पहिलो पटक मल्होत्रालाई विमानस्थल कार्यालयले पत्र काटेको थियो। सम्झौतामा उल्लेख गरिएको र थप गरिएको १८ महिनासमेत गरी निर्माण सम्पन्न गर्नुपर्ने समय २०७२ माघ १ गते सकिएको थियो।

१. २०७२ माघ ११ : विमानस्थल कार्यालयले मल्होत्रा (निर्माण कम्पनी रसुवा केडी ज्वाइन्ट भेन्चर) प्रालिलाई बहाल रकम भुक्तानी गर्ने सम्बन्धमा पत्राचार।
२. २०७२ चैत १९ : पुनः भाडा बापतको रकम भुक्तानी गर्ने सम्बन्धमा।
३. २०७४ मंसिर ५ : गते रकम भुक्तानी गर्ने सम्बन्धमा पुनः पत्राचार।
४. २०७४ पुस २ : बाँकी बक्यौता भुक्तानी गर्ने सम्बन्धमा पुनः पत्राचार।
५. २०७४ पुस २० : बक्यौता रकम भुक्तानी गर्ने सम्बन्धमा पुन: पत्राचार।
६. २०७४ माघ २८ : बक्यौता तथा विद्युत महसुल भुक्तानीका लागि पुन: पत्राचार।
७. २०७४ चैत ६ : बक्यौता भुक्तानी गर्ने सम्बन्धमा पुन: पत्राचार।
८. २०७४ चैत ७ : प्रालिको विषयमा स्पष्ट जानकारी खुल्नेगरी यसअघिका पत्रको जवाफ पठाउन र रकम भुक्तानी गर्ने सम्बन्धमा पुन: पत्राचार।
९. २०७५ बैसाख ४ : जग्गा बापतको रकम भुक्तानी गर्ने सम्बन्धमा पत्राचार।
१०. २०७५ बैसाख ५ : सबै विवरण उपलब्ध गराउन र रकम भुक्तानी गर्ने सम्बन्धमा पत्राचार।
११. २०७५ जेठ ६ : रकम भुक्तानी गर्ने सम्बन्धमा पुन: पत्राचार।
१२. २०७५ जेठ २३ : रकम भुक्तानी गर्ने सम्बन्धमा पुन: पत्राचार।
१३. २०७५ असार १९ : बाँकी बक्यौता भुक्तानी गर्ने सम्बन्धमा पुन: पत्राचार।
१४. २०७५ साउन १ : बाँकी बक्यौता भुक्तानी गर्ने सम्बन्धमा पुन: पत्राचार।
१५. २०७५ भदौ २९ : बाँकी बक्यौता भुक्तानी गर्ने सम्बन्धमा पुन: पत्राचार।
१६. २०७५ कात्तिक १३ : विमानस्थलको राजस्व शाखाबाट ५ करोड २५ लाख ९० हजार ८ सय ३२ रुपैयाँ भुक्तानी गर्न विवरण सहितको पत्राचार।
१७. २०७५ कात्तिक १३ : बाँकी बक्यौता भुक्तानी गर्न तथा लिजमा दिइएको क्षेत्रको सम्झौता बमोजिम हुन आउने रकम समेत भुक्तानी गर्ने सम्बन्धमा पत्राचार।
१८. २०७५ कात्तिक २८ : सेवा रोक लगाउन सकिने व्यहोरा उल्लेख गरी पत्राचार हुँदा पनि रकम भुक्तानी नभएको।

त्यसपछि पनि बारम्बार पत्रचार भए पनि कुनै मल्होत्राले कुनै प्रतिक्रिया दिएका छैनन्। यसबीचमा २०७५ असार ३२ मा एक करोड गरी अहिलेसम्म दुई करोड रुपैयाँ मात्रै रकम बुझाइएको विमानस्थल कार्यालले जनाएको छ।