वीरगन्ज- आकाशमा कालो बादल लागेको छ। मेघगर्जनको सम्भावना देखेपछि फेरि कुनै अनिष्ट हुने संकेतले स्थानीय डराउन थाल्छन्। जिउ सिरिंग हुन्छ। मनभित्र त्रासका कारण शंकाउपशंका उब्जन थाल्छ।
यस्तै त्रासको दैनिकी भोगिरहेछन् इजहार मियाँ।
'आइतबार साँझ सुरुमा आकाशमा यस्तै कालो बादल लागेको थियो। केही समयको अन्तरालमा आएको विनाशकारी हावाहुरीले विनाशलीला देखाएर श्रीमती, बुहारी र दुई नातिको ज्यान लिएर गयो,' ६५ वर्षीय मियाँ उनी विलौना पोख्छन्, 'फेरि मौसममा परिर्वतन देख्दा आइतबारको कहालीलाग्दो रातले भयभीत।त छु।'
ठूलो आवाज र गर्जनसहित आएको सो दुई वटा चक्रवात आफ्नो घर अगाडि एकआपसमा जुधेको उनी बताउँछन्। फेटा गाउँपालिका–६ पूरैनियाका अर्का पीडित लैस मियाँ आइतबार साँझको विनाशलीला सम्झँदै भन्छन्, 'त्यो चक्रवातमा आगो जस्तो देखिने उल्का थियो।' तीन सय मिटर जति चौडाइको चक्रवात घुम्ने क्रममा भलुही, भरवलीयामा दोहोरिएर आएपछि यसले ठूलो विनाश गरेर गयो।
यो भयंकर चक्रवातले पर्सा, बारा जिल्लाको खुटवा, जब्दी, भलुही, पूरैनिया, धर्मनगर, फुलवरिया, हर्दिया, तेलगाई, परशुरामपुर, धर्मपुर लगायतका ठाउँमा ब्यापक रुपमा धनजनको क्षति गरेको छ। अहिले कालो बादल लागेकाले आइतबार आएका अनिष्ट जस्तै फेरि त्यो अनिष्ट दोहोरीन्छ कि भने डरले सताइरहेको छ फैजुल हकलाई। 'मैले आफ्नो श्रीमती मुस्तकीमा खातुनसहित बुहारी बिबियालाई समेत गुमाएकाले मौसममा एकाएक खराबी आएपछि डरत्रास लागेको छ,' उनी भन्छन्।
हुन त सङ्घीय सरकारले हावाहुरीबाट घरबारविहीनलाई ओत लाग्न पूरैनिया र भरवलीयामा नेपाली सेनामार्फत रात गुजार्नका लागि त्रिपाल बनाइदिएको छ। फेटा गाउँपालिकाका अध्यक्ष अमिरीलाल प्रसाद भन्छन्, 'बादल लागेको छ, मेघ गर्जिदैछन्। यदि पानी पर्यो भने गाउँनै डुबानमा परी पीडित थप पीडामा पर्ने देखिन्छन्।'
बनाएको घरले त वर्षा र हावाहुरीबाट जोगिन सकेन भने पीडितका लागि सेनाले बनाइदिएको अस्थायी टहरा त्रिपालले फेरि आउने हावाहुरी र वर्षालाई कसरी रोकन सक्ला र। आफ्नै घरको पिलरले किचिएर ज्यान गुमाएको बुबा हरिनारायणको किरियामा बसेका फेटा गाउँपालिका–१ भलुहीका राजेन्द्र दासको पीडा थपिँदो छ। घर आएका आफन्त त्रिपालमुनी आश्रय लिएका छन् तर मौसम बिग्रिदै गएकाले फेरि हावाहुरी आउँदा अनिष्ट हुने चिन्ताले उनीहरुलाई सताइरहेको छ।
बिहीबार बसेको सङ्घीय सरकारको मन्त्रिपरिषद्को बैठकले बारा पर्साको हावाहुरीबाट प्रभावितको घर सेनामार्फत बनाउने निर्णय गरेकाले वर्षायाम सुरु हुनुअघि नै पीडितका लागि घर बनाउनुपर्ने माग जनप्रतिनिधिहरुको छ।
बैसाखतिर छोरीको विवाह गर्ने सपना लिएर बसेका कलैया उपमहानगरपालिका–१३ बलिरामपुरका वीरबहादुर साह कानुको त्यो सपना आइतबार साँझ आएका हावाहुरीले उडाएर लगेको छ। निर्धन उत्थान लघुवित्त संस्था कलैयाबाट रु दुई लाख ऋण लिएर छोरीको विवाहका लागि भनेर डेढ तोला सुनको टीका, नाकको फुली, नथिया राखेका थिए। तर हावाहुरीसँगै घर भत्किँदा उनको सपना त्यही भग्नावशेषमा पुरिन गयो।
घर भत्किएपछिको भग्नावशेषमा वीरबहादुर खुसी खोजिरहेका छन्। तर अझसम्म भेटेका छैनन्। हावाहुरीले भत्किएको घरको भग्नावशेषभित्र गरगहना खोजिरहेको अवस्थामा उनले भने, 'खुला आकाशमुनि त्रिपालमा रात बिताइरहेका छौँ तर आकाशतिर हेर्दा कालो बादल छाएको छ। अलिअलि हावाहुरी पनि चलेको छ यदि बेगले हावाहुरी आयो र पानी पर्यो भने…'
त्यो विनाशकारी हावाहुरीबाट बारा र पर्सामा गरी २७ जनाको मृत्यु भएको छ। ६७६ जना घाइते भएको र एक हजार ८९५ घरमा क्षति पुगेको स्थानीय प्रशासनले जनाएको छ। हावाहुरीबाट ज्यान गुमाएका तथा घरबारविहीन परिवारलाई चाँडै स्थायी बसोवासको व्यवस्था गर्नुपर्ने पीडितहरुको माग छ।
जसरी पहाडमा आएको विनाशकारी भूकम्पले पुर्याएको क्षति र पीडामा तराईले मलम लगाएको थियो। त्यसैगरी विपद्मा डुबेको बेला हावाहुरीबाट पीडितलाई व्यापक राहत दिएर पहाडले मधेसमा मलम लगाउने काम गरिरहेको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766648928.png)
-1764146706.png)
-1763721444.png)
