दीपक घिमिरे/लुम्बिनी– रूपन्देहीको लुम्बिनी सांस्कृतिक नगरपालिका–४ अमारी गाउँको बीचमा छ एउटा आधारभूत विद्यालय। जहाँ अध्ययनका लागि अमारी गाउँसहित खम्मे, शिवलवा, कृतिपुर गरी चार गाउँका विपन्न परिवारका झण्डै ३ सय विद्यार्थी आउने गर्दछन्।
६ महिनाअघि सम्म विद्यालय निकै उदेकलाग्दो थियो। दुई वटा भवन भत्किएर जीर्ण अवस्थामा थिए। विद्यालय कम्पाउण्डभित्र झाडी पलाएको थियो। राम्रो शौचालय समेत थिएन। भवनकै अभावमा विद्यार्थीहरूलाई चौरमा राखेर पढाउनु पर्ने बाध्यता थियो।
लुम्बिनीको पडरिया चोकदेखि दक्षिण पश्चिमतर्फ झण्डै तीन किलोमिटर दुरीमा पर्ने अमारी आधारभूत स्कुलको अवस्था हो यो।
सरकारी आँखामा नपरेका कारण निकै कष्टकर अवस्थामा अध्यापन हुन्थ्यो अमारी स्कुलमा।
तर, अब विद्यालको स्वरुप बदलिएको छ। विद्यार्थीहरू कक्षा कोठामा आनन्दसँग अध्ययन गर्न पाउने भएका छन्। व्यवस्थित शौचालयको निर्माण भएको छ। स्कुलको स्वरुप नै फेरि विद्यायलमा खुसीको बहार आएको छ।
यसरी विद्यालयको स्वरुप बदल्ने श्रेय लेडिज सर्कल नेपाल र राउण्ड टेवल नेपाललाई जान्छ।
संस्थाले पछिल्लो समय शिक्षा क्षेत्रको सुधारका लागि काम गर्दै आएको छ।
यसअघि लुम्बिनीमा रहेका अन्य ४/५ वटा विद्यालयको भौतिक संरचनामा सहयोग गरेको थियो लेडिज सर्कलले। अमारी आधारभूत विद्यालयको अवस्था बुझेपछि भौतिक पूर्वाधार निर्माणमा आफूहरूले काम गरेको सर्कलकी राष्ट्रिय अध्यक्ष आरती अग्रवालले बताइन्।
‘हामी विद्यालय निरीक्षण गर्न गएका थियौं। विद्यालयको अवस्था देखेर सहयोग गर्नुपर्छ भन्ने लाग्यो,’ अग्रवालले भनिन्, ‘विद्यालयलाई सहयोग गर्ने निष्कर्षसहित भौतिक पूर्वाधार निर्माणको काम थाल्यौं।’
सर्कलले दुई वटा कोठा र एउटा हल सहितको भवन निर्माण गरिदिएको छ भने राउण्ड टेवल नेपालले छात्र÷छात्राका लागि छुट्टाछुट्टै शौचालय निर्माण गरिदिएको छ। विद्यालय भवन र शौचालयको सोमबार एक कार्यक्रमको आयोजना गरी विद्यालयलाई हस्तान्तरण गरिएको छ।
१६ लाख रुपैयाँको लागतमा भवन निर्माण गरिएको अध्यक्ष अग्रवालले बताइन्। त्यसमध्ये ४ लाख ३० हजार रुपैयाँ राउण्ड टेबलले सहयोग गरेको उनले बताइन्।
चिठ्ठा बिक्री गरेर संकलन गरिएको रकमबाट विद्यालयको भवन तथा शौचालय निर्माण गरिएको राष्ट्रिय सचिव प्रिया गोयनकाले जानकारी दिइन्। विद्यालयलाई कम्तीमा कक्षा ८ सम्म पढाइ हुने गरी प्रक्रिया अगाडि बढाउन आग्रह गरिन्।
विद्यालयमा नयाँ भवन र शौचालय पाएपछि विद्यार्थीको पठन पाठनमा निकै सहयोग पुगेको विद्यालयका प्राचार्य गंगाराम बिकले उल्लेख गरे। उनले विद्यालयमा भौतिक संरचनाको अभावमा विद्यार्थीलाई बाहिर चौरमा राखेर पढाउनु पर्ने बाध्यता हटेको बताए।
उनले विद्यालयमा भवन निर्माण भएपछि कक्षा थप गर्न सहज भएको बताए। उनले अझै पनि विद्यालयमा शिक्षक कक्ष र पुस्ताकालयको टड्कारो आवश्यकता रहेको बताए।
प्राचार्य बिकले भने, ‘अब स्थानीय सरकारले सहयोग गरे विद्यालयलाई सहज हुने थियो।’
विद्यालयमा ५ जना शिक्षक कार्यरत छन्। भवन अभावका कारण कक्षा ८ सम्म पढाउन नसकेको बताउँदै उनले आउँदो शैक्षिक सत्रदेखि कक्षा ६ को पढाइ सुरु गर्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1664177809.jpg)
-1764146706.png)
