राजविराज– तराई/मधेसको जिल्ला भ्रमणमा रहेका पूर्वराजा ज्ञानेन्द्र शाह आइतबार सप्तरी आइपुगेका छन्।
राजावादीहरुले राजविराजमा उनको भव्य स्वागत गरे। राजविराजस्थित अदालत रोड हुँदै छिन्नमस्ता गाउँपालिकास्थित छिन्नमस्ता भगवतीको दर्शनका लागि हिँडेका शाहलाई सर्वसाधारण तथा शिवसेनाका स्वयंसेवकहरुले पुष्पगुच्छासहित स्वागत गरेका थिए।
शाहले गाडीबाटै सर्वसाधारणको पुष्पगुच्छा ग्रहण गरे। हिन्दु राष्ट्र र राजतन्त्रका विषयमा सर्वसाधारणले राखेको जिज्ञासामा पूर्वराजाले कुनै जवाफ दिएनन्। सो क्रममा केही समय अदालत रोडको आवगमनसमेत रोकिएको थियो।
डिएसपी भावेश रिमालको नेतृत्वमा नेपाल प्रहरी तथा सशस्त्र प्रहरीको टोलीले शाहको सुरक्षा व्यवस्था मिलाएका थिए। जनकपुर, सिरहा, उदयपुरको गाईघाट हुँदै सप्तरी आएका शाह छिन्नमस्ता भगवतीको दर्शनपछि झापातर्फ लाग्ने जनाइएको छ।
शाह दोस्रो चरणको भ्रमणका क्रममा सप्तरी आएका हुन्।
जिल्ला भ्रमणकै क्रममा पूर्व मुमाबडामहारानी रत्नको स्वास्थ्य अवस्था बिग्रिएपछि उनी गत फागुन २२ गते भ्रमण स्थगित गरी काठमाडौं फर्केका थिए। नर्भिक अस्पतालमा उपचाररत रत्नको स्वास्थ्यमा सुधार आएपछि फागुन २९ गतेदेखि उनले पुन: भ्रमण सुरु गरे।
फागुन ३० मा सर्लाही, चैत १ मा उदयपुर, २ गते जनकपुर भ्रमण गरेका उनी आइतबार छिन्नमस्ता दर्शन गरेर पुनः झापा फर्किने कार्यक्रम छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
