काठमाडौं- ललितपुरको गोदावरीस्थित चापाखर्कको डाँडामा सञ्चालित प्याराग्लाइडिङका कारण सो क्षेत्र पर्यटकको रोजाइमा पर्न थालेको छ। काठमाडौं उपत्यकावासीका लागि वनभोजस्थल गएर साथीसङ्गी र परिवारसँग रमाइलो गर्ने गोदावरीमा केही महीनादेखि नियमित प्याराग्लाइडिङ हुन थालेपछि पर्यटकको आकर्षण बढेको हो। अहिले सो क्षेत्रमा दैनिकजसो नै ग्लाइडर उड्न थालेको काठमाडौं प्याराग्लाइडिङ एण्ड ह्याण्ड ग्लाइडिङ प्रालिका सञ्चालक नीरज पन्तले बताए।
विगतमा उडान भए पनि रोकिँदै आएको यहाँ नयाँ व्यवस्थापनले जिम्मा लिएसँगै डिसेम्बर अन्तिम सातादेखि नियमित उडान सुरु भएको उनले बताए। अहिले एक हप्तासम्मका लागि ‘बुक’ हुने गरेको उनी बताउँछन्।
साहसिक खेल (प्याराग्लाइडिङ) का पारखी उपत्यकावासीलाई यसको मजा लिन अब पोखरा धाइरहनु पर्दैन। हावाको वेगमा रम्दै सुन्दर हरियाली, विभिन्न हिमशृखला र उपत्यका एकैसाथ हेर्न पाउँदा खुसी अनुभूति भएको पहिलो पटक प्याराग्लाइडिङको मजा लिएका काठमाडौं असनका सुनिल श्रेष्ठले बताए। गुगलबाट खोज्दा गोदावरीमा प्याराग्लाइडिङ हुन्छ भन्ने थाहा पाएर आएको उनको भनाइ थियो।
'पहिले कौतूहल थियो, उड्ने बेलामा डर फिलिङ्स भो, उडेपछि मजा,' उनले भने। पत्नी प्रीति राजभण्डारी सँगै गए पनि उनी उडिनन्।
डेढ दशकअघि पोखराको सराङकोटबाट सुरु भएको साहसिक खेल अहिले विभिन्न जिल्लामा फैलँदैछ। काठमाडौंबाट तुरुन्त जान सकिने यो नयाँ गन्तव्यका कारण सन् २०२० को नेपाल भ्रमण वर्ष सफल पार्न यसले सहयोगी भूमिका खेल्ने विश्वास गरिएको छ।
यहाँ प्याराग्लाइडिङ सञ्चालन गर्न रु ३ करोड लगानी लागेको सञ्चालक पन्तले बताए। यहाँ जनवरीदेखि अहिलेसम्म ३ भन्दा बढी उडान भइसकेको छ।
सन् २००७ मा राजनीतिकर्मी केशव स्थापितले संस्था स्थापना गरी प्याराग्लाइडिङ उडाउने पहल सुरु गरेका थिए। सन् २०११ देखि १४ सम्म सञ्चालनमा आए पनि भूकम्पपछि उडान हुन नसकेकाले यहाँ नयाँ व्यवस्थापनमा पुनः सञ्चालन गरिएको हो।
कोरियाली च्याङजिङ ख्वानसहित नेपाली व्यवसायी नारायण अर्याल, विनोद शाह, कुमार घिमिरे र ट्रिप कन्सर्नले यसमा लगानी गरेका छन्। पाइलट विजय चौलागाईंले चापाखर्कको छुट्टै विशेषता रहेको उल्लेख गरे। यहाँको उडान क्षमता दिनमा २५ छ। छ ग्लाइडरले सेवा दिन्छन्।
समुद्र सतहबाट दुई हजार एक सय मिटरमाथि गोदावरीको चापाखर्कबाट सुरु हुने प्याराग्लाइडिङ एक हजार ६ सय मिटरको उचाइमा रहेको रचनटारमा आएर रोकिन्छ। पोखरामा एक हजार ६ सय उचाइबाट मात्रै उडान हुनेगर्छ।
गोदावरीबाट झन्डै ५ किमि जंगलको कच्ची बाटो उकालो लागेपछि चापाखर्क पुगिन्छ। यहाँबाट १५ देखि ३० मिनेटको उडान भर्न सकिन्छ। हावाको वेगमा भर पर्ने भएकाले कहिलेकाहीँ उडान लम्बिने वा कहिले नहुन पनि सक्ने अर्का पाइलट बबी राउतले बताए।
यहाँको मुख्य विशेषता भनेको डाँडाकाँडा, हरियाली वन र सुन्दर उपत्यका, स्वच्छ हावापानी, रोमाञ्चक दृश्यावलोकनसँगै मौसम खुल्दा लाङटाङ हिमशृङ्खलासँगै गणेश, गौरीशङ्करलगायत हिमाल देख्न सक्नु हो।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
