इटहरी- गत फागुन १७ गते शुक्रबारदेखि बेपत्ता भएकी युवतीको हत्या भएको हुनसक्ने प्रहरीले अनुमान गरेको छ। मोरङको बेलबारीबाट ९ दिनअघि हराएकी एक युवतीको उनकै प्रेमीले हत्या गरेको हुनसक्ने प्रहरीले प्रारम्भिक अनुमान गरेकाे हाे।
मोरङको बेलबारी–४, बुधबारेकी २६ वर्षीया रमिला राई बेपत्ता भएको ९ दिनपछी प्रहरीले एक अभियुक्तलाई पक्राउ गरेको छ। पक्राउ पर्नेमा उनकै प्रेमी योगेन्द्र गुरुङ रहेका छन्। याेगेन्द्र सत्तारुढ नेपाल कम्युनिष्ट पार्टी (नेकपा)का स्थानीय नेता समेत हुन्। उनी तत्कालीन नेकपा (एमाले)काे बेलबारी नगपालिकाका पूर्व नगर अध्यक्षसमेत हुन्।
हत्यापछी रमिलालाई कोशीमा लगेर फालिएको हुनसक्ने प्रहरीले जनाएको छ। अनुसन्धानका लागि याेगेन्द्रलाई इलाका प्रहरी कार्यालय, बेलबारीको टोलीले इलामबाट पक्राउ गरेको थियो। घटनाको विषयमा प्रहरीले चासो दिन थालेपछी याेगेन्द्र भागेर इलाम गएको हुनसक्ने प्रहरीले बताएको छ।
जिल्ला प्रहरी कार्यालय मोरङका प्रहरी प्रमुख मनोज कुमार केसीले भने, 'अहिलेनै को हत्यारा हो भनेर भन्नसक्ने पर्याप्त आधार छैन। अनुसन्धानका क्रममा आफूले रमिलाको हत्या गरी कोेशी नदीमा शव फालेको याेगेन्द्रले स्वीकार गरेपनि घटनामा को-को संलग्न थिए भन्नेबारे जानकारी आउन केही समय लाग्नेछ।'
याेगेन्द्रको बयानको आधारमा रमिलाकाे शव कोसी नदीमा लगेर फ्याँकिएको भएपनि प्रहरीले अझैसम्म शव फेला पार्न सकेको छैन। रमिला श्रीमानसँग सम्वन्धविच्छेद गरेर माइतीघरमा बस्दै आएकी थिइन्। गुरुङका भने श्रीमती र छोरा काठमाडौंमा बस्दै आएको बताइएको छ। याेगेन्द्र नोबेल अस्पताल सञ्चालक समिति बेलबारीका अध्यक्ष तथा एक साझेदारी वनका समेत अध्यक्ष हुन्।
यस्तो छ घटनाको प्रकृति
फागुन १७ गते हराएकी रमिलालाई खोजबिन गरी पाउँ भनि परिवारले प्रहरी समक्ष निवेदन दिएका थिए। सोही निवेदनको अधारमा प्रहरीले छानबिन थालेको थियो। सोहीक्रममा उनका प्रेमी गुरुङको घर र शंकास्पद सम्पूर्ण स्थानमा प्रहरीले छापा हानेको थियो। प्रहरीले खोजीकार्य तीब्र पारेको र आफूमानै शंका गरेपछी उनी फरार भएका थिए। सोही शंकाको आधारमा प्रहरीले उनलाई पक्राउ गरेको जनाइएकाे छ।
प्रहरीले शुक्रबार नै याेगेन्द्रले प्रयोग गर्दै आएको बा१५प ७९१६ नम्बरको कार उनको घरबाटै नियन्त्रणमा लिएको थियाे।
घटना भएको दिन योगेन्द्र रमिलासँगै उनकी एक जना साथी र अर्का एकजना युवकसमेतलाई लिएर घरबाट दोहोरी रेष्टुरेन्टमा जाने भन्दै निस्किएका थिए। सो दिन उनीहरू विराटचोकमा रहेको हवाना रेष्टुरेन्टमा गएको खुलेको छ। हराएको अन्तिम साँझ रमिला याेगेन्द्रसँगै भएकोले पनि घटना रहस्यमय देखिएको प्रहरी प्रमुख केसीले बताए।
घटना भएको केही घण्टा प्रहरी र परिवारसँगै रहेका गुरुङ एक्कासी हराएका थिए। त्यस दिन योगेन्द्र ३ पटकसम्म रमिलाको माइतीघरमा गएको र केही पत्ता नलागेपछि योगेन्द्रकै सल्लाहअनुसार उनीसहित भएर प्रहरीमा हुलिया दिएका थिए। रमिला आफ्नी प्रेमीका बताउने गरेका उनले प्रहरीलाई पनि आफ्नी प्रेमीकाको खोजी गरीदिन आग्रह गरेका थिए।
इलाका प्रहरी कार्यालय बेलबारीले विशेष टोली नै खटाएर खोजीकार्य तीब्र बनाएको थियो। इलाका प्रहरी कार्यलय बेलबारीका प्रमुख प्रहरी निरीक्षक रामजी कटुलकाअनुसार मोरङका चुरे जङ्गल क्षेत्र र इटहरीको तालतलैया लगायतका क्षेत्रमा युवतीको खोजी गरिएको थियो।
याेगेन्द्रले रमिलालाई फागुन १७ गते शुक्रबार राति साढे ११ बजे घरमै छोडिदिएको बताए पनि ‘सिसिटिभी फुटेज’मा उक्त कुरा नमिलेको कटुवालको भनाइ छ। योगेन्द्रले प्रयोग गर्दै आएको गाडी रातको साढे १२ बजे इटहरीबाट पश्चिम लागेको र शनिबार बिहान साढे ४ बजे गोठगाउँबाट पूर्व लागेको उनले बताए। योगेन्द्रले भनेको कुरा र गाडीको अवस्था हेर्दा नमिलेपछि उनीमाथि निगरानी गर्न प्रहरीले विशेष टोली परिचालन गरेको थियाे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
