दुबई– अन्तर्राष्ट्रिय क्रिकेट काउन्सिल (आइसिसी) का प्रमुख कार्यकारी डेभिड रिचार्डसनले विश्वभर भइरहेका छोटो फर्म्याटका क्रिकेट लिगका लागि नयाँ नियम ल्याउन लागेको बताएका छन्।
रिचार्डसनले २०१८ जुनमा आइसिसीले एक समिति बनाएको बताउँदै भनेका छन्,'आइसिसीका सदस्य राष्ट्रको आग्रहपछि हामीले व्यवसायीक लिगलाई अनुमति दिने र खेलाडी रिलिजको विषयमा छलफल गर्न समिति बनाएका थियौं।'
विश्वभरका टी–२० लिग र अन्य छोटो फर्म्याटका लिग आयोजना गर्ने क्रम तीव्ररुपमा बढेपछि समिति बनाएर छलफल भएको बताएका हुन्। लिग आयोजना बढिरहदा अन्तर्राष्ट्रिय खेल तालिकामाथि चुनौती थपिएको विषयमा आइसिसी गम्भिर भएको बताए। साथै निरन्तरको लिगले विदेशी खेलाडी आवश्यकता भन्दा बढि खेल्ने गरेको पाइएको आइसिसीको भनाइ छ।
व्यवसायिक रुपमा हुने कतिपय लिग हुने आधार नभएको,आयोजनाका लागि पर्याप्त पूर्वाधार नभएको र त्यस्ता लिगले क्रिकेटको विकास र बिस्तारमा सहयोग नपुग्ने रिचार्डसनको भनाइ छ। यी लिगमा भष्ट्राचार हुने चुनौती रहेकाले क्रिकेटको साखलाई असर गर्ने उनको भनाइ छ।
क्रिकेटको विकृती हटाउनका लागि आइसिसीले नयाँ नियमको ड्राफ्ट तयार पारिसकेको छ। जुन नियमले छोटो समयका लागि हुने क्रिकेट लिगलाई व्यवस्थित बनाउने र क्रिकेटको विकासमा सहयोग पुग्ने आइसिसीको विश्वास छ।
रिचार्डसनले केहि लिगले क्रिकेटको लोकप्रियता संसारभर बढाइरहेको बताउँदै नयाँ नियम आएपछि क्रिकेट विकासमा थप सहयोग पुग्ने बताए।
उनले नयाँ नियमले संसारभर हुने लिग व्यवस्थित गर्न न्यूनतम मापदण्ड तोक्ने बताए। केहि भारतीय मिडियाले आइपिएललाई असर गर्ने गरी नियम ल्याउन लागेको समचारको पनि रिचार्डसनले खण्डन गरेका छन्। उनले क्रिकेट विकासका लागि ल्याउन लागेको नयाँ नियम तयार हुन अझै केहि महिना लाग्ने पनि बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
