राजविराज/जनकपुर– फागुन कृष्ण चतुर्दशीका दिन मनाइने महाशिवरात्रि पर्व भगवान् शिवको पूजाआरधना गरी सप्तरीलगायत तराईका जिल्लामा पनि मनाइँदैछ।
सप्तरीको राजविराजस्थित हरिनन्देश्वर महादेव मन्दिरमा पूजा गर्न बिहानैदेखि भक्तजनहरुको घुइँचो छ। भिड नियन्त्रण गर्न प्रहरीको सहयोग लिइएको छ। महिला र पुरुष दर्शनार्थीलाई छुट्टाछुट्टै लाइन लगाएर दर्शनको व्यवस्था मिलाइएको छ।
दशकपछि मन्दिरमा पहिलोपल्ट लघु रुद्रीसहितको हवनको कार्यक्रम आयोजना गरिएको छ भने सवालाख बत्ती बाल्ने कार्यक्रम पनि रहेको पूजा समितिका सदस्य कृष्णहरि भट्टराईले जानकारी दिए। हरिनन्देश्वर महादेव मन्दिरमा सप्तकोशी नदीबाट जल ल्याई महादेवको मूर्तिमा चढाउने प्रचलन छ। कावरीयाले (भारमा पानी बोकी पैदल यात्रा गर्ने समूह) करिब २५ किलोमिटर पैदल यात्रापछि जल विषर्जन गर्ने क्रम समेत सुरु भएको उनले जानकारी दिए।
यसैगरी जिल्लाको शम्भुनाथ नगरपालिकास्थित शम्भुनाथ मन्दिर, कञ्चनरुप नगरपालिका स्थित शिवपार्वती मन्दिर, पातोको डाकनेश्वरी मन्दिर, वभनगामाकट्टिको महादेव मन्दिर, हनुमाननगरको शिव मन्दिर तथा फत्तेपुर स्थित शिवालयहरुमा पनि भक्तहरुको घुइँचो छ।
जनकपुर र आसपासका शिवालयहरुमा पनि दर्शनार्थीहरुको भिड लागेको छ। शिवचोकस्थित शिव मन्दिर, गंगासागरस्थित भुतनाथ, कपिलेश्वरनाथ महादेव, कुपेश्वरनाथ महादेव, क्षीरेश्वरनाथ महादेव, सतोषर स्थित महादेव मन्दिर, सीमावर्ती क्षेत्रको कल्याणेश्वरनाथ महादेव, महोत्तरीको जलेश्वर स्थित जलेश्वरनाथ महादेव मन्दिरहरुमा भक्तजनहरुको भिड छ।
महोत्तरीको जलेश्वर राजा जनकको राजधानी जनकपुरको दक्षिणद्वारको रुपमा रहेको पुराणमा वर्णित छन् भने पदम पुराणका अनुसार जलेश्वरनाथ महादेव स्वयं रुद्रबाट स्थापना भएको हो।
जलेश्वरनाथमा लागेको महाशिवरात्रि मेलालाई व्यवस्थित बनाउनका लागि जलेश्वरनाथ महादेव संरक्षण समितिद्वारा निःशुल्क स्वास्थ्य शिविर, आवास, खानेपानीको व्यवस्था गरिएको छ भने शान्ति सुरक्षाका लागि नेपाल प्रहरी, सशस्त्र प्रहरी र नेपाली सेनासमेत परिचालन गरिएको प्रमुख जिल्ला अधिकारी उमेशकुमार ढकालले बताए।
पौराणिक मान्यता अनुसार मिथिला नरेश जनकले स्थापना गरेको यस शिवालयको दर्शनमात्रले सम्पूर्ण पाप क्षय भई पुण्य कमाइने जनविश्वासका कारण भक्तजनको बढी भिड लाग्ने गरेको हो।
जलेश्वरका शिव पूजा समारोह समितिका अध्यक्ष देवेन्द्र साहले शिवरात्रिको अवसरमा भक्तजनको चापलाई दृष्टिगत गरी सबैले सुविधापूर्वक दर्शन गरुन् भन्ने मनशायले यो पटक पर्याप्त व्यवस्था मिलाइएको बताए।
शिवरात्रिका दिन मधेसका कृषकले राम्रो कृषि उत्पादन तथा सहकालको कामना गर्दै धानका बाला तथा सु–स्वास्थ्यका लागि भगवान् आसुतोषलाई भण्टाको भार चढाउने परम्परा पनि रहेको मन्दिरका पुजारी उपेन्द्र पाठकले बताए।
शिवरात्रिको पुण्य दिन आज जलेश्वर नाथ मन्दिर परिसरमा बालकको मुण्डन गर्ने प्रचलन समेत रहेको छ।
महोत्तरीको उत्तरवर्ती क्षेत्रमा वर्दिवास नगरपालिकामा पर्ने टुटेश्वरनाथ महादेव तथा सुन्दरपुर स्थित मंगलनाथ महादेव मन्दिरमा समेत भक्तजनको भिड तथा पूजा कीर्तनले वातावरण भक्तिमय पारेको छ।
मंलनाथमा आजदेखि तीन दिनसम्म धार्मिक मेला लाग्ने गर्दछ।
त्यसैगरी धनुषाको क्षीरेश्वरनाथ नगरपालिका वडा नं ७ हरिहरपुर स्थित क्षीरेश्वरनाथ महादेव स्थानमा पनि श्रद्धालुहरुको घुइच्चो लागेको छ।
शिवजी उत्पत्ति भएको रातका नामबाट नामकरण भएको यो पर्व कालरात्रि, मोहरात्रि, सुखरात्रि र शिवरात्रि नामक चार प्रमुख रात्रिमध्ये एक पवित्र पर्वका रूपमा शिव पुराणलगायत ग्रन्थमा वर्णित छ।
महाशिवरात्रिका दिन भक्तजनले शुद्ध भई शिव मन्दिरमा पूजार्चना गरी व्रत बस्ने र शिवको प्रिय वस्तु दूध, धतुरो र बेलपत्र चढाउने गर्छन्। यस पर्वका दिन उपवास गरी रातभर जाग्राम बसे सुखशान्ति प्राप्त हुने र स्वर्गलोक प्राप्त हुने धार्मिक मान्यता छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
