काठमाडौं- वृद्धहरूका सारथी पूर्व अर्थमन्त्री भरतमोहन अधिकारीले शनिबार राती देहत्याग गरे। २०५१ सालको तत्कालीन नेपाल कम्युनिस्ट पार्टी (एमाले)को सरकारले ल्याएको जनपक्षीय नीति तथा कार्यक्रम र बजेटलाई हालसम्म पनि नमूना कार्यका रुपमा लिने गरिन्छ। सोही सरकारमा उनी अर्थमन्त्री थिए।
८३ वर्षको उमेरमा निधन भएका अधिकारीलाई उनी आबद्ध पार्टी र विपक्षी दलका नेताहरूले वृद्ध र जनप्रेमी नेताका रुपमा स्मरण गरेका छन्। कसले कसरी सम्झिए नेता अधिकारीलाई, हेरौं संक्षेपमाः
ढाडस दिने नेता : प्रचण्ड, नेकपा अध्यक्ष
भेन्टिलेटरमा जानुअघि उहाँले पार्टी, देश र समाजकै चिन्ता गर्नुभएको थियो। समृद्धिको चाहना गर्नुभएको थियो। साथै,पार्टी एकीकरण प्रक्रिया छिटो सक्न आग्रह गर्नुभएको थियो।
मसँगको सम्बन्धका विषयमा भन्नुपर्दा उहाँ मेरो अभिभावक हुनुहन्थ्यो। २०३८ सालदेखि उहाँ र मेरो सम्बन्ध नजिकिएको थियो।
पहिलो पटक वनारसमा अखिल भारत नेपाली विद्यार्थी संघको सम्मेलनमा भेट वहाँसँग भएको थियो। राजनीतिक भेटघाट र कुराकानीको सुरुवात त्यसै समयदेखि भएको हो।
पार्टी अलग-अलग रहेपनि उहाँसँग सहकार्य लामो समयसम्म रह्यो। पञ्चायत विरोधी आन्दोलनका क्रममा पनि धेरैपटक भेट भएको थियो। पछिल्लो शान्ति प्रक्रिया पछि झनै सहजपूर्वक कुराहरू हुने गर्थे। पार्टी एक भएपछि झनै कुराकानीहरू बाक्लिएको थियो। हामी सबैका अभिभावक हुनुहन्थ्यो।
म फरक पार्टीमा रहेको समयमा मैले संसद्मा गरेका भाषणका विषयमा तारिफ गर्नुहुन्थ्यो। रोष्ट्रमबाट बोलेर ओर्लने बित्तिकै असाध्यै राम्रो बोल्नुभयो भनि बधाइ भन्नुहुन्थ्यो। उहाँको ढाडसबाट ममा उर्जा जहिले प्राप्त हुन्थ्यो।
जीवनको अन्तिम समयसम्म पनि उहाँलाई देश,समाज र पार्टीकै चिन्ता थियो।
अर्थशास्त्रका विषयमा उहाँमा भएको ज्ञान र अनुभव अतुलनीय थियो। त्यसलाई नयाँ पुस्ताले अनुसरण गर्नुपर्छ।
वृद्धहरूका सेवक : माधवकुमार नेपाल, नेकपा वरिष्ठ नेता
भरतमोहन अधिकारीको मृत्यु यो मूलकका लागि दुर्भाग्य हो। उहाँ आफ्नो समयका हस्ती हुनुहुन्थ्यो।जनतामा लोकप्रिय व्यक्तित्व हो।
लोकतान्त्रिक मान्यतालाई आत्मसाथ गर्ने कम्युनिस्ट आन्दोलनका अगुवा हुनुहुन्थ्यो।
भरतमोहनसँग मेरो धेरै घनिष्ठता थियो। उहाँसँग भएको सहकार्य अन्तिम समयसम्म रहेको थियो। २०४४ सालदेखि हाम्रो भेट भएको थियो। पञ्चायत विरोधी आन्दोलनमा हामीले सहकार्य गर्यौं।
अर्थमन्त्रीको कार्यभार समाल्दा उहाँले लोकप्रिय अर्थमन्त्रीको भूमिका निर्वाह गर्नुभयो।
उहाँले ल्याएको बजेटले पार्टीलाई लोकप्रियताको शीखरमा पुर्याएको थियो। वृद्ध भत्ताको साथै मनमोहन जेष्ठ नागरिक प्रतिष्ठानको प्रमुखका हैसियतले सधैं वृद्धहरूको पक्षमा लागिरहनु भएको थियो।वृद्धहरूको देशव्यापी अभिनन्दन गर्ने अभियानको श्रेय पनि उहाँलाइ नै जान्छ।
समाज सुधारक : विजय गच्छदार, कांग्रेस उपसभापति
प्रजातन्त्र र लोकतान्त्रका आन्दोलनमा उहाँ सधैं लडिरहनु भयो। परिवर्तनका लागि भएका हरेक आन्दोलनमा उहाँको भूमिका अग्रस्थानमा थियो। सञ्चा लोकतान्त्रिक नेता गुमाउन पुगेका छौं।
अर्थमन्त्रीको हैसियतमा दिवंगत नेताले सामाजीक/आर्थिक परिवर्तन ल्याउनका लागि अद्वितीय योगदान पुर्याउनु भएको थियो।असल अर्थविद्,अर्थमन्त्री,समाज सुधारक राजनीतिज्ञका रुपमा मैले बुझ्छु।
देशले असल राजनीतिज्ञ गुमाएको छ।
कम्युनिस्ट आन्दोलनमा उहाँजस्तो नेता प्राप्त गर्न गाह्रोः मोहन वैद्य,अध्यक्ष,नेकपा क्रान्तीकारी
नेपाली जनवादी आन्दोलनका पुराना नेता हुनुहुन्छ। उहाँसँगै मेरो धेरै लामो समयदेखि भेटघाट हुने गर्दथ्यो।
हामी एक पटक एउटै पार्टीमा पनि थियौं। पछि पार्टी विभाजन हुदाँ अलग अलग बाटो लाग्यौं। उहाँ जुन समूहमा रहेपनि जनवादी आन्दोलनमा लागिरहनुभएको थियो। सरल स्वभावको नेता हो।मृदभाषी पनि हुनुहुन्थ्यो।
उहाँको निधनले कम्युनिस्ट र जनवादी आन्दोलनलाई ठूलो क्षति भएको छ। अर्थशास्त्रमा उहाँको विज्ञता थियो। उहाँ जस्तै नेता पुनः प्राप्त गर्न धेरै गाह्रो पर्छ।
ग्रामीण अर्थतन्त्रका अगुवा : हृदयेश त्रिपाठी,मधेसवादी नेता
सामूहिक सपनाकै उहाँ एक अंग हुनुहुन्थ्यो। नेपाली अर्थतन्त्रका विसंगतिहरू हटाउन उहाँले महत्वपूर्ण भूमिका निर्वाह गर्नुभयो। अर्थतन्त्रका विसंगतिहरू पहिचान गर्नुभएको थियो।
ग्रामीण अर्थतन्त्र परिवर्तन नगरी देशका विकास नहुनेमा उहाँ विश्वस्त हुनुहुन्थ्यो। गाँउको विकास नभइ नेपालको विकास नहुने मत थियो। त्यस मान्यतालाई अघि बढाउन प्रयास उहाँले गर्नुभएको थियो।
अर्थमन्त्री हुँदा उहाँले गरेका सकरात्मक पाटोलाई अहिले पनि अनुसरण भइरहेको छ। पछिल्लो पटकको मेरो भेटमा स्थानीय तह र प्रदेशलाई अधिकार प्रत्यायोजन अधिकतम हुनुपर्नेमा उहाँको धारणा थियो।
पछिल्लो समय पार्टीले उहाँका मतलाई साथ नदिएजस्तो लागेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
