काठमाडौं- गुन्डा नाइके राजु गोर्खाली अहिले महानगरीय प्रहरी परिसर काठमाडौंको हिरासतमा छन्। व्यवसायीका पसलमा ताला लगाउने, जथाभावी रकम उठाउने गरेको उजुरी परेपछि महानगरीय अपराध महाशाखाको टोलीले माघ २० गते गोर्खालीलाई बानेश्वरबाट पक्राउ गरेको थियो।
गत माघ ८ गते गोंगबुस्थित एक गेस्ट हाउसमा हतियार कारोबार हुँदै गरेको गोप्य सूचना महानगरीय प्रहरी परिसर काठमाडौंमा आयो। विश्वस्त स्रोतबाट सूचना आएपछि परिसरका डिएसपी होबिन्द्र बोगटीको नेतृत्वमा खटिएको प्रहरी टोलीले काभ्रेका अभिलाश तामाङलाई पक्राउ गर्यो। उनको साथबाट एउटा पेस्तोल र गोली समेत बरामद गरेको थियो।
परिसर र अपराध महाशाखाले टोले गुण्डा र हतियार कारोबारीविरुद्ध चलाएका यी दुई अपरेसनका उदाहरण हुन्। पछिल्लो समय राजधानीमा साना हतियारको बिगबिगी बढ्दै गएको निष्कर्ष निकाल्दै प्रहरीले विशेष अभियान चलाएर कारबाही प्रक्रिया अघि बढाएको बताएको छ।
समाजमा अशान्ति फैलाउँदै गुण्डागर्दीमा संलग्नलाई परिसर र महाशाखा दुबैले कारबाही अभियान सुरु गरेका छन्। प्रहरीले अभियान चलाएको ६ महिनाभन्दा बढी भइसकेको छ। धेरै टोले गुण्डा पक्राउ परिसकेको बताएको प्रहरीले उनीहरूमध्ये केहीबाट हतियारसमेत बरामद गरेको छ।
२४ जना हतियारसहित पक्राउ, ९ पेस्तोल र ६७ गोली बरामद
चालु आर्थिक वर्ष २०७५/७६ को माघ महिनासम्म मात्रै काठमाडौं उपत्यकाबाट २४ जनालाई प्रहरीले हतियारसहित पक्राउ गरेको छ। महानगरीय प्रहरी कार्यालय (मेट्रो) रानीपोखरीको तथ्यांकअनुसार काठमाडौंबाट सबैभन्दा बढी हातहतियार तथा खरखजनासम्बन्धी ९ वटा मुद्दा चलेको छ।
मेट्रोका डिआइजी शैलेश थापाले काठमाडौंबाट १८ जना पुरुष हतियारसहित पक्राउ परेको बताएका छन्। उनीहरूका साथबाट ६ वटा पेस्तोल, १ रिभल्वर, १ कटुवा पेस्तोल गरी ८ वटा पेस्तोल बरामद भएको छ। त्यसैगरी पेस्तोलमा लाग्ने गोली १७ राउन्ड, कटुवा पेस्तोलमा लाग्ने गोली २ राउन्ड र अन्य हातहतियारमा लाग्ने गोली ४३ राउन्ड गरी ६२ राउन्ड गोली बरामद भएको डिआइजी थापाले जाकनारी दिए। काठमाडौंबाटै गोलीका खोका तीन थान र म्याग्जिन एक थान पनि बरामद भएको छ।
राजधानीमा साना हतियारको बिगबिगी बढ्दै गएको निष्कर्ष निकाल्दै प्रहरीले विशेष अभियान चलाएर कारबाही प्रक्रिया अघि बढाएको बताएको छ।
त्यस्तै भक्तपुरबाट ५ थान गोलीसहित ५ जना पक्राउ परेका थिए भने उनीहरूका साथबाट १ पेस्तोल बरामद भएको र उनीहरुलाई हातहतियार तथा खरखजाना सम्बन्धी मुद्दा चलाइएको प्रहरीले जानकारी दिएको छ।
ललितपुरबाट हतियारसहित एक महिला पक्राउ परेका मेट्रोको रेकर्ड छ। २ थान चाँचरसहित एक महिलालाई ललितपुर प्रहरीले पक्राउ गरेको थियो।
ठग्नकै लागि हतियारको प्रयोग
प्रहरीले हतियारसहित पक्राउ गरेका अधिकांश व्यक्तिले ठगी गर्न हतियार प्रयोग गर्ने गरेको बयान दिएका छन्। महानगरीय प्रहरी अपराध महाशाखाका एसपी सोमेन्द्रसिंह राठौरले साना हतियार ठगी तथा लुटपाटमा प्रयोग हुने गरेको बताउँछन्। एसपी राठौरले भने, ‘केही वर्षअघिसम्म हतियारको प्रयोग कसैको ज्यान लिन हुने गरेको थियो। तर पछिल्लो समय लुटपाट, अवैध नगद कारोबार र नक्कली सुनको कारोबारलगायतका ठगीमा हतियारको प्रयोग हुने गरेको छ।’ प्रहरीको सो भनाइलाइ पक्राउ परेका व्यक्तिको क्रियाकलापले थप पुष्टि गरेको छ।
गत असार ७ गते खुँडे भनिने अम्बरबहादुर तामाङलाई अपराध महाशाखाले पक्राउ गरेको थियो। उनका साथबाट प्रहरीले १ थान कटुवा पेस्तोल, २ राउन्ड गोली र १२ सय अमेरिकी डलर बरामद गरेको थियो। उनी डलर साटिदिने भन्दै लुटपाट तथा नक्कली डलरको कारोबार गर्थे।
हतियारकै आडमा डकैती गर्ने अर्का व्यक्ति हुन्, राजन लिम्बू। लिम्बूलाई गत मंसिर २८ गते अपराध महाशाखाको टोलीले रातोपुलबाट पक्राउ गरेको थियो। त्यसबेला लिम्बूका साथबाट प्रहरीले एउटा पेस्तोल र ४ राउन्ड गोलीसमेत बरामद गरेको थियो। उनी हतियार देखाएरै लुटपाट गर्दै आएका व्यक्ति हुन्।
प्रहरीले विगत ६ महिनाको अवधिमा काठमाडौं उपत्यकाका झन्डै ५० जना टोले गुन्डा र २४ जना हतियार कारोबारी पक्राउ गरिसकेको छ। गुन्डाकै कारण समाजमा आतंक फैलिएको, हतियार देखाई सर्वसाधरणमा आतंक मच्चाएका कारण गुन्डाविरुद्ध कारबाही आवश्यक रहेको प्रहरीको भनाइ छ।
यसरी हतियार देखाएर ठगी धन्दा हुन थालेपछि हतियार कारोबारी र टोले गुण्डाविरुद्ध प्रहरीले विशेष अभियान चलाएरै कारबाही सुरु गरेको हो।
प्रहरीले गुण्डागर्दीमा संलग्न अशोक लामामाथि दिउँसै शंखमुलस्थित युएन् पार्कमा महाशाखाको टोलीले पक्राउ गरेको थियो। उनी सातदोबाटो, भैंसेपाटीलगायतका क्षेत्रमा आपराधिक गतिविधि सञ्चालन गर्थे। प्रहरीले लामाको साथबाट १ थान पेस्तोल र २ वटा गोलीसमेत बरामद गरेको थियो।
लामा पक्राउ परेको २ दिनपछि महानगरीय प्रहरी परिसर काठमाडौंले ठमेलबाट गुण्डागर्दीमा संलग्न २ जना पक्राउ गर्यो। ठमेल क्षेत्रमा रहेका होटलमा गुण्डागर्दी गर्दै रकम असुल्ने २८ वर्षीय मनोज खत्री र २८ वर्षकै कुमार श्रेष्ठ पक्राउ परे।
प्रहरीले विगत ६ महिनाको अवधिमा काठमाडौं उपत्यकाका झन्डै ५० जना टोले गुन्डा र २४ जना हतियार कारोबारी पक्राउ गरिसकेको छ। गुन्डाकै कारण समाजमा आतंक फैलिएको, हतियार देखाई सर्वसाधरणमा आतंक मच्चाएका कारण गुन्डाविरुद्ध कारबाही आवश्यक रहेको प्रहरीको भनाइ छ।
‘समाजलाई शान्त राख्न गुन्डालाई कारबाही गर्नैपर्ने हुन्छ। परिसरले गुण्डा सफाइ अभियान थालेको हो,’महानगरीय प्रहरी परिसर काठमाडौंका एसएसपी बसन्त लामाले भने।
टोले गुण्डा पक्राउ गरेपनि उनीहरु पनि सामान्य तारिखमा छुट्ने गरेका छन्। केही गुन्डा नाइके छुटाउन राजनीतिक दबाबसमेत आउने गरेको छ।
गत जेठ महिनामा गुण्डा नाइके राधे समूहका सदस्य देवकुमार थापा र कमल गुरुङ रिभल्बर र खुकुरीसहित ठमेलबाट पक्राउ परेका थिए। उनीहरूले ठमेल क्षेत्रमा गुन्डागर्दी गर्दै आएका थिए। परिसरकै प्रहरी टोलीले सपन मगर भनिने बिमल लुंगेलीलाई दरबारमार्गस्थित किंग्स लाउन्जबाट पक्राउ गरेको थियो। उनी दरबारमार्ग क्षेत्रमा गुण्डागर्दी गर्ने टोले गुन्डा हुन्।
गोंगबु, नयाँबजार, बालाजुलगायतका क्षेत्रमा गुण्डागर्दी गर्ने सुरेश डंगोल, राजकुमार ढुंगाना, रामकुमार घर्ती र भीमबहादुर थापालगायतका गुन्डा पक्राउ परेपनि धेरैजसो तारिखमा रिहा भइसकेका छन्। पक्राउ परेका व्यक्तिमाथि सार्वजनिक अपराधमा मुद्दा चलाएर प्रहरीले केही दिन थुनामा राख्ने र पछि उनीहरु धमाधम छुट्ने गरेका छन्।
हतियार सहित पक्राउ परेकालाई प्रहरीले हातहतियार तथा खरखजना मुद्दा चलाएर कारबाही प्रक्रिया अघि बढाउने गरेको छ।
टोले गुण्डा पक्राउ गरेपनि उनीहरु पनि सामान्य तारिखमा छुट्ने गरेका छन्। केही गुन्डा नाइके छुटाउन राजनीतिक दबाबसमेत आउने गरेको छ। जसकारण पक्राउ पर्दै, छुट्दै पुनः आपराधिक क्रियाकलापमा संलग्न हुने गरेको प्रहरी अधिकारी बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773837959.png)
